14-Nov-2021

ବଲାଙ୍ଗୀର(ପ୍ରେରଣା ଖବର): କବି ଓ କବିତା  କୌଣସି ସୀମା ସରହଦ୍  ଭିତରେ ଆବଦ୍ଧ ନୁହେଁ ।ମୁକ୍ତ  ଭାବ ଓ ମୁକ୍ତ  ଚେତନାରେ ସେ ସବୁବେଳେ ସମୟକୁ ନୂଆ ବାଟରେ ପରିଚାଳନା କରିଛି । କବିତା ଓ କବି ର ଭାବରାଜ୍ୟରେ  ସବୁବେଳେ ନବ ଭାବ ସମାଜ ପାଇଁ  ଗୁରୁତ୍ୱପୂର୍ଣ୍ଣ ବୋଲି ଆଜି କବି ଶୁଭ୍ରାଂଶୁ ଶେଖର ପଣ୍ଡା ଙ୍କ ପ୍ରଥମ କବିତା ସଂକଳନ  ବାଇଶିପାହାଚ ର ଲୋକାର୍ପଣ ସମାରୋହ ଅବସରରେ  ମତ ପ୍ରକାଶ ପାଇଛି ।  କବି ଶୁଭ୍ରାଂଶୁ ଶେଖର ପଣ୍ଡାଙ୍କ ପ୍ରଥମ କବିତା ସଂକଳନ ‘ବାଇଶି ପାହାଚ’ ସ୍ଥାନୀୟ ସାମ୍ବାଦିକ ଭବନରେ ଉନ୍ମୋଚିତ ହୋଇଯାଇଛି । ବରେଣ୍ୟ ଅତିଥି ଭାବେ

ଓଡ଼ିଶା ସାହିତ୍ୟ ଏକାଡେମୀର ସଦସ୍ୟା ଡାକ୍ତର ଜ୍ୟୋତିର୍ମୟୀ ସାହୁ, ‘ରଚନା’ର ସଭାପତି ସନାତନ ଠାକୁର ଓ କବି ଭାଗୀରଥି ମିଶ୍ର ଯୋଗଦାନ କରିଥିବା ବେଳେ ସ୍ରୋତସ୍ୱତୀ ପ୍ରକାଶନୀ ତରଫରୁ  ସଂଦୀପ କୁଅଁର  ସଭାପତିତ୍ବ କରିଥିଲେ । ସ୍ରୋତସ୍ୱତୀ ପ୍ରକାଶନୀ ପକ୍ଷରୁ ପ୍ରକାଶିତ ଏହି କବିତା ସଂକଳନର କବି ଶ୍ରୀ ପଣ୍ଡାଙ୍କ ସହ ଅତିଥିମାନେ କବିତା ସଂକଳନକୁ ଉନ୍ମୋଚିତ କରିବା ପରେ   କବି ଶୁଭ୍ରାଂଶୁ   କବିତା ସଂକଳନ ର ପ୍ରଥମ ଖଣ୍ଡକୁ ନିଜ ଧର୍ମପତ୍ନୀ ରଜତମଂଜରୀ ଯୋଷୀଙ୍କ ହାତରେ ସମର୍ପଣ କରି ନିଜର   କାବ୍ୟିକ ଚିନ୍ତନ ସଂପର୍କରେ ଆଲୋକପାତ କରିଥିଲେ । କବି ଜ୍ୟୋତିରଂଜନ ମିଶ୍ର  ଅତିଥି ପରିଚୟ ପ୍ରଦାନ କରିଥିବା ବେଳେ ରତ୍ନମୟ ତ୍ରିପାଠୀ  ଧନ୍ୟବାଦ ଅର୍ପଣ କରିଥିଲେ ।ସଭା ପରିଚାଳନା ରେ ମଧୁସୂଦନ ନେଗୀ, ନିରୋଜ କୁମାର ମିଶ୍ର  ସହଯୋଗ କରିଥିବା ବେଳେ ସହରର ବହୁ କବି, ସାହିତ୍ୟିକ, ବୁଦ୍ଧିଜୀବୀ, ସାମ୍ବାଦିକମାନେ ଯୋଗଦାନ କରିଥିଲେ ।