10-Dec-2021

ବୀରମହାରାଜପୁର,ମୁର୍ଷୁଣ୍ଢି(ଆର୍ତ୍ତତ୍ରାଣ ଖୁର୍ଡିଆ) ସୋନପୁର ଜିଲ୍ଲା ବୀରମହାରାଜପୁର ଉପଖଣ୍ତ ଅନ୍ତର୍ଗତ କେନଝରିଆପାଲି ଠାରେ ଗତକାଲି ତୃତୀୟ ଗୁରୁବାର ସଂନ୍ଧ୍ଯାରେ ଉତ୍ସାହ ଓ ଉଦ୍ଦିପନାର ସହ କୈଲାସୀ ଯାତ୍ରାର ଅନ୍ତିମ ପର୍ବ କିଷ୍ଟାଇ ଯାତ୍ରା ସମ୍ପନ୍ନ ହୋଇଯାଇଛି।ସଂଧ୍ଯା ସମୟରେ କୈଲାସୀ ମନ୍ଦିରରୁ(କୁଠି) ପଞ୍ଚବାଦ୍ଯର ତାଳେ ତାଳେ ହରିବୋଲ,ହୁଳହୁଳି,ଘଣ୍ଟ,ଶଙ୍ଖର ଧ୍ୱନି ମଧ୍ଯରେ ବରୁଆଙ୍କ ଶରୀରରେ ଦେବୀ ପ୍ରବେଶ କରିଥିଲେ।ମନ୍ଦାର ମାଳ ଓ ଡହନା ସୁଗନ୍ଧରେ ଚାରି ଦିଗ ମହକି ଉଠୁଥିବା ବେଳେ ଚତି,ଛତ୍ର,ଆୟୁଟ,ଚାମର ଯାତ୍ରାର ଶୋଭା ବର୍ଦ୍ଧନ କରୁଥିଲା।ବହୁ ଦିନରୁ ଏହି ପର୍ବ ପାଳିତ ହେଉଥିବା ବେଳେ ଏହାକୁ

ଦେବୀଙ୍କ ଶଶ୍ୱୁର ଘର ବାହୁଡା ଯାତ୍ରା କୁହାଯାଏ।ଧୁନକେଲ ବାଦ୍ୟର ତାଳେ ତାଳେ ବରୁଆ ମାନେ ଝିଅ ବିଦାୟ ଭଳି ବାହୁନି ବାହୁନି କାନ୍ଦି ଗୀତ ଗାଈ ନାଚିଥିଲେ।ସାଂକେତିକ ଭାବରେ ଛୋଟ ଛୋଟ ଭୁଗା ଟୁପା ମାନଙ୍କରେ ଲିଆ, ହୁରୁମ ଓ ଅନ୍ୟାନ୍ୟ ଆୟୋ ଅଳଙ୍କାର ସହ ଭାରୁଆ ମାନେ ତାଙ୍କ ପଛେ ପଛେ ଚାଲିଥିଲେ l ଗାଁର ସ୍ତ୍ରୀ ଲୋକମାନେ ତାଙ୍କୁ ସ୍ୱାନ୍ତନା ଦେଇ ପୂଜାକରି ଧୂପ ଦୀପ  ପ୍ରଦାନ କରି ଭକ୍ତି ଅର୍ଘ୍ଯ ଅର୍ପଣ କରିଥିଲେ।ଗ୍ରାମ ପରିକ୍ରମା କଲାବେଳେ ମହିଳା ଓ ପୁରୁଷ ତଥା ଭକ୍ତମାନେ ମିଳିମିଶି ଦେହୁରୀ ଘରକୁ ଯାଇ ତାଙ୍କୁ  ବିଦାୟ  ଦେଇଥିଲେ l ମଧ୍ୟ ରାତ୍ରିରେ ଦେବୀଙ୍କର ନିଶା ପୂଜା ହୋଇ ପଶୁ ବଳି ଦିଆଯାଏ ଓ କନ୍ୟା ଯାତ୍ରୀ ଭକ୍ତମାନେ ତାହାର ପ୍ରସାଦ ସେବନ କରିବାର ରୀତି ମଧ୍ୟ ପ୍ରଚଳିତ ରହିଛି।ଆଞ୍ଚଳିକ ଭାଷାରେ ଲୌକିକ ମତରେ ଏହାକୁ କିଷ୍ଟାଇ ବଟା ପର୍ବ ବୋଲି କୁହାଯାଏ।