19-Dec-2021

ସିନ୍ଧେକେଲା, ବଙ୍ଗୋମୁଣ୍ଡା ବ୍ଲକ ରେ ମନରେଗା ଯୋଜନା ରେ ବ୍ୟାପକ ଦୁର୍ନୀତି ହୋଇଥିବା ନେଇ ଅଭିଯୋଗ ଆସୁଛି । ଠେମରା ପଞ୍ଚାୟତର ସରପଞ୍ଚଙ୍କ ସ୍ୱାମୀ ଜଣେ ଠିକାଦାରଙ୍କ ଠାରୁ ଟଙ୍କା ଲାଞ୍ଚ ନେବା ବେଳର ଭିଡ଼ିଓ ଭାଇରାଲ ହେବା ପରେ ବ୍ଲକ ପ୍ରଶାସନ ଗୁରୁତର ସହ ନେଇ ତଦନ୍ତ ଆରମ୍ଭ କରିଛି । ଡ଼ମି ଠିକାଦାର ଏବଂ ସରପଞ୍ଚଙ୍କ ସ୍ୱାମୀ ମିଳିମିଶି ଠିକାକାର୍ଯ୍ୟ କରିଥିବା ବେଳେ ଠିକାଦାର ଜଣକ ଟଙ୍କା ଦେବା ବେଳର ଭିଡ଼ିଓ ଭାଇରାଲ କରିଥିଲେ ।ଏହି ଭିଡ଼ିଓ ଭାଇରାଲ ହେବା ପରେ ଜିଲ୍ଲା ସାରା ଚର୍ଚ୍ଚାର ବିଷୟ ହୋଇଥିଲା । କଥା ଆଗକୁ ବଢୁଥିବା ଦେଖି ବ୍ଲକ ତରଫରୁ ବ୍ଲକର ଏକ ଟିମ ପହଁଚି ତଦନ୍ତ କରୁଥିବା ବେଳେ ଠେମରା ପଞ୍ଚାୟତରେ କାର୍ଯ୍ୟରତ କନିଷ୍ଠଯନ୍ତ୍ରୀ ଜୟ ନାରାୟଣ ବାଗ, ପିଇଓ ସତ୍ୟ ଘିଭେଲା, ଜିଆରଏସ ଡ଼ମ୍ବରୁ ତାଣ୍ଡିଙ୍କୁ ଉକ୍ତ ପଞ୍ଚାୟତରୁ ଅପସାରିତ କରାଯାଇଛି ।ତାଙ୍କ ବଦଳରେ କନିଷ୍ଠ ଯନ୍ତ୍ରୀ ମନୋରଞ୍ଜନ ସାହୁ,ପିଇଓ ସଂକୀର୍ତ୍ତନ ମାଝୀ, ଜିଆରଏସ ଦିନେଶ ଜାଲଙ୍କୁ ଦାୟିତ୍ୱ ଦିଆଯାଇଥିବା ତଦନ୍ତକାରୀ  ଅଫିସର ବ୍ଲକ ଆକାଉଣ୍ଟସ ଅଫିସର ଜ୍ୟୋତି ପ୍ରକାଶ ମିଶ୍ର ପ୍ରକାଶ କରିଛନ୍ତି । ପ୍ରକାଶ ଥାଉକି ଜିଲ୍ଲାରେ ଦାଦନ ପ୍ରବଣ ବ୍ଲକ ଭାବେ ବେଶ ପରିଚିତ। ଏଠାରେ ପେଟ ପାଇଁ ଦାନା ଟିକକ ଯୋଗାଡ କରିବା ପାଇଁ ଦାଦନ ଯାଆନ୍ତି ଲୋକେ । ଏହାକୁ ନଜରରେ ରଖି ସରକାର କୋଟି କୋଟି ଟଙ୍କା ଖର୍ଚ୍ଚ କରୁଛନ୍ତି ହେଲେ ଏହି ଟଙ୍କା ହଡପ କରିବା ପାଇଁ ଏହି ବ୍ଲକରେ ନେତା ଅଫିସର ସମସ୍ତେ ଏକଜୁଟ ହେଉଛନ୍ତି ଏ ମାନଙ୍କୁ ଲୁଟ କରିବା ପାଇଁ । ବଙ୍ଗୋମୁଣ୍ଡା ବ୍ଲକ ଠେମରା ପଞ୍ଚାୟତ ର ସରପଞ୍ଚ ଲିିଳାବତୀ ବାଗ ଙ୍କ ସ୍ବାମୀ ଲକ୍ଷ୍ମୀକାନ୍ତ ବାଗ ଲାଞ୍ଚ ନେଉଥିବା ଘଟଣାର ଭିଡିଓ ଭାଇରାଲ ହେବାପରେ ବ୍ଲକ ପ୍ରଶାସନ କେବଳ ତିନିଜଣ ଷ୍ଟାଫ କୁ ଅପସାରିତ କରି ବ୍ଲକ ପ୍ରଶାସନ ନିଜ ଆଡୁ ସଫା ଥିବା ଦେଖାଇଛି । କିନ୍ତୁ ଏତିକିରେ ବ୍ଲକ ପ୍ରଶାସନ କାମ ସାରି ଦଉଛି ନା ଅପସାରିତ କଲା ପରେ ଠିକ ଭାବରେ ମନରେଗା ଯୋଜନାରେ ହୋଇଥିବା ହରିଲୁଟ ର ପର୍ଦ୍ଦାଫାସ କରୁଛି ତାହା ଦେଖିବାକୁ ବାକି ରହିଲା ବୋଲି ମତପ୍ରକାଶ ପାଉଛି।