23-Jun-2021

ବିନିକା (ହିମାଂଶୁ ଶେଖର ପୁଟେଲ) : ବିନିକା ଅଞ୍ଚଳରେ ଧାନବିକ୍ରି ସମସ୍ୟା ନେଇ ଅଚଳାବସ୍ଥା ଲାଗି ରହିଛି l ଚାଷୀଙ୍କ ଠାରୁ ଆରମ୍ଭ କରି ବିଭିନ୍ନ ରାଜନୈତିକ ଦଳ ତରଫରୁ ପ୍ରଶାସନ ଠାରେ ଅଭିଯୋଗ ହୋଇଛି l ହେଲେ ସମସ୍ୟା ସମାଧାନ ହୋଇନାହିଁ l ଫଳରେ ଚାଷୀ ଧାନବିକ୍ରି କରି ନ ପାରି ହତାଶ ହୋଇପଡିଛି l ଅନ୍ୟପଟେ କେତେକ ଚାଷୀ ଟୋକନ ପାଇଥିଲେ ମଧ୍ୟ ନିର୍ଦ୍ଧାରିତ ସମୟ ମଧ୍ୟରେ ମଣ୍ଡିରୁ ଧାନ ନ ଉଠିବାରୁ ଟୋକନ ଲେପସ ଯୋଗୁଁ ବର୍ତ୍ତମାନ ପର୍ଯ୍ୟନ୍ତ

ଧାନବିକ୍ରି କରିବାରୁ ବଞ୍ଚିତ ହୋଇଛନ୍ତି l ପୁଣି କେତେକ ଚାଷୀଙ୍କ ନାମ ପଞ୍ଜିକରଣ ରେ ତ୍ରୁଟି ଯୋଗୁଁ ସେମାନେ ଅଦ୍ୟାବଧି ଟୋକନ ପାଇ ନାହାଁନ୍ତି କି ଧାନବିକ୍ରି ମଧ୍ୟ କରି ପାରିନାହାନ୍ତି l ବିନିକା ର ବିଭିନ୍ନ ମଣ୍ଡିରେ ଏବେବି ସହସହ ବସ୍ତ ଧାନ ବର୍ଷାରେ ଭିଜି ପଡି ରହିଥିବା ଦେଖିବାକୁ ମିଳିଛି l ବର୍ଷାରେ ଭିଜି ଧାନ ଗଜା ହୋଇଯାଇଥିବାରୁ ଚାଷୀ ପାଇଁ ବୋଝ ଉପରେ କରୋଡ଼ା ମାଡ଼ ସଦୃଶ ହୋଇଛି l ଧାନବିକ୍ରି ସମସ୍ୟାର ସମାଧାନ ନେଇ ବିନିକା ର ବିଭିନ୍ନ ସ୍ଥାନରେ ମଣ୍ଡିରେ ତାଲା ମାରିବା, ବିକ୍ଷୋଭ ପ୍ରଦର୍ଶନ,ହୋ ହାଲ୍ଲା,ପ୍ରଶାସନ ଠାରେ ହାରି ଗୁହାରି ଚାଷୀଙ୍କ ତରଫରୁ କରା ଯାଇଥିଲେ ମଧ୍ୟ କେବଳ ପ୍ରତିଶ୍ରୁତି ଛଡ଼ା ଅନ୍ୟ କିଛି ପ୍ରଶାସନ ତରଫରୁ ମିଲୁ ନ ଥିବାରୁ ଦିନକୁ ଦିନ ଚାଷୀର ପରିସ୍ଥିତି ଦୟନୀୟ ହେବାରେ ଲାଗିଛି l ସୂଚନା ଯୋଗ୍ୟ ଯେ ଭଣ୍ଡାର ଗ୍ରାମର ସ୍ବର୍ଗତ ଝାରୁ ଛନ୍ଦଙ୍କ ଗତ 31ତାରିଖରେ କରୋନା ଯୋଗୁଁ ମୃତ୍ୟୁ ହେବାପରେ ତାଙ୍କ ନାମରେ ଥିବା ଟୋକନ ଅବଧି ସରି ଯାଇଥିଲା l ଫଳରେ ତାଙ୍କ ପୁଅ ହରିହର ଛନ୍ଦ  17ତାରିଖରେ ରିଟୋକନ ପାଇଁ ତହସିଲଦାରଙ୍କ ଠାରେ ଆବେଦନ କରିଥିଲେ l ହେଲେ ଆଜି ପର୍ଯ୍ୟନ୍ତ ଟୋକନ ଆସିଲା ନାହିଁ କି ଧାନବିକ୍ରି ମଧ୍ୟ କରି ପାରିଲେ ନାହିଁ l ହରିହର ଙ୍କ ଭଳି ବିନିକା ଅଞ୍ଚଳରେ ଆହୁରି ଅନେକ ଚାଷୀଙ୍କ ଧାନବିକ୍ରି ହୋଇପାରି ନାହିଁ l ଚାଷୀଙ୍କ ସମସ୍ୟା ନେଇ କଂଗ୍ରେସ ତରଫରୁ 

କିଛିଦିନ ତଳେ ସ୍ଥାନୀୟ ତହସିଲଦାରଙ୍କୁ ଏକ ଦାବିପତ୍ର ପ୍ରଦାନ କରାଯାଇଥିଲା l ହେଲେ ନିର୍ଦ୍ଦିଷ୍ଟ ସମୟ ମଧ୍ୟରେ ସମାଧାନ ନ ହେବାରୁ ବିନିକା କଂଗ୍ରେସ ଦଳ ତରଫରୁ ଚାଷୀ ମାନଙ୍କ ସ୍ୱାର୍ଥକୁ ଦୃଷ୍ଟିରେ ରଖି ଦୁନିଆ କୁ ଯୋଗାଉଥିବା ଆହାର ଚାଷୀଙ୍କ ପାଇଁ ଆଜି ଧାନବସ୍ତା ଅଫିସ ପରିସରରେ ରଖି ବିନିକା ତହସିଲ ଅଫିସ ସମ୍ଭୁଖରେ ବିକ୍ଷୋଭ ପ୍ରଦର୍ଶନ ସହ ଆନ୍ଦୋଳନ ଆରମ୍ଭ କରିଛନ୍ତି l ସମସ୍ୟା ସମାଧାନ ନ ହେଲେ ଏବଂ ସବୁ ଚାଷୀଙ୍କ ଧାନ ନ ଉଠିଲେ ଆନ୍ଦୋଳନ ଆହୁରି ତୀବ୍ରତର ହେବ ବୋଲି କଂଗ୍ରେସ କର୍ମୀ ମାନେ ପ୍ରଶାସନକୁ ଚେତାବନୀ ଦେଇଛନ୍ତି l