06-Jul-2021

ଖପ୍ରାଖୋଲ,(ପ୍ରେରଣା ଖବର) :ସମିତି ସଭ୍ୟଙ୍କ ସହ ତାଙ୍କ ପରିବାର ବର୍ଗ ଙ୍କୁ ଗାଁରୁ ବାସନ୍ଦ, ବଲାଙ୍ଗିର ଜିଲ୍ଲାରୁ  ପୁଣି ଏକ କଙ୍ଗାରୁ କୋର୍ଟ ମାମଲା ସାମ୍ନା କୁ ଆସିଛି ।  ଏଭଳି ଅଭିଯୋଗ ଆସିଛି ବଲାଙ୍ଗିର ଜିଲ୍ଲା ଖପ୍ରାଖୋଲ ବ୍ଲକ ଲରମ୍ଭା ଥାନା ବାଘମୁଣ୍ଡ ଗାଁରୁ  ।  ବାଘମୁଣ୍ଡ ର ମହିଳା ସମିତି ସଭ୍ୟଙ୍କ ସମେତ ତାଙ୍କ ପରିବାରକୁ ଗାଁରେ ନିଆଁ ପାଣି ବାସନ୍ଦ କରାଯାଇଛି । ଘଟଣା ସଂପର୍କରେ ପ୍ରଥମେ ଲରମ୍ଭା ଥାନା ଓ ପରେ ପାଟଣାଗଡ ଏସଡିପିଓଙ୍କ ନିକଟରେ ଅଭିଯୋଗ ପରେ ନିର୍ଯ୍ୟାତିତ ପରିବାର ବଲାଙ୍ଗିର ଏସପିଙ୍କ ଦ୍ବାରସ୍ଥ ହୋଇଛନ୍ତି । ୨୦୧୭ ଫେବୃଆରୀରେ ହୋଇଥିବା ପଞ୍ଚାୟତ ନିର୍ବାଚନରେ ବାଘମୁଣ୍ଡ ଗ୍ରାମପଞ୍ଚାୟତରୁ ସମିତି ସଭ୍ୟା ଭାବେ ବାଘମୁଣ୍ଡ ଗାଁର ବୈଦେହୀ ସେଠ୍ ନିର୍ବାଚିତ ହୋଇଥିଲେ ।

ନିର୍ବାଚିତ ହେବାପରେ ଗାଁର ପ୍ରକାଶ ମେହେର ଓ ବିକାଶ ମେହେର ପ୍ରଲୋଭନ ଦେଖାଇ ବୈଦେହୀ ଓ ତାଙ୍କ ସ୍ବାମୀ ଲିଙ୍ଗରାଜ ସେଠଙ୍କୁ ରାୟପୁର ନେଇ ୧୫ ଦିନ ଅଜଣା ସ୍ଥାନରେ ରଖିଥିଲେ । କିଛିଦିନ ତଳେ ସମିତି ସଭ୍ୟା ବୈଦେହୀ ଓ ତାଙ୍କ ସ୍ୱାମୀ ଲିଙ୍ଗରାଜ ଟଙ୍କା ମାଗିବା ରୁ ବିକାଶ ମେହେର ଏବଂ ପ୍ରକାଶଙ୍କ ମେହେର ଅଶ୍ଳୀଳ ଭାଷାରେ ଗାଳି ଗୁଲଜ କରି ବନ୍ଧୁକ, ଠେଙ୍ଗା ଓ ଲୁହାରଡ୍ ଆଦି ମାରଣାସ୍ତ୍ର ଦେଖାଇ ଭୟଭୀତ କରି ଧମକ,ଚମକ ଦେଇଥିବା ଅଭିଯୋଗ ହୋଇଛି  । ଘଟଣା ସଂପର୍କରେ ଗତ ୧ ତାରିଖ ଦିନ ବୈଦେହୀ ସେଠ ଲରମ୍ଭା ଥାନାରେ ଅଭିଯୋଗ କରିଥିଲେ । ଏପରିକି କାର୍ଯ୍ୟାନୁଷ୍ଠାନ ଦାବୀରେ ଗତ ୧୨ ତାରିଖ ପିଡିତ ପରିବାର ପାଟଣାଗଡ ଏସଡିପିଓ ଙ୍କ ଦ୍ବାରସ୍ଥ ହୋଇଥିଲେ । ଏ ଘଟଣାକୁ ନେଇ ଗତ  ୧୪ ତାରିଖରେ ଗାଁରେ   କଙ୍ଗାରୁ କୋର୍ଟ ବସିଥିଲା । ବୈଦେହୀଙ୍କ ପରିବାରକୁ ମଧ୍ୟ ଉକ୍ତ କଙ୍ଗାରୁ କୋର୍ଟ କୁ ଲୋକେ ଡାକିଥିଲେ । ଭୟରେ ସେମାନେ ନଯିବାରୁ ତାଙ୍କୁ  ନିଆଁପାଣି ବାସନ୍ଦ କରାଯାଇଛି ବୋଲି ବୈଦେହୀ ଜଣାଇବା ସହ ଆବଶ୍ୟକ ପୋଲିସ କାର୍ଯ୍ୟାନୁଷ୍ଠାନ ଗ୍ରହଣ କରିବା କୁ ଦାବୀ କରିଛନ୍ତି ।