16-Dec-2021

ପାଟଣାଗଡ଼: ବଲାଙ୍ଗିର ଜିଲ୍ଲା ବେଲପଡା ବ୍ଲକ ଅନ୍ତର୍ଗତ ଗମ୍ଭାରୀ ଗ୍ରାମର ଅବସରପ୍ରାପ୍ତ ବିଶିଷ୍ଟ ଶିକ୍ଷକ  ଗ୍ରାମ୍ୟ କବିରତ୍ନ,ଗ୍ରାମ୍ୟ ଶିରୋମଣୀ, କବି ସାରଥୀ ଚୂଡ଼ାମଣି ପାଣିଗ୍ରାହୀଙ୍କ ମଙ୍ଗଳବାର ରାତ୍ର ଘଣ୍ଟା  ୧୧.୪୫ ରେ  ଅକାଳ ବିୟୋଗ ହୋଇ ଯାଇଛି  l  ମୃତ୍ୟୁ ବେଳକୁ ତାଙ୍କୁ ୭୫ ହୋଇଥିଲା । ଶ୍ରୀ ପାଣିଗ୍ରାହୀ ଜଣେ ପ୍ରକୃତି ପ୍ରେମୀ, ପରୋପକାରୀ, ଦରଦୀ ମଣିଷ, ପଶୁ ପ୍ରେମୀ, ମେଳାପୀ ଓ ଭଦ୍ର ବ୍ୟକ୍ତି ଥିଲେ l ସେ   ଦୀର୍ଘ ଦିନରୁ ହୃଦଘାତ ରୋଗରେ ଆକ୍ରାନ୍ତ ଥିବାବେଳେ  ଜୀବନ ଓ ମୃତ୍ୟୁ ର ସଂଗ୍ରାମ ରେ ହାରି ଯାଇଛନ୍ତି  l  ସ୍ଵର୍ଗତ ପାଣିଗ୍ରାହୀ ତାଙ୍କ ସ୍ବରଚିତ

କବିତା ପାଇଁ ରାଜ୍ୟସ୍ତରୀୟ ପୁରସ୍କାର ପାଇଥିଲେ । ତାଙ୍କ ପଛରେ ବଡ଼ ପୁଅ ଦୁର୍ଗା ପ୍ରସାଦ ପାଣିଗ୍ରାହୀ ଓ ସ୍ତ୍ରୀ କବିତା ପାଣିଗ୍ରାହୀ, ମଝିଆ ପୁଅ ରାମ ରଞ୍ଜନ ପାଣିଗ୍ରାହୀ (ନୀଳ) ତାଙ୍କ ସ୍ତ୍ରୀ ବୈଜୟନ୍ତି ପାଣିଗ୍ରାହୀ ଓ ସାନ ପୁଅ ଶ୍ରୀୟା ବଲ୍ଲଭ ପାଣିଗ୍ରାହୀ ଏବଂ ତାଙ୍କର ଦୁଇ ନାତୁଣୀ ଅଙ୍କିତା ପାଣିଗ୍ରାହୀ ଓ ଅର୍ପିତା ପାଣିଗ୍ରାହୀ ଙ୍କୁ ଛାଡି ଚାଲିଯାଇଛନ୍ତି ।  ତାଙ୍କ ଦେହାନ୍ତ ହେବାର ଖବର ପାଇ ଆଖପାଖ ଅଞ୍ଚଳରେ ଶୋକ ର ଛାୟା ଖେଳିଯାଇଛି । ତାଙ୍କର ଶେଷ ଦର୍ଶନ ପାଇଁ ଅଞ୍ଚଳର ବିଶିଷ୍ଟ ବ୍ୟକ୍ତି ବିଶେଷ ତଥା ପ୍ରିୟ ବନ୍ଧୁ ତାଙ୍କର ବାସଭବନ ଆସିଥିଲେ । ଗାଁ ଶ୍ମଶାନରେ ତାଙ୍କ ଶେଷକୃତ୍ୟ ସମ୍ପନ୍ନ କରାଯାଇଥିଲା । ତାଙ୍କର ବଡ଼ ପୁଅ ଦୂର୍ଗା ପ୍ରସାଦ ପାଣିଗ୍ରାହୀ ମୁଖାଗ୍ନି ଦେଇଥିଲେ । ଶ୍ରୀ ପାଣିଗ୍ରାହୀଙ୍କ ଅକାଳ ବିୟୋଗରେ ପୁର୍ବତନ ମନ୍ତ୍ରୀ ତଥା ପାଟଣାଗଡ଼ ମହାରାଜା କନକବର୍ଦ୍ଧନ ସିଂହଦେଓ , ବଲାଙ୍ଗୀର ସାଂସଦ ସଂଗୀତା କୁମାରୀ ସିଂଦେଓ , ପାଟଣାଗଡ଼ ବ୍ଳକ ଅଧ୍ୟକ୍ଷ ଭକ୍ତ ବନ୍ଧୁ ନାଏକ ପ୍ରମୁଖ ଶୋକ ପ୍ରକାଶ କରିବା ସହ ପରିବାର ବର୍ଗଙ୍କୁ ସମବେଦନା ଜଣାଇଛନ୍ତି ।