08-Nov-2020

ତିର୍ତ୍ତୋଲ:(ଦୀପକ କୁମାର ଷଡଙ୍ଗୀ ଙ୍କ ରିପୋର୍ଟ) ଉପ ନିର୍ବାଚନରେ ଏକ ରାଜନୈତିକ ଦଳକୁ ସମର୍ଥନ ନକରିବା ଘଟଣାକୁ ନେଇ ସେହି ଦଳର ୮ଜଣ କର୍ମୀ କନକପୁର ବଜାରରେ ଧମକଚମକ ଦେବା ସହ ଭଙ୍ଗାରୁଜା ଓ ଟଙ୍କା ଲୁଟ କରିବା ଘଟଣା ସେମାନଙ୍କ ପାଇଁ ମହଙ୍ଗା ସାବ୍ୟସ୍ଥ ହୋଇଛି। ଥାନାରେ ମାମଲା ରୁଜୁ ପରେ ଅଭିଯୁକ୍ତ ମାନେ ଫେରାର ହୋଇଯାଇଛନ୍ତି। ଏହି ଘଟଣା ସଂପୃକ୍ତ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି। ଘଟଣାଟି ତିର୍ତ୍ତୋଲ ଥାନା ଅଧିନ ଝଙ୍କଡ ଶାରଳା ମନ୍ଦିର ସମ୍ମୁଖ ବଜାରରେ ଥିବା ଦାସ ଫାର୍ମାସିଟ୍ୟୁକାଲ ଔଷଧ ଦୋକାନରେ ଘଟିଛି। ଦୋକାନର ମାଲିକ ବିପିନ ବିହାରୀ ଦାସଙ୍କ ଅଭିଯୋଗରୁ ଜଣାଯାଏ କନକପୁର ପଞ୍ଚାୟତ ଅଞ୍ଚଳର ଉକ୍ତ ଅଭିଯୁକ୍ତ ମାନେ ତାଙ୍କ ଦୋକାନକୁ ଆସି ଦାଦାବଟି ମାଗିଥିଲେ। ଏହାପରେ ସେମାନଙ୍କ ସହ ଯୁକ୍ତିତର୍କ ହୋଇଥିଲା। ଅଭିଯୁକ୍ତ ମାନେ ତାଙ୍କ ଦୋକାନ ସୋକେଶ ଭଙ୍ଗାରୁଜା କରିବା ସହ ଡ୍ରରୁ ନଗଦ ୮୨ ହଜାର ସହ ତାଙ୍କ ସୁନାଚେନ ଲୁଟିନେଇ ପଳାଇଥିଲେ। ଏମାନଙ୍କ ମଧ୍ୟରୁ ଜଣେ ତାଙ୍କ ମୁଣ୍ଢରେ ବନ୍ଧୁକ ଲଗାଇ ସୁନାଚେନ ନେଇଯିବା ସହ ଅନ୍ୟମାନେ ଦୋକାନରେ ଭଙ୍ଗାରୁଜା କରିଥିଲେ। ତିର୍ତ୍ତୋଲ ଥାନାର ଜଣେ ଏସ.ଆଇଙ୍କ ସହ ଅନ୍ୟ ପୋଲିସଙ୍କ ଉପସ୍ଥିତିରେ ଏହି ଘଟଣା ଘଟିଥିଲେ ବି ପୋଲିସ ନିରବ ଦ୍ରଷ୍ଟା ସାଜିଥିଲା। ଖବରପାଇ ଥାନା ଆଇଆଇସି କୃଷ୍ଣ ପ୍ରସାଦ ମିଶ୍ ଘଟଣା ସ୍ଥଳକୁ ଯାଇ ଘଟଣାର ତଦନ୍ତ କରିଥିଲେ। ଘଟଣା ସମ୍ପର୍କରେ ତଦନ୍ତକାରୀ ଅଧିକାରୀ ଦୁଖିଶ୍ୟାମ ସେଠୀଙ୍କୁ ପଚାରିବାରୁ ଏହି ଘଟଣାରେ ଏକ କେଶ ରୁଜୁ ହୋଇଛି। ତଦନ୍ତ ସହ ଅଭିଯୁକ୍ତ ମାନଙ୍କୁ ଗିରଫ ପାଇଁ ଉଦ୍ୟମ ହେଉଥିବା ସେ ସୂଚନା ଦେଇଛନ୍ତି। ଥାନାରେ ୩୯୫/୨୦ରେ ଏକ କେଶ ରୁଜୁ ହୋଇଛି। ଅଭିଯୁକ୍ତ ମାନେ ଏକ ନିର୍ଦ୍ଧିଷ୍ଟ ରାଜନୈତିକ ଦଳର ଓ ସଂପୃକ୍ତ ପଞ୍ଚାୟତର ଅଧିବାସୀ ବୋଲି ଜଣାପଡିଛି।