02-Nov-2020

ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଦ୍ୱାରା କରାଯାଇଥିବା ନିର୍ବାଚନ ର‌୍ୟାଲି ଯୋଗୁ ସେଠାରେ ୩୦,୦୦୦ ଲୋକ କରୋନା ଦ୍ୱାରା ସଂକ୍ରମିତ ହୋଇଥିଲାବେଳେ ୭୦୦ ଲୋକ ପ୍ରାଣ ହରାଇଥିବାର ଆକଳନ କରାଯାଇଛି । ଷ୍ଟାନଫୋର୍ଡ ବିଶ୍ୱବିଦ୍ୟାଳୟର ଅର୍ଥନୀତି ବିଭାଗର ଜଣେ ପ୍ରଫେସରଙ୍କ ଦ୍ୱାରା କରାଯାଇଥିବା ଏକ ଅଧ୍ୟୟନରୁ ଏହା ଜଣାପଡିଛି । ତେବେ ପ୍ରତ୍ୟେକ ସଂକ୍ରମିତ ବ୍ୟକ୍ତିଙ୍କର କଣ୍ଟାକ୍ଟ ଟ୍ରେସିଂ କରି ଏହି ଆକଳନ କରାଯାଇନାହିଁ । ବରଂ ର‌୍ୟାଲି କରାଯାଇଥିବା ସ୍ଥାନରେ ସଂକ୍ରମଣର ମାତ୍ରାକୁ ଅନ୍ୟ ସ୍ଥାନଗୁଡିକର ସଂକ୍ରମଣ ମାତ୍ରା ସହ ତୁଳନା କରି ଏହି ସିଦ୍ଧାନ୍ତ ବାହାର କରାଯାଇଛି । ଟ୍ରମ୍ପ ଜୁନ୍‌ରୁ ସେପ୍ଟେମ୍ବର ଭିତରେ ପ୍ରାୟ ୧୮ଟି ର‌୍ୟାଲିରେ ଯୋଗ ଦେଇଥିଲେ । ସେଥିମଧ୍ୟରୁ ପ୍ରଥମ ତିନୋଟି ର‌୍ୟାଲି ଇନଡୋର ହଲରେ ହୋଇଥିଲା ଏବଂ ବାକି ସବୁ ଖୋଲା ସ୍ଥାନରେ ଆୟୋଜନ କରାଯାଇଥିଲା!! ଯେଉଁ ସ୍ଥାନଗୁଡିକରେ ର‌୍ୟାଲି ହୋଇଥିଲା, ସେଠାରେ ର‌୍ୟାଲି ପୂର୍ବରୁ ଏବଂ ପରେ ଦୈନିକ ସଂକ୍ରମିତଙ୍କ ସଂଖ୍ୟା ଆକଳନ କରାଯାଇଥିଲା । ତାହାକୁ ପ୍ରାୟ ସମାନ ଜନସଂଖ୍ୟା ଓ ସଂକ୍ରମଣର ମାତ୍ରା ଥିବା ଅନ୍ୟ କିଛି ସ୍ଥାନ ସହିତ ତୁଳନା କରାଯାଇଥିଲା । ଏଥିରୁ ଜଣାପଡିଥିଲା କି ଟ୍ରମ୍ପଙ୍କ ର‌୍ୟାଲି ପରେ ସେସବୁ ସ୍ଥାନରେ ପ୍ରତି ଲକ୍ଷେ ଲୋକରେ ଆକ୍ରାନ୍ତଙ୍କ ସଂଖ୍ୟା ୨୫୦ ବୃଦ୍ଧି ପାଇଥିଲା । ତେଣୁ ମୋଟାମୋଟି ଭାବେ ଟ୍ରମ୍ପଙ୍କ ୧୮ଟି ର‌୍ୟାଲି ଯୋଗୁ ୩୦,୦୦୦ ଲୋକ ସଂକ୍ରମିତ ହୋଇଥିଲେ!! ନଭେମ୍ବର ୩ରେ ଆମେରିକାର ରାଷ୍ଟ୍ରପତି ନିର୍ବାଚନ ଥିବାରୁ ତା’ ପୂର୍ବରୁ ଏଭଳି ରିପୋର୍ଟ ଆସିଥିବାରୁ ଡେମୋକ୍ରାଟମାନେ ଟ୍ରମ୍ପଙ୍କୁ ଆହୁରି କଡା ସମାଲୋଚନା କରିବେ ବୋଲି ମନେ କରାଯାଉଛି । ତେବେ ଅନେକ ସ୍ୱାସ୍ଥ୍ୟ ଅଧିକାରୀ ଏହି ରିପୋର୍ଟକୁ ଅସ୍ୱୀକାର କରିଛନ୍ତି । କୌଣସି ସ୍ଥାନରେ ସଂକ୍ରମଣର ମାତ୍ରାକୁ ଏଭଳି ର‌୍ୟାଲି ସହିତ ଯୋଡ଼ିବା ଠିକ୍‌ ନୁହେଁ ବୋଲି ସେମାନେ ମତ ଦେଇଛନ୍ତି । ହ୍ୱାଇଟହାଉସର ପ୍ରବକ୍ତା ବି ଏହି ରିପୋର୍ଟକୁ ରାଜନୈତିକ ଉଦ୍ଦେଶ୍ୟ ପ୍ରଣୋଦିତ ବୋଲି ଆଖ୍ୟା ଦେଇଛନ୍ତି!!