21-Dec-2021

ପ ଦ୍ମପୁର/ବିଜେପୁର:-ଚିହ୍ନା ନାହିଁ କି ଜଣା ନାହିଁ। ପରିଚିତ ନୁହଁନ୍ତି। ଜାତି ଗୋତ୍ରର ବିଚାର ନାହିଁ। ଆତ୍ମୀୟସ୍ବଜନଙ୍କ ଠାରୁ ହତାଦର ହୋଇ ନିଃସହାୟ ଭାବେ ମୃତ୍ୟୁବରଣ କରିଥିବା ତିନି ତିନି ଜଣ ବ୍ଯକ୍ତିଙ୍କୁ ଗୋଟିଏ ପରିବାରର ପିତାପୁତ୍ର, କନ୍ଯା, ପତ୍ନୀ ଶବକୁ ଚାରିକାନ୍ଧ ଦେଇ ମାନବିକତାର ନିଆରା ପରମ୍ପରା ସୃଷ୍ଟି କରିଛନ୍ତି। ମିଳିଥିବା ସୂଚନାନୁସାରେ ବରଗଡ଼ ଜିଲ୍ଲା ବିଜେପୁର ବ୍ଲକ ଅନ୍ତର୍ଗତ ସମଲାଇପଦର ନିକଟସ୍ଥ ପାର୍ବତୀ ଗିରି ଅନାଥା ବୃଦ୍ଧାଶ୍ରମରେ ରବିବାର ଓ ସୋମବାର ଦୁଇଦିନ ମଧ୍ଯରେ ତିନିଜଣ ନିଃସହାୟ ବୃଦ୍ଧବୃଦ୍ଧାଙ୍କର ମୃତ୍ୟୁ ହୋଇଥିଲା। ସେମାନେ ହେଲେ ବିଜେପୁର ବ୍ଲକ ଚାରପାଲି ପଞ୍ଚାୟତ ଅନ୍ତର୍ଗତ କର୍ଲେର ଶୁଭା ନାଗ(୮୧) ଏବଂ ଅତାବିରା ବ୍ଲକ କାଦୋବାହାଲ ପଞ୍ଚାୟତର ମୋତିଲାଲ ଗୁପ୍ତା (୭୨), ଛତିଶଗଡ଼ ରାଜ୍ଯର ଲକ୍ଷ୍ମୀବାଈ(୮୩) । ଦୀର୍ଘ ଦୁଇମାସରୁ ଉର୍ଦ୍ଧ୍ବ ଦିନ ହେଲା ସେମାନେ ବ୍ରୁଦ୍ଧାଶ୍ରମରେ ବାର୍ଦ୍ଧକ୍ୟ ଜନିତ ରୋଗରେ ପୀଡିତ ହୋଇ ଶଯ୍ୟାଶାୟୀ ଥିଲେ। ରବିବାର ଶୁଭା ନାଗ ଏବଂ ସୋମବାର ଅନ୍ୟ ଦୁଇଜଣଙ୍କର ମୃତ୍ୟୁ ହୋଇଥିଲା। ଫଳରେ ସାମାଜିକକର୍ମୀ ତଥା ବୃଦ୍ଧାଶ୍ରମର ସମ୍ପାଦକ ଜଳନ୍ଧର ପଟେଲ ସେମାନଙ୍କ ଶବ ସତ୍କାର କରିବାକୁ ଅଣ୍ଟା ଭିଡି଼ଥିଲେ । ସ୍ବାମୀଙ୍କର ଏତାଦୃଶ କାମକୁ ସଫଳ କରିବାକୁ ପତ୍ନୀ ଯଶୋବନ୍ତୀ ପତିଙ୍କ ପଦାଙ୍କ ଅନୁସରଣ କରିଥିବାବେଳେ କନ୍ଯା ସ୍ବାଗତିକା, ପୁତ୍ର ବିକାଶ ପିତାଙ୍କ ସହିତ ଶବକୁ ଚାରି କାନ୍ଧ ଦେଇଥିଲେ । ପରେ ଶବମାନଙ୍କୁ ସତ୍କାର କରାଯାଇଥିଲା । ଫୁଲୁ ପରିଡ଼ା, ଶିବ ବିଶି, ସୁବାଷ ପଧାନ, ପାଣ୍ଡବ ପଧାନ, ଉଷା ପୁରି, ଗୁପ ଭୁଏ, ନିରାକାର ବିଶ୍ବାଳ ପ୍ରମୁଖ ଶବ ସତ୍କାରରେ ସହଯୋଗ କରିଥିଲେ।