09-Jul-2021

ଟିଟିଲାଗଡ,(ପ୍ରେରଣା ଖବର) : ସରକାରୀ ଭାବେ  କୋଭିଡ-୧୯ ନିୟମର ଉଲ୍ଲଙ୍ଘନ ସହ ଭାରତୀୟ ସୁପ୍ରିମକୋର୍ଟ ଦ୍ୱାରା ପ୍ରଦତ୍ତ ଆଇନର  ଖିଲାପ କରି ବେସରକାରୀ ଶିକ୍ଷା ଅନୁଷ୍ଠାନର ଖୋଲାଖୋଲି ବେଆଇନ ଅର୍ଥ ଆଦାୟ ପାଇଁ ବ୍ଲାକ ମ୍ୟାଲିଂ କରିବା ଓ  ନିରୁପାୟ ହୋଇ ଅଭିବାବକ ଦାବୀ ମୁତାବକ ଟଙ୍କା ପୈଠ କରିବାକୁ ବାଧ୍ୟ ହେଉଛନ୍ତି । ବାରମ୍ବାର ଏ ନେଇ

ଆବେଦନ,ନିବେଦନ କରି ସୁଦ୍ଧା ଜିଲ୍ଲା ପ୍ରଶାସନ ବିଦ୍ୟାଳୟ କର୍ତ୍ତୃପକ୍ଷଙ୍କ ବିରୋଧରେ କୌଣସି ପଦକ୍ଷେପ ନ ନେବା ନେଇ ଅଭିଭାବକ ମହଲରେ ତୀଵ୍ର ଅସନ୍ତୋଷ ବୃଦ୍ଧି ପାଇଛି,ଶେଷରେ ବାଧ୍ୟ ହୋଇ ଆନ୍ଦୋଳନ କରି ତୀଵ୍ର ବିରୋଧ କରିବା ପରି ନିଷ୍ପତ୍ତି ନେଇଛି ଟିଟିଲାଗଡ ଅଭିଭାବକ ସଂଘ । ପ୍ରକାଶ ଯେ, କୋଭିଡ-୧୯ ନିୟମ ଅନୁଯାୟୀ ବିଦ୍ୟାଳୟ ବନ୍ଦ ରହିବା ସତ୍ୱେ ଛାତ୍ର, ଛାତ୍ରୀ ଙ୍କୁ ସେନିଟାଇଜ ସହ ନା ନା ଆଳରେ ଏକ ଲମ୍ବା ଚିଠା ପ୍ରସ୍ତୁତ କରି ଦେଇ ଟଙ୍କା ଆଦାୟ କରାଯାଉଥିବା ବେଳେ ଅଭିବାବକ ବାଧ୍ୟତାମୂଳକ ଭାବେ ନିଜ ଶିଶୁର ଭବିଷ୍ୟତ ବିପନ୍ନ ନ ହେଉ ବୋଲି ଅନିଚ୍ଛା ସତ୍ୱେ ଶୋଷଣର ଶିକାର ହେଉଛନ୍ତି । ଟିଟିଲାଗଡ ଓମ ଭ୍ୟାଲି ଓ ପ୍ରଭାବତି ପବ୍ଲିକ ସ୍କୁଲ ରେ ଏପରି ଅର୍ଥ ଶୋଷଣ ମନୋବୃତି ନେଇ ବିଗତ ଦିନରେ ଅଭିବାବକ ବିରୋଧ ସହ ସରକାରୀ ଆଇନ  ଅନୁଯାୟୀ ଏହାର ବିରୋଧ କରି ଜିଲ୍ଲା ଶିକ୍ଷା ଅଧିକାରୀ ତଥା ଉପଖଣ୍ଡ ଶିକ୍ଷା ଅଧିକାରୀ ଓ ସମସ୍ତ ଉଚ୍ଚ ବିଭାଗୀୟ ଅଧିକାରୀଙ୍କୁ ଦାବୀ ପତ୍ର ପ୍ରଦାନ କରିଥିଲେ । ହେଲେ ଉକ୍ତ ବିଦ୍ୟାଳୟ କର୍ତ୍ତୃପକ୍ଷ ନିଜ ଜିଦରେ ଅଟଳ ରହି ଗତ ୫ତାରିଖରେ ସ୍ଥାନୀୟ ପ୍ରଭାବତୀ ପବ୍ଲିକ ସ୍କୁଲ ତରଫରୁ ଫିସ ପୈଠ ସହ ୧୫ ଦିନ ବିଚାର ପାଇଁ ସମୟ ମାଗି ଛାତ୍ରଛାତ୍ରୀଙ୍କୁ ପରୀକ୍ଷା ଖାତା ନେବାକୁ ଚାପ ପ୍ରୟୋଗ ସହ ନାମ ବିଦ୍ୟାଳୟରୁ କଟିଯିବା  ଭୟ ସହ ପରୀକ୍ଷାରେ ଉତ୍ତୀର୍ଣ୍ଣ ନ କରିବା କହି ଏକ ପ୍ରକାର ବ୍ଲାକ ମ୍ୟାଲିଂ କରିବାରୁ ବାଧ୍ୟ ହୋଇ ସମସ୍ତ ଦାବୀ ମୁତାବକ ଦେୟ ଆଦାୟ କରାଯାଉଥିବା ନେଇ ଅଭିବାବକ ତୀବ୍ର ଅସନ୍ତୋଷ ପ୍ରକାଶ ପାଇଛି । ସୂଚନାଯୋଗ୍ୟ ଯେ, କୋଭିଡ ୧୯ ର ୨୦୨୦-୨୦୨୧ ରେ କରୋନା ଅକ୍ରାନ୍ତଙ୍କୁ ବିଦ୍ୟାଳୟ ରେ ରଖିବା ଓ ବିଦ୍ୟାଳୟ ଗାଡି ବ୍ୟବହାର ହୋଇଥିବା ସମସ୍ତ ଖର୍ଚ୍ଚ ବିଦ୍ୟାଳୟ କର୍ତ୍ତୃପକ୍ଷ ବିଲ,ଭାଉଚର କରି ସରକାରୀ ଅର୍ଥ ଆଦାୟ କରାଯାଉଥିବା ବେଳେ ଉକ୍ତ ୨୦୨୦ ବର୍ଷ ର ସମ୍ପୂର୍ଣ୍ଣ ଦେୟ ନେଇଛନ୍ତି ଯାହାକି ସମ୍ପୂର୍ଣ୍ଣ ବେଆଇନ । କୋଭିଡ-୧୯ ନିମନ୍ତେ ଆଇସୋଲେସନ ୱାର୍ଡ ରୂପେ ବିଦ୍ୟାଳୟ ଯଦି ବ୍ୟବହୃତ ହୋଇଛି ତେବେ ଛାତ୍ର, ଛାତ୍ରୀ ବିଦ୍ୟାଳୟ ରେ ନ ରହି କିପରି ଉପସ୍ଥାନ ଦର୍ଶାଇ ଅର୍ଥ ନିଆଗଲା ତଦନ୍ତ ସାପେକ୍ଷ ।  ସେହିପରି ୨୦୨୧ ମସିହାରେ ଉକ୍ତ ବର୍ଷ ପରି ଟଙ୍କା ପୈଠ କରିବା କୁ ବାଧ୍ୟ କରିଥିବା ନେଇ ବିଭାଗୀୟ ଅଧିକାରୀ ସବୁ ଜାଣି ନିରବ ଦ୍ରଷ୍ଟା ସାଯିବା ସହ ସଲା,ସୁତୁରା ନୀତି କରିଦେଇଥିବା ଯୋଗୁଁ ଜିଲ୍ଲା ତଥା ଉପଖଣ୍ଡ ଶିକ୍ଷା ଅଧିକାରୀ କୌଣସି ପ୍ରକାର ପଦକ୍ଷେପ ନେଇ ନ ଥିବା ସ୍ପଷ୍ଟ ଅନୁମେୟ ବୋଲି ଅଭିଭାବକ ଅଭିଯୋଗ କରିଛନ୍ତି । ଏପରିକି  ଦୁଇଟି ବିଦ୍ୟାଳୟ ର ଏପରି ଖୋଲା, ଖୋଲି ଫିସ ବା ଦେୟ ପ୍ରତ୍ୟାହାର ବଦଳ ରେ ଟ୍ରଷ୍ଟ ଆଇନ ର ଉଲ୍ଲଙ୍ଘନ କରି ଉକ୍ତ ପ୍ରଭାବତି ପବ୍ଲିକ ସ୍କୁଲ ଯାହା କି ଶ୍ରୀ ଦାଦୀଜି ମନ୍ଦିର ଟ୍ରଷ୍ଟ ଦ୍ୱାରା ପରିଚାଳିତ ତାହାର ଉଲଂଘନ କରିଥିବା ଓ ବିଦ୍ୟାଳୟ ଉଚ୍ଚ ଅଧିକାରୀ ଙ୍କୁ ନା ନା ଆଳରେ ଯୋଗାଯୋଗ କରାଇ ନ ଦେବା ଅଭିଯୋଗ ହୋଇଛି । 

