17-Dec-2021

ସିନ୍ଧେକେଲା, ବଲାଙ୍ଗୀର ଜିଲ୍ଲା ସିନ୍ଧେକେଲା ଥାନା ଅନ୍ତର୍ଗତ ଶୁଣ୍ଢିମୁଣ୍ଡା ପ୍ରାଥମିକ ବିଦ୍ୟାଳୟର ପରିତ୍ୟକ୍ତ କୋଠରୀ ଭିତରୁ ଜଣେ ଅଚିହ୍ନା ଯୁବତୀଙ୍କ ଗଳିତ ଶବ ଉଦ୍ଧାର ହେବାର ୬ ଦିନ ପରେ ଗୁରୁବାର ସିନ୍ଧେକେଲା ପୋଲିସ ଶବ ସଂସ୍କାର କରିଛି । ଘଟଣାନୁଯାଇ ଚଳିତ ମାସ ୯ ତାରିଖ ଦିନ ଶୁଣ୍ଢିମୁଣ୍ଡା ପ୍ରାଥମିକ ବିଦ୍ୟାଳୟର ପରିତ୍ୟକ୍ତ କୋଠରୀ ମଧ୍ୟରୁ ଦୁର୍ଗନ୍ଧ ହେଉଥିବାରୁ ସ୍ଥାନୀୟ ଲୋକେ ପୋଲିସ କୁ ଖବର କରିଥିଲେ। ପୋଲିସ ପହଞ୍ଚି ସ୍ଥିତି ଅନୁଧ୍ୟାନ କରିଥିଲେ ହେଁ ରାତି ହୋଇ ଯାଇଥିବାରୁ ୧୦ ତାରିଖ ଶବ ଜବତ କରିବାସହ ବ୍ୟବଛ୍ଛେଦ ପାଇଁ ଟିଟିଲାଗଡ ପଠାଇ ବ୍ୟବଛ୍ଛେଦ ପରେ ଶବ ଚିହ୍ନଟ ପାଇଁ ୭୨ ଘଣ୍ଟା ସଂରକ୍ଷିତ ରଖାହେବ ବୋଳି ପୋଲିସ ପକ୍ଷରୁ କୁହା ଯାଇଥିଲା। ତେବେ ଶବ କୁ ବଲାଙ୍ଗୀର ଭୀମଭୋଇ ମେଡିକାଲ କଲେଜ ର ମରଚ୍ୟୁରୀ ରେ ରଖା ଯାଇଥିଲା।

ହେଲେ ଆଜି ପର୍ଯ୍ୟନ୍ତ ଯୁବତୀଙ୍କ କୌଣସି ପରିଚୟ ନ ମିଳିବାରୁ ଆଜି ଗୁରୁବାର ବଲାଙ୍ଗୀର ମୁନସିପାଲଟି ସାହାଯ୍ଯ ରେ ବଲାଙ୍ଗୀର ଶ୍ମଶାନ ଘାଟରେ ଶବ ସତ୍କାର କରା ଯାଇଥିଲା। ସତ୍କାର ସମୟରେ ସିନ୍ଧେକେଲା ଥାନା ଏଏସଆଇ ସୁମନ ମଲ୍ଲିକ ଓ ହାବିଲଦାର ସୁରେନ୍ଦ୍ର ବେହେରା ଉପସ୍ଥିତ ଥିଲେ । ଗୁରୁତ୍ବପୂର୍ଣ୍ଣ କଥା ହେଉଛି ଏହି ଯୁବତୀ ଜଣକ କିଏ, କୋଉଠାରେ ତାଙ୍କ ହତ୍ୟା କରି ସ୍କୁଲ କୋଠାରେ ପକାଇ ଦିଆ ଯାଇଥିଲା ନା ସେହି ସ୍କୁଲ କୋଠରୀ ଭିତରେ ହିଁ ହତ୍ୟା କରା ଯାଇଥିଲା ଯୁବତୀଙ୍କ ବେକରେ ଥିବା ଗୋଲ୍ଡେନ କଲର ଚେନରେ ଇଂରାଜୀରେ ଲେଖାଥିବା ସୋନୁ କିଏ , ଏହି ସ୍କୁଲ ପର୍ଯ୍ୟନ୍ତ ଯୁବତୀ ଜଣକ ପହଞ୍ଚିଲେ କେମିତି    ଏମିତି ଅନେକ କିଛି ପ୍ରଶ୍ନର ଉତ୍ତର ମିଳି ପାରିଲାନି ଶେଷରେ ଶବଦାହ କରି ପୋଲିସ ନିଜ କାମ ଶେଷ କରିଛି।