22-Jun-2021

ଯାଜପୁର (ପ୍ରେରଣା ଖବର) : କୋରୋନା ମହାମାରୀ ବିପତ୍ତି ସମୟରେ ସମଗ୍ର ଅଂଚଳବାସୀଙ୍କ ସୁସ୍ଥ ଓ ନିରାମୟ ଜୀବନ କାମନା କରି ଯାଜପୁର ଜିଲ୍ଲାର ଧର୍ମଶାଳା ବ୍ଲକ ଅନ୍ତର୍ଗତ ମହିଶରାଠାରେ ସ୍ଥାନୀୟ ଆଦର୍ଶ ପ୍ରେସ କ୍ଲବ ଓ ଜେନାପୁରସ୍ଥ ଉତ୍କଳମଣି ସେବା ସଂଗଠନର ମିଳିତ ଆନୁକୂଲ୍ୟରେ ଆଜି ଅନ୍ତର୍ଜାତୀୟ ଯୋଗ ଦିବସ କୋରୋନା କଟକଣା ମଧ୍ୟରେ ପାଳିତ ହୋଇଯାଇଛି ।ଏହି ଅବସରରେ ଧର୍ମଶାଳା ଆଦର୍ଶ ପ୍ରେସ କ୍ଲବର ସମ୍ପାଦକ ତଥା ଉତ୍କଳମଣି ସେବା ସଂଗଠନର ସକ୍ରିୟ ସଭ୍ୟ ମୋହନ ମଲ୍ଲିକଙ୍କ ଆବାହକତ୍ଵରେ ଆୟୋଜିତ ଏକ କାର୍ଯ୍ୟକ୍ରମରେ ପ୍ରେସ କ୍ଲବର ଉପସଭାପତି ବଳରାମ ଦାସ ଓ ସଭ୍ୟ ବାବୁଲି ଘଡେଇଙ୍କ ସମେତ ସଂଗଠନର କର୍ମକର୍ତ୍ତା ଏବଂ ସ୍ଥାନୀୟ ଅଞ୍ଚଳବାସୀ ହୃଦାନନ୍ଦ ଘଡେଇ,ସୌମ୍ୟରଂଜନ ଘଡେଇ,କଳ୍ପତରୁ ଘଡେଇ,ବିନାୟକ ଘଡେଇ,ବିନୟ କୁମାର ଦାସ, ରାଜରାମ ଘଡେଇ ଓ ପ୍ରଶାନ୍ତ ଘଡେଇ ପ୍ରମୁଖ ସାମିଲ ହୋଇ ଯୋଗାସନ ଓ ପ୍ରାଣାୟମର ବିବିଧ ଅଭ୍ୟାସ କରିଥିଲେ ।ଏହାଛଡା ସମ୍ପାଦକ ଶ୍ରୀ ମଲ୍ଲିକ ଓ କର୍ମକର୍ତ୍ତାମାନେ  ଗ୍ରାମବାସୀ ଓ ଛାତ୍ରଛାତ୍ରୀମାନଙ୍କୁ ସୁସ୍ଥ ଓ ସୁଖୀ ରହିବାର ଏକମାତ୍ର ମାଧ୍ୟମ ଯୋଗ ଏବଂ ଏହା ଶାରୀରିକ,ମାନସିକ ଓ ଆଧ୍ୟାତ୍ମିକ ଶକ୍ତି ବୃଦ୍ଧି କରିବାର ଏକ ଅଭ୍ୟାସ ବୋଲି ଅଭିହିତ କରିଥିଲେ ।ପୁଣି ଯୋଗାଭ୍ୟାସର ବିବିଧ ଉପାଦେୟତା ସମ୍ପର୍କରେ ସଚେତନତା ସୃଷ୍ଟି କରିବା ସହ ଏହାକୁ ନିୟମିତ ଜାରି ରଖିଲେ ଯୋଗ ଦିବସ ପାଳନର ଯଥାର୍ଥତା ପ୍ରତିପାଦିତ ହୋଇପାରିବ ବୋଲି ମତବ୍ୟକ୍ତ କରିଥିଲେ ।