04-Aug-2021

ଲୋଇସିଂହା/ଆଗଲପୁର, (ବିନୋଦ କୁମାର ଦୀପ): ଆଜି ଲୋଇସିଂହା ବ୍ଲକ ସମ୍ମୁଖରେ ବିଜେପି ପକ୍ଷରୁ ରାଜ୍ଯ ସରକାରଙ୍କ ବିରୁଦ୍ଧରେ ଆନ୍ଦୋଳନ ଡାକରା ଦିଆଯାଇଛି l ଓଡିଶା ଷ୍ଟାଫ ସିଲେକ୍ସନ କମିଶନର ଚାକରି ବିକ୍ରି ପ୍ରତିବାଦରେ ରାଜ୍ୟ ଯୁବମୋର୍ଚ୍ଚା ସ୍ୱତନ୍ତ୍ର ନିମନ୍ତ୍ରିତ ସଦସ୍ୟ ରାଜୁ ସାହୁଙ୍କ ନେତୃତ୍ୱରେ ବିଜେପି ଯୁବ ମୋର୍ଚ୍ଚା ପକ୍ଷରୁ ବିକ୍ଷୋଭ ପ୍ରଦର୍ଶନ କରାଯାଇଛି l ଓଏସଏସସି ସିଲେକ୍ସନର ମେରିଟ ଲିଷ୍ଟରେ ମହା ଦୁର୍ନୀତି ହୋଇଛି, ମେଧାବୀ ଛାତ୍ରଛାତ୍ରୀ ଚାକରି ପାଇବା ବଦଳରେ କମ ମାର୍କ ଥିବା ଛାତ୍ରଛାତ୍ରୀଙ୍କ ଲିଷ୍ଟ ଆସିଛି ବୋଲି ବିଜେପି ଅଭିଯୋଗ କରିଛି l  ସିଲେକସନରେ ବ୍ୟାପକ ଅନିୟମିତତା ଓ ଅର୍ଥ କାରବାର ହୋଇଥିବା ଜଳ ଜଳ ଦିଶୁଛି ବୋଲି ବିଜେପି ଅଭିଯୋଗ କରିବା ସହ ଦୋଷୀ ବିରୁଦ୍ଧରେ କଡା ଆଭିମୁଖ୍ଯ ଗ୍ରହଣ କରିବା ପାଇଁ ଦାବି କରିଛି l ମେଧାବୀ ଛାତ୍ରଛାତ୍ରୀଙ୍କୁ  ଚାକିରୀ ପ୍ରଦାନରେ ପାତରଅନ୍ତର ନୀତିକୁ ନିନ୍ଦା କରିବା ସହିତ ବିଜେପି ଯୁବମୋର୍ଚ୍ଚା ପକ୍ଷରୁ ଲୋଇସିଂହା ବ୍ଲକ ସମ୍ମୁଖରେ ଆନ୍ଦୋଳନ ତେଜିଛି l ଲୋଇସିଂହା, ପୁଇଁତଳା, ଆଗଲପୁର ୩ଟି ବ୍ଲକର ୫ଟି ଜୋନର ସଭାପତି, ମଣ୍ଡଳ ସଭାପତି ତଥା ସବୁ ବରିଷ୍ଠ କାର୍ଯ୍ୟକର୍ତ୍ତା ଉପସ୍ଥିତ ରହି ବିକ୍ଷୋଭ ପ୍ରଦର୍ଶନ ରେ ସାମିଲ ହୋଇଥିଲେ l ଏଥି ସହିତ ବିଜେପି ପକ୍ଷରୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ  କୁଶପୁତଳିକା ଦାହ କରାଯାଇଥିଲା l