ଟିଟିଲାଗଡ଼ ଅଞ୍ଚଳରେ ଶିକ୍ଷାର ବିକାଶ ପାଇଁ ଅନେକ ସରକାରୀ ତଥା ଘରୋଇ ବିଦ୍ୟାଳୟ ରହିଛି।ତେବେ ଏହି ମହାମାରୀ ସମୟରେ ମଧ୍ୟ ଶିକ୍ଷାକୁ ନେଇ ବ୍ୟବସାୟ କରିବାକୁ ପଛାଉ ନାହାନ୍ତି ଏହି ଘରୋଇ ସ୍କୁଲ ।  ପ୍ରଥମେ ଓମଭ୍ୟାଲି ଓ ପରେ ପ୍ରଭାବତି ସ୍କୁଲରୁ ମଧ୍ୟ ଅଭିଭାବକଙ୍କୁ ଶୋଷଣ ଅଭିଯୋଗ ନେଇ ବିଭାଗୀୟ ଅଧିକାରୀ ନୀରବ ରହିବା ଯୋଗୁଁ ଅସନ୍ତୋଷ ବୃଦ୍ଧି ପାଇଛି । ବ୍ୟବସାୟର ମାଧ୍ୟମ ବନେଇଥିବା ଏହି ସ୍କୁଲ ମାନଙ୍କର ମନମୁଖୀ ଓ ଅର୍ଥ ଶୋଷଣ  ଯୋଗୁଁ ଅଭିବାବକମାନେ ଅସନ୍ତୋଷ ପ୍ରକାଶ କରିଛନ୍ତି ।  ଏହାର ସମାଧାନ ପାଇଁ ଅଭିବାବକ ସ୍କୁଲ କର୍ତ୍ତୃପକ୍ଷ ତଥା ଜିଲ୍ଲା ଶିକ୍ଷା ଅଧିକାରୀ ଏବଂ ବଲାଙ୍ଗୀର ଜିଲ୍ଲାପାଳ,ଟିଟିଲାଗଡ ଉପଜିଲ୍ଲାପାଳ ଓ ଗଣ ଶିକ୍ଷା ମନ୍ତ୍ରୀ,ମୁଖ୍ୟ ଶାସନ ସଚିବ ଙ୍କୁ ଲିଖିତ ଅଭିଯୋଗ ପତ୍ର ପ୍ରେରଣ କରାଯାଇଛି । ପୂର୍ବରୁ ଅନେକ ଥର ଲିଖିତ ଅଭିଯୋଗ ସତ୍ୱେ ବିଭାଗୀୟ ଅଧିକାରୀ କୌଣସି ପ୍ରକାର ପଦକ୍ଷେପ ଗ୍ରହଣ ନ କରି ଥିବା ବେଳେ ଶେଷ ଥର ପାଇଁ ପୁନଃ ଲିଖିତ ଅଭିଯୋଗ ପତ୍ର ପ୍ରେରଣ କରାଯାଇ ଯଥାଶୀଘ୍ର ସବିଶେଷ ତଦନ୍ତ ସହ ତୁରନ୍ତ ଗତ ୨୦୨୦ ଓ ଚଳିତ ୨୦୨୧ ବର୍ଷ ର ଫିସ ଟ୍ରଷ୍ଟ ନିୟମ ଅନୁଯାୟୀ ପ୍ରତ୍ୟାହାର କରାଯାଉ ବୋଲି ଦାବୀ କରାଯାଇଛି,ନଚେତ ଆଗାମୀ ଦିନରେ ବାଧ୍ୟ ହୋଇ ଆନ୍ଦୋଳନାତ୍ମକ ପନ୍ଥା ଅବଲମ୍ବନ କରିବା ଓ ଏଥି ପାଇଁ ପ୍ରଶାସନ ହିଁ ଦାୟୀ ରହିବ ବୋଲି ଉଲ୍ଲେଖ କରାଯାଇଛି ।