16-Dec-2021

(ବଲାଙ୍ଗୀର) ରାଜ୍ୟରେ ୧୧ଟି ନୂଆ ସାଇବର ଥାନା ଓ ଅର୍ଥନୈତିକ ଅପରାଧ ଶାଖା ୟୁନିଟ୍‌ ଖୋଲିବ। ଆଜି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏନେଇ ସବୁଜ ସଂକେତ ଦେବା ସହ ଏଥିପାଇଁ ଆବଶ୍ୟକ ପଦପଦବି ପୂରଣ ପାଇଁ ମଞ୍ଜୁରି ଦେଇଛନ୍ତି। ପୂର୍ବରୁ ସମ୍ବଲପରୁ, ବ୍ରହ୍ମପୁର ଓ ରାଉରକେଲାରେ ୩ଟି ସାଇବର ଥାନା ଥିଲା। ଏହି ୧୧ ନୂଆ ଥାନା ପ୍ରତିଷ୍ଠା ହେବା ପରେ ରାଜ୍ୟରେ ୧୪ଟି ସାଇବର ଥାନା କାର୍ଯ୍ୟ କରିବ। ସାଇବର ଅପରାଧ ଉଦ୍‌ବେଗଜନକ ଭାବେ ଦିନକୁ ଦିନ ବଢ଼ୁଥିବା ବେଳେ ରାଜ୍ୟର ଏହି ୧୪ ଥାନାକୁ ନେଇ ରାଜ୍ୟବାସୀଙ୍କ ଭିତରେ ଆଶା ସୃଷ୍ଟି ହୋଇଛି। ସୂଚନାନୁସାରେ ନୂତନ ଥାନା ଖୋଲାଯିବାକୁ ଥିବା ଜିଲ୍ଲାଗୁଡ଼ିକ ହେଲା କଟକ, ଭୁବନେଶ୍ବର, କେନ୍ଦୁଝର, ଅନୁଗୁଳ, ବାଲେଶ୍ବର, ମୟୂରଭଂଜ, ପୁରୀ, କୋରାପୁଟ, ଭବାନୀପାଟଣା, ବଲାଙ୍ଗୀର ଓ କନ୍ଧମାଳ। ଏହି ନୂଆ ଥାନାଗୁଡ଼ିକ ପୂର୍ବରୁ କାର୍ଯ୍ୟ କରୁଥିବା ତିନି ସାଇବର ଥାନା ଓ ଅର୍ଥନୈତିକ ଅପରାଧ ଶାଖା ସହ ମିଶିବ। ଏହି ସମସ୍ତ ଥାନାଗୁଡ଼ିକରେ ନିଯୁକ୍ତି ପାଇଁ ପୁଲିସ ବିଭାଗରେ ୧୫୪ଟି ପଦବି ସୃଷ୍ଟି କରାଯାଇଛି। ୧୪ ଇନ୍‌ସ୍ପେକ୍ଟର, ୨୮ ସବ୍ଇନ୍‌ସ୍ପେକ୍ଟର, ୨୮ ଏଏସ୍ଆଇ (ଯୋଗାଯୋଗ), ୨୮ କନେଷ୍ଟବଳ (ଯୋଗାଯୋଗ) ଓ ୫୬ କନେଷ୍ଟବଳ ପଦବି ଏହି ୧୫୪ ପଦବିର ଅନ୍ତର୍ଭୁକ୍ତ। ୯୦ ଜଣ ବିଶେଷଜ୍ଞଙ୍କୁ ମଧ୍ୟ ନିଯୁକ୍ତି ମିଳିବ। ଫାଇନାନ୍ସ ଓ ଆକାଉଣ୍ଟସ୍ ଆନାଲିସିଷ୍ଟ, ଆଇଟି ବିଶେଷଜ୍ଞ ଓ ସାଇବର ଫୋରେନସିକ୍ ବିଶେଷଜ୍ଞଙ୍କୁ ଏହି ଥାନାମାନଙ୍କରେ ନିୟୋଜିତ କରାଯିବ। ସାଇବର ଅପରାଧ ସମେତ ଆର୍ଥିକ ଅପରାଧ ରୋକିବାରେ ଏହି ଥାନାଗୁଡ଼ିକ ସହାୟକ ହେବା ସହିତ ଲୋକଙ୍କୁ ଶୀଘ୍ର ନ୍ୟାୟ ଦେବା ଦିଗରେ ଫଳପ୍ରଦ ହେବ ବୋଲି ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ ଆଶା ପ୍ରକାଶ କରିଛନ୍ତି। ଡିଜିପି ଅଭୟ ମୁଖ୍ୟମନ୍ତ୍ରୀଙ୍କ ଏହି ଘୋଷଣାକୁ ସ୍ବାଗତ ଜଣାଇବା ସହ କୃତଜ୍ଞତା ଜଣାଇଛନ୍ତି। ଏହି ଥାନାଗୁଡ଼ିକ ଜଟିଳ ସାଇବର ଅପରାଧ ମାମଲାର ତଦନ୍ତ କରିବେ। ଏହା ଫଳରେ ଜନସାଧରଣ ଉପକୃତ ହୋଇପାରିବେ ବୋଲି ଡିଜିପି ଅଭୟ ପ୍ରେସ୍ ବିବୃତ୍ତିରେ ସୂଚନା ଦେଇଛନ୍ତି। ଉଲ୍ଲେଖଯୋଗ୍ୟ, ୨୦୧୮ରେ ରାଜ୍ୟରେ ୮୬୭ ସାଇବର ଠକେଇ ମାମଲା ରୁଜୁ ହୋଇଥିବା ବେଳେ ୨୦୧୯ରେ ୧୪୭୫ଟି ଏବଂ ୨୦୨୦ରେ ୧୯୩୧ଟି ମାମଲା ରୁଜୁ ହୋଇଛି।
 ଓଡ଼ିଶାରେ ସାଇବର ଅପରାଧ ଉଦ୍‌ବେଗଜନକ ଭାବେ ବୃଦ୍ଧି ପାଉଛି। ପ୍ରତିଦିନ କେହି ନା କେହି ସାଇବର ଠକଙ୍କ ଜାଲରେ ଫସୁଛି। କେବଳ ସାଧାରଣ ଲୋକ ନୁହଁନ୍ତି, ସାଇବର ଅପରାଧୀମାନେ ମନ୍ତ୍ରୀ, ନେତା ଓ ପ୍ରଶାସନିକ ଅଧିକାରୀମାନଙ୍କ ୱେବ୍‌ସାଇଟ୍‌ ହ୍ୟାକ୍‌ କରି ବିଭିନ୍ନ ସଂଗିନ୍ ଅପରାଧ ଘଟାଉଛନ୍ତି। ତେଣୁ ଅପରାଧର ମାତ୍ରାକୁ ଦେଖି ଅଧିକ ସାଇବର ଥାନା ଓ ବିଶେଷଜ୍ଞଙ୍କ ଆବଶ୍ୟକ ଥିଲା। ତେଣୁ ମୁଖ୍ୟମନ୍ତ୍ରୀଙ୍କ ଏହି ଘୋଷଣା ରାଜ୍ୟରୁ ସାଇବର ଅପରାଧକୁ ନିୟନ୍ତ୍ରଣ କରିବ ବୋଲି ସାଧାରଣରେ ଆଶ୍ବସ୍ତି ପ୍ରକାଶ ପାଇଛି।(ବଲାଙ୍ଗୀର ଜିଲ୍ଲାରୁ ଅନ୍ତର୍ଯ୍ୟାମୀ ସାହୁଙ୍କ ରିପୋର୍ଟ)