21-Dec-2021

ନର୍ଲା (ସଞ୍ଜିବ ଦାସ)କଳାହାଣ୍ଡି ଜିଲ୍ଲା ନର୍ଲାବ୍ଲକ ଅଞ୍ଚଳରେ କିଛିଦିନ ହେଲା ହାତୀ ଉପଦ୍ରବ ବଢିବାରେ ଲାଗିଛି ।  ଅଞ୍ଚଳର ଚାଷଜମି ମାନଙ୍କୁ ରାତିରେ ଆସି ବ୍ୟାପକ ଫସଲ ନଷ୍ଟ କରୁଥିବା ଜଣାପଡିଛି ।  ପ୍ରାୟ ୨୯ ଟି ହାତୀ (୨୫ଟି ବଡହାତୀ ଓ ୪ଟି ହାତୀଛୁଆ) ଭୀମକେଲା ଗ୍ରାମ ପଞ୍ଚାୟତ ଅଧିନ ବୁର୍ଡିପଡା ଓ ପଲସାପଡା ଦେଇ ରୁପ୍ରା ପଞ୍ଚାୟତ ଅଧିନ ତିତକେଲା ଅଞ୍ଚଳରେ ଆସି ସାନ୍ଦୁଲ୍ ନଦୀ ପାର୍ଶ୍ୱ ଜମିରେ ରହିଛନ୍ତି । ତିତକେଲା ଗ୍ରାମର ଲୋକେ ସକାଳେ ନିଜଜମିକୁ ଯାଇଥିବା ସମୟରେ ଉକ୍ତ ହାତୀପଲ ଥିବା ଦେଖିବାକୁ ପାଇ ଜଙ୍ଗଲ ବିଭାଗ କର୍ମଚାରୀଙ୍କୁ ଫୋନ୍ କରି ଜଣାଇଥିଲେ । ଜଙ୍ଗଲ ବିଭାଗ ଏହି ଖବର ପାଇବା ପରେ ରୁପ୍ରାରୋଡ୍ ସେକ୍ସନ୍ ଅଧିନ ବନରକ୍ଷୀ ତପନ ବେହେରା, ନିଗମ ସାହୁ, ଫକୀର ବିଶ୍ୱାଲ ଆସି ହାତୀର ଗତିବିଧି ଉପରେ ନଜର ରଖିଥିଲେ। ପରେ କେସିଙ୍ଗା ରେଞ୍ଜର ଦୀନବନ୍ଧୁ ମେହେର, ଡେପୁଟୀ ରେଞ୍ଜର ଯୁଧିଷ୍ଠିର ଜାଲ, କେସିଙ୍ଗା ଫରେଷ୍ଟର ଶ୍ରୀମୁଖ ମେହେର ପ୍ରମୁଖ ହାତୀ ଥିବା ଅଞ୍ଚଳରେ ପହଞ୍ଚିଥିଲେ । ହାତୀର ଗତିବିଧିକୁ ନୀରିକ୍ଷଣ କରିବାପରେ ସନ୍ଧ୍ୟା ହୋଇଯିବାରୁ ଜନସାଧାରଣ ସତର୍କ ରହିବାକୁ ଡେପୁଟି ରେଞ୍ଜର୍ ଶ୍ରୀ ଜାଲ୍ କହିଥିଲେ । ଉକ୍ତ ହାତୀପଲ ଦିନଯାକ ତିତକେଲାର ହରଡ ଚାଷଜମିରେ ରହିଥିବା ବେଳେ ପଲସାପଡା ଗ୍ରାମର ଅଶୋକ ନାଏକ, ଅରବିନ୍ଦ ସା, ବିନୋଦ ନାଏକ ଓ ତିତକେଲା ଗ୍ରାମରେ ବ୍ୟାପକ ହରଡ ଫସଲ ନଷ୍ଟ କରିଥିବା ଚାଷୀମାନେ ପ୍ରକାଶ କରିଛନ୍ତି । ଯେଉଁ ଚାଷୀ ମାନଙ୍କ ଫସଲ ନଷ୍ଟ ହୋଇଛି ସରକାରୀ ସହାୟତା ପାଇବା ନିମନ୍ତେ ଆବେଦନ କରିବାକୁ ଜଙ୍ଗଲ ବିଭାଗ ତରଫରୁ ଚାଷୀମାନଙ୍କୁ କୁହାଯାଇଛି। ସୂଚନା ଥାଉକି ଏହା ପୂର୍ବରୁ ଗତ ତା ୧୮/୯/୨୧ ରିଖରେ ୧୧ ଟିକିଆ ହାତୀପଲ ଉକ୍ତ ଅଞ୍ଚଳକୁ ଆସି ବ୍ୟାପକ ଫସଲ ନଷ୍ଟ କରିଥିଲେ । ବାରମ୍ୱାର ହାତୀପଲ ଚାଷଜମି ମୁହାଁ ହୋଇ ଚାଷ ନଷ୍ଟ କରୁଥିବାରୁ ଲୋକମାନେ ମଧ୍ୟ ଭୟ କରୁଛନ୍ତି ।