04-Aug-2021

ସୃଜନଶୀଲତା ହେଉଛି ଏକ ପ୍ରଖର ପ୍ରଖର ନଦୀ ଯାହା କୌଣସି ବାଧାବିଘ୍ନକୁ ଖାତିର ନକରି ନିଜ ଲକ୍ଷ୍ୟସ୍ଥଳକୁ ମାଡି ଚାଲିଥାଏ । ଐଶ୍ୱରୀୟ ପ୍ରତିଭା ଓ ନିଜର ଅଧ୍ୟାବସାୟ ବଳରେ କିଛି ଚମତ୍କାର ଦେଖାଇ ସମସ୍ତଙ୍କ ଆକର୍ଷଣର କେନ୍ଦ୍ରବିନ୍ଦୁ ପାଲଟିଛନ୍ତି ବଲାଙ୍ଗୀର ଆଦର୍ଶପଡାର ଷଷ୍ଠ ଶ୍ରେଣୀର ଛାତ୍ର ଅଭିରୂପ ନନ୍ଦ । ଏହି କୋମଳ ବୟସରେ ସେ କେବଳ କ୍ଲାସରୁମ୍ ଭିତରେ ନିଜକୁ ସୀମିତ ନରଖି ନିଜର ବଳବୁଦ୍ଧୁି ପ୍ରୟୋଗ ନିଜ ଘର ଭିତରେ କରି ତିଆରି କରିଛନ୍ତି ଏକ ଏଗ୍ ଇନ୍‌କ୍ୟୁଭେଟର୍ ଯନ୍ତ୍ର(ଲାଇଟ୍ ମାଧ୍ୟମରେ କୃତ୍ରିମ ଉପାୟରେ ଅଣ୍ଡାରୁ ଛୁଆ ଫୁଟାଇବା ଯନ୍ତ୍ର) । ଏହି ଯନ୍ତ୍ର ତିଆରି 

