09-Jan-2022

କଣ୍ଟାବାଞ୍ଜି(ଆନନ୍ଦ ମୋଟେ) // ତ୍ରିସ୍ତରୀୟ ପଂଚାୟତ ନିର୍ବାଚନରେ ଆଦିବାସୀମାନଙ୍କ ପାଇଁ ସଂରକ୍ଷିତ ସରପଂଚ ପଦବୀ, ସମିତି ସଭ୍ୟ ପଦବୀ, ବ୍ଳକ ଚେୟାରମ୍ୟାନ ପଦବୀ, ଜିଲ୍ଲା ପରିଷଦ ସଭ୍ୟ ତଥା ଅଧ୍ୟକ୍ଷ ପଦବୀ ଲାଗୁ କରିବା ଦାବିରେ ଆଜି ଆଦିବାସୀ ସଂଘ ପକ୍ଷରୁ ତୁରେକେଲା ବ୍ଲକ ଅଫିସ ଘେରାଉ କରାଯାଇଛି । ଜିଲ୍ଲା ଆଦିବାସୀ କଲ୍ୟାଣ ସଂଘ ପକ୍ଷରୁ ବିକ୍ଷୋଭ ପ୍ରଦର୍ଶନ କରାଯିବା ସହ ବ୍ଲକ ଅଫିସ ଘେରାଉ କରାଯାଇଛି ।ବଲାଙ୍ଗିର ଜିଲ୍ଲାର ୩୧୭ଟି ଗ୍ରାମ ପଂଚାୟତରେ ନିର୍ବାଚନ କରିବା ପାଇଁ ୭୨ ସରପଂଚ ଏବଂ ୭୨ଟି ସମିତି ସଭ୍ୟ ପଦବୀ ଆଦିବାସୀମାନଙ୍କ ଗ୍ରାମ ପଂଚାୟତରେ ସଂରକ୍ଷଣ ଥିଲା । କିନ୍ତୁ ପୁଣି ଜିଲ୍ଲାପାଳ ବଲାଙ୍ଗିରଙ୍କ ବିଜ୍ଞପ୍ତି ଚିଠି ସଂଖ୍ୟା ୧୦୨୬ ତା.୨୭.୧୨.୨୦୨୧ରେ ପ୍ରକାଶିତ ସଂରକ୍ଷଣ ତାଲିକାରେ ବଲାଙ୍ଗିର ଜିଲ୍ଲାର ୩୧୭ଟି ପଂଚାୟତ ମଧ୍ୟରୁ ଗୋଟିଏ ବି ପଂଚାୟତରେ ଆଦିବାସୀମାନଙ୍କ ପାଇଁ ସଂରକ୍ଷଣ କରାଯାଇ ନାହିଁ । ଏହାକୁ ବିରୋଧ କରି ଆଜି ତୁରେକେଲା ବଜାର ଠାରୁ ଶତାଧିକ ଆଦିବାସୀ ପାରମ୍ପରିକ ଅସ୍ତ୍ରଶସ୍ତ୍ର ଧରି ବ୍ଲକ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିଥିଲେ । ଏହା ସହ ଦାବି ପତ୍ର ରାଜ୍ୟପାଳ ଓ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ତୁରେକେଲା ବିଡ଼ିଓଙ୍କୁ ପ୍ରଦାନ କରିଛନ୍ତି ।