30-Nov-2021

ବଲାଙ୍ଗିର (ପୁର୍ଣ୍ଣ ଶଶୀ ଶେଖର ରାଓ)  ବଲାଙ୍ଗୀର ଜିଲ୍ଲାର କଣ୍ଟାବାଞ୍ଜି ଏକ ପଛୁଆ ବିଧାନସଭା ନିର୍ବାଚନ ମଣ୍ଡଳୀ ହୋଇଥିବା ବେଳେ  ବହୁ ଅସୁବିଧାରେ  ଜନସାଧାରଣ ରହୁଛନ୍ତି I ସରକାର ଦୁଆରରେ ଯେତେ ଗୁହାରି କଲେ ବି କୌଣସି ସୁଫଳ ଫଳୁ ନଥିବାରୁ ଆଜି ଅଞ୍ଚଳର ଗରିବ ସୀମାରେଖା ତଳେ ଥିବା ଲୋକମାନେ ସିପିଆଇ ସାହାଯ୍ୟରେ ସ୍ଥାନୀୟ ସାପ୍ତାହିକ ବଜାର ଠାରୁ ଏକ ରାଲିରେ ବାହାରି ତହସିଲଦାରଙ୍କ କାର୍ଯ୍ୟାଳୟ ନିକଟରେ ପହଞ୍ଚି ବିକ୍ଷୋଭ ପ୍ରଦର୍ଶନ କରିଥିଲେ I ରାଲିରେ ଆଖ ପାଖ ଅଞ୍ଚଳର ଗରିବ ଶ୍ରେଣୀର ଶତାଧିକ ମହିଳା ପୁରୁଷ ସାମିଲ ହୋଇଥିଲେ।ଏମାନଙ୍କର ମୁଖ୍ୟ ଦାବି ଜମି ପଟ୍ଟା ପ୍ରଦାନ କରିବା ପାଇଁ ରହିଥିଲା ।ସିପିଆଇର ରାଜ୍ୟ ସମ୍ପାଦକ ଆଶିଷ କାନୁନ୍ଗୋ ସାମିଲ ହୋଇ ସହଯୋଗ କରିଥିଲେ। କିନ୍ତୁ ମାସେକ ଆଗରୁ ତହସିଲଦାର ବଦଲି ହୋଇଯାଇଛି ଓ ତହସିଲଦାର ଦାୟିତ୍ବରେ ଥିବା ଆଡିସିନାଲ ତହସିଲଦାର ଯୋଗେଶ୍ଵର ଧରୁଆ ମଧ୍ଯ କୁଆଡେ ଚମ୍ପଟ ମାରିଥିଲେ ତେଣୁକରି ବଡ଼ ବାବୁଙ୍କୁ ଦାବି ପତ୍ର ପ୍ରଦାନ କରାଯାଇଥିଲା। ବଡ ବାବୁ ପ୍ରତିଶୃତି ଦେଇଛନ୍ତି ଯେ ତହସିଲଦାର ଆସିଲେ ତାଙ୍କ ସହ ଆଲୋଚନା କରିବେ ଏବଂ ଏହି ବିଷୟରେ ଜଣାଇବେ ବୋଲି କହିଛନ୍ତି। ଉକ୍ତ କାର୍ଯ୍ୟକ୍ରମରେ ଗୋପାଳ ଭୋଇ ଖଗସା ଶାଖା ସମ୍ପାଦକ, ଉତ୍ତମ ମଲ୍ଲିକ,ପାଣ୍ଡବ ଭୋଇ,କମଳ ଲୋଚନ ଭୋଇଙ୍କ  ସହ ଶତାଧିକ ମହିଳା ଓ ପୁରୁଷ  ସାମିଲ ରହିଥିବା ଜଣାପଡିଛି।