କରିବାରେ କୌଶଳ ପ୍ରଥମେ ୟୁଟୁବ୍‌ରୁ ଶିଖି ଥିଲେ ଏବଂ ଏଥିପାଇଁ ଆବଶ୍ୟକ ପଡୁଥିବା ବିଭିନ୍ନ ଯନ୍ତ୍ରାଂଶ ସଂଗ୍ରହ କରି ତିଆରି କରିଥିଲେ ଏଗ୍ ଇନ୍‌କ୍ୟୁଭେଟର୍ ଯନ୍ତ୍ର ର ଏକ ପୂର୍ଣ୍ଣାଙ୍ଗ ମୋଡେଲ । ଏକ ବଡ ସୋଲ ଡବା, କଂପ୍ୟୁଟର ସିପିୟୁରେ ବ୍ୟବହୃତ ଫେନ୍‌, ୧ଠଠ ୱାଟ୍ ର ଏକ ବଲବ୍‌, ଟେମ୍ପ୍ରେଚର୍ କଂଟ୍ରୋଲର ମେସିନ, (ଆବଶ୍ୟକ ତାପମାତ୍ରା ୩୭.୭ ଡିଗ୍ରୀ ସେଲସିଅସ୍ କୁ ବେଲେନ୍ସ କରିବା ପାଇଁ )  ଗୋଟିଏ ପାଣିପାତ୍ର (ହ୍ୟୁମିଡିଟି ବେଲେନ୍ସ ପାଇଁ),୧୨ ଭୋଲଟ୍ ର ଏଡପ୍ଟର  ଓ ଗୋଟିଏ ଏଲ୍‌ଇଡି ଲାଇଟ୍ ର ସାହାଯ୍ୟ ନେଇ ଅଭିରୂପ ତିଆରି କଲେ ଏକ ଏପରି ଯନ୍ତ୍ର ଯେଉଁଠି ପ୍ରଥମେ ୫ଟି ଅଣ୍ଡା ରଖି ସେଥିରୁ ୨ଠ ଦିନ ଭିତରେ କୁକୁଡା ଚିଆଁ ସୃଷ୍ଟି କରିବାରେ ସଫଳ ହୋଇଥିଲେ । ଏହି ଯନ୍ତ୍ରାଂଶ ଗୁଡିକୁ ସେ ଆମାଜୋନ ମାଧ୍ୟମରେ କିଣିଥିବା ତଥା ଗୋଟିଏ ଏଗ୍ ଇନ୍‌କ୍ୟୁଭେଟର୍ ଯନ୍ତ୍ର ତିଆରି କରିବା ପାଇଁ ପ୍ରାୟ ୨୫ଶହ ଟଙ୍କା ଖର୍ଚ୍ଚ କରିଥିବା କହିଛନ୍ତି ଅଭିରୂପ । ଦୀର୍ଘ ୧ ବର୍ଷ ଭିତରେ ସେ ଏହି ଏଗ୍ ଇନ୍‌କ୍ୟୁଭେଟର୍ ଯନ୍ତ୍ର ମାଧ୍ୟମରେ  ପ୍ରାୟ  ୧୫ଟି କୁକୁଡ ଚିଆଁ ବାହାର କରିସାରିଲେଣି । ସବୁଠାରୁ ଆଶ୍ଚର୍ଯ୍ୟ ର ବିଷୟ ହେଲା ଏହି ଡିଭାଇସ୍ ତିଆରି କରିବା ପାଇଁ ଦରକାର ପଡିଥିବା ଅର୍ଥ ପାଇଁ ସେ ବାପାମାଁ ଙ୍କୁ ହାତ ନ ପତାଇ ଏଠାରୁ ପ୍ରସ୍ତୁତ ହୋଇଥିବା କୁକୁଡାକୁ ବିକ୍ରି କରି ହିଁ ସେହି ଟଙ୍କାରେ କିଣିଥିବା କହିଛନ୍ତି ଅଭିରୂପ ।   ବଲାଙ୍ଗୀର ସହରସ୍ଥ ଆଦର୍ଶ ପଡାରେ ବସବାସ କରୁଥିବା ଅଭିରୂପଙ୍କ ବାପା ରମେଶ ଚନ୍ଦ୍ର ନନ୍ଦ ବଲାଙ୍ଗୀର ପରିବାର ଅଦାଲତର ମୁଖ୍ୟ ପରାମର୍ଶଦାତା ଥିବା ବେଳେ  ମାଁ ନମ୍ରତା ନନ୍ଦଏକ ଗୃହିଣୀ ଅଟନ୍ତି ।  ବାପା ମାଁ ତାଙ୍କୁ ଏହି କାମରେ ଢ଼େର ଉତ୍ସାହିତ କରିଛନ୍ତି । ଆଗକୁ ନିଜ ହାତରେ ଏକ ଡ୍ରୋନ୍ କେମେରା ତିଆରି କରିବାର ଲକ୍ଷ୍ୟ ରଖିଛନ୍ତି ସେ । ଭବିଷ୍ୟତରେ ଜଣେ ବୈଜ୍ଞାନିକ ହେବା ସହ ଗୋଟିଏ ଦେଶୀ କୁକୁଡାର ଫାର୍ମ ତିଆରି କରି ବାର ସ୍ୱପ୍ନ ଦେଖିଥିବା ଅଭିରୂପ  କେବଳ ବୈଜ୍ଞାନିକ ଯନ୍ତ୍ରପାତି ତିଆରି ନୁହେଁ ପେନସିଲ୍ ଆର୍ଟରେ ମଧ୍ୟ ବେସ୍ ଓସ୍ତାଦ ଅଟନ୍ତି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଠାରୁ ଆରମ୍ଭ କରି ବିଭିନ୍ନ ଫିଲ୍ମ ଅଭିନେତାଙ୍କ ଅବିକଳ ପେନସିଲ୍ ଆର୍ଟ ତିଆରି କରି ନିଜର ସୃଜନଶୀଲତାର ପରିଚୟ ଦେଇଛନ୍ତ ଅଭିରୂପ ।  

ଏମିତି କମ ବୟସରେ ଏଗ୍ ଇନ୍‌କ୍ୟୁଭେଟର୍ ପରି ଏକ ଜଟିଳ ସାଇଣ୍ଟିଫିକ୍ ଡିଭାଇସ୍ ପ୍ରସ୍ତୁତ କରି ଅଭିରୂପ ଚମତ୍କାରିତାର ଏକ ନମୂନା ପ୍ରସ୍ତୁତ କରିଛନ୍ତି । ଆସନ୍ତା ଦିନରେ ଅଭିରୂପଙ୍କ ପରି କୁନି ପ୍ରତିଭାକୁ ସୁଯୋଗ ଓ ସରକାରୀ ପ୍ରୋତ୍ସାହନା ମିଳିିଲେ ରାଜ୍ୟ ତଥା ଦେଶରେ ନିଜର ନାମକୁ ଉଜ୍ୱଳ କରି ପାରିବେ, ଏଥିରେ ସନ୍ଦେହ ନାହିଁ ।