29-Jul-2021

ବଲାଙ୍ଗିର (ପ୍ରେରଣା ଖବର ବ୍ୟୁରୋ) : ମନ୍ତ୍ରୀଙ୍କ ଗାଡି ପିଛା କରିବା ସନ୍ଦେହରେ ଗତ ରାତ୍ରୀରେ ପୋଲିସ ବଲାଙ୍ଗିରର ୪ ଜଣ ଯୁବକଙ୍କୁ ଧରି ନିର୍ଧୁମ ଛେଚିବା ସହିତ ମନମୁଣ୍ଡା ଥାନାରେ ଅଟକ ରଖିଥିଲେ । ପୋଲିସ ତଦନ୍ତ କରିବା ପରେ ସେମାନେ ନିରିହ ବ୍ୟବସାୟୀ ଅଟନ୍ତି ବୋଲି ପୋଲିସ ଜାଣିବା ପରେ ସମସ୍ତଙ୍କୁ ଛାଡିଦେଇଛନ୍ତି । ଏ କ୍ଷେତ୍ରରେ ପୋଲିସ ର ଖାକି ବର୍ଦି ର ଅପବ୍ୟବହାର ସ୍ପଷ୍ଟ ଭାବେ ବାରି ହେଉଛି l କିଛି ନିରିହ ଲୋକଙ୍କୁ ବିନା ତଦନ୍ତରେ ଅଟକ ରଖାଯିବା ଓ କିଛି ନଜାଣି ବିନା କାରଣରେ ପୋଲିସର ଅମାନୁଷିକ ମାଡ ମରା ଘଟଣାକୁ ସାଧାରଣରେ ସମାଲୋଚନା କରାଯାଇଛି ।     ମିଳିଥିବା ସୂଚନା ପ୍ରକାରେ ଗତ ରାତିରେ ବଲାଙ୍ଗିରର ୪ ଜଣ ଯୁବ ବ୍ୟବସାୟୀ ଚାରିଛକ ଦେଇ ବଲାଙ୍ଗିର ଫେରୁଥିଲେ । ଗତରାତ୍ରୀରେ ପରିବହନ ମନ୍ତ୍ରୀ ପଦ୍ମନାଭ ବେହେରା ନିଜ ଗାଡିରେ ସୋନପୁର ଜିଲା ବିରମହାରାଜପୁର କୁ ଯାଉଥିଲେ ଏବଂ ଆଗରେ ଚାଲିଥିଲା ପୋଲିସର ପାଇଲଟ ଗାଡି । ଦୁର୍ଭାଗ୍ୟକ୍ରମେ ବ୍ୟବସାୟୀଙ୍କ ଗାଡି ମନ୍ତ୍ରୀଙ୍କ ପଛରେ ରହିଥିଲା ଏବଂ ସମାନ ରାସ୍ତାରେ ଯାଉଥିବାରୁ ସେମାନେ ପଛେପଛେ ଚାଲିଥିଲେ । ପାଇଲଟ ଗାଡି ସନ୍ଦେହ କରି ମନମୁଣ୍ଡା ପୋଲିସକୁ ସୂଚନା ଦେବା ସହ ତେଲନଦୀ ପୋଲ ପାଖରେ ସେମାନଙ୍କୁ ଅଟକାଇଥିଲେ । ପୋଲିସ ସେମାନଙ୍କୁ ଧରିବା ମାତ୍ରେ ମାଡ ମାରିବା ସହ ମନମୁଣ୍ଡା ଥାନାରେ ଆଣି ଅଟକ ରଖିଥିଲେ । ପୋଲିସ ର ମାତ୍ରାଧିକ କାର୍ଯ୍ୟକଳାପକୁ ସାଧାରଣରେ ନିନ୍ଦା କରାଯାଇଛି l