14-Jun-2021

କଣ୍ଟାବାଞ୍ଜି,(ଆନନ୍ଦ ମୋଟେ): କଣ୍ଟାବାଞ୍ଜି ବିଜୁ ପଟ୍ଟନାୟକ ରକ୍ତ ଭଣ୍ଡାର ପକ୍ଷରୁ ବିଶ୍ୱ ରକ୍ତଦାତା ଦିବସ ଅନୁଷ୍ଠିତ ହୋଇଥିଲା । ରକ୍ତ ଭଣ୍ଡାର ଅଧ୍ୟକ୍ଷ ତଥା ତହସିଲଦାର ଅଶୋକ କୁମାର ମାଝିଙ୍କ ସଭାପତିତ୍ୱରେ ଆୟୋଜିତ ଏହି ଦିବସରେ ସ୍ଥାନୀୟ ବିଧାୟକ ସନ୍ତୋଷ ସିଂ ସାଲୁଜା ମୁଖ୍ୟ ଅତିଥି ଭାବେ ଯୋଗ ଦେଇଥିଲେ । ସମ୍ମାନିତ ଅତିଥି ଭାବେ ଥାନା ଅଧିକାରୀ ସତ୍ୟଜିତ କଣ୍ଡେଲକେଲ, ରକ୍ତ ଭଣ୍ଡାର ଅଧିକାରୀ ଡାକ୍ତର ଏସ.ପି.ଡି. ପଣ୍ଡା ମଂଚାସୀନ ଥିଲେ । ୨୦୧୯-୨୦ ଓ ୨୦୨୦-୨୧ ବର୍ଷରେ ବିଭିନ୍ନ ସମୟରେ ରକ୍ତଦାନ ଶିବିର ଆୟୋଜନ କରିଥିବା ମାରୱାଡି ୟୁବା ମଂଚ ବିକାଶ ଶାଖା, ମାରୱାଡି ମହିଳା ସମିତି, ଆମ ଓଡିଶା ସମ୍ବାଦ, ହମାରେ ପଡୋସି , ବିଜେଡି, ବିଜେପି ସହ ଅନ୍ୟ ସଂଗଠନଙ୍କୁ ମୁଖ୍ୟ ଅତିଥି ମାନପତ୍ର ସହ ସ୍ମୃତି ଚିହ୍ନ ଦେଇ ସମ୍ମାନିତ କରିଥିଲେ । କଣ୍ଟାବାଞ୍ଜି ପ୍ରେସ କ୍ଲବ କାର୍ଯ୍ୟାଳୟ ଠାରେ  ଏକ ରକ୍ତଦାନ ଶିବିର ଆୟୋଜନ କରାଯାଇଥିଲା । ଏହି ଶିବିରରେ ୧୨୮ ୟୁନିଟ ରକ୍ତ ସଂଗ୍ରହ ହୋଇଥିଲା । ପ୍ରେସ କ୍ଲବକୁ ସର୍ବାଧିକ ୟୁନିଟ ରକ୍ତ ସଂଗ୍ରହ କରିଥବାରୁ ତାଙ୍କୁ ସ୍ୱତନ୍ତ୍ର ଭାବେ ମାନପତ୍ର ଏବଂ ସ୍ମୃତି ଚିହ୍ନ ଦେଇ ସମ୍ମାନିତ କରାଯାଇଥିଲା । ସେହିପରି ରକ୍ତ ଭଣ୍ଡାର ପରିଚାଳନା କମିଟି ତଥା ସମାଜସେବୀ ଆଶିଷ ଖଇତାନଙ୍କୁ ବେଷ୍ଟ କ୍ୟାମ୍ପ ମୋଟିଭେଟର ଭାବେ ସମ୍ମାନିତ କରାଯାଇଥିଲା । ଏହି କାର୍ଯ୍ୟକ୍ରମରେ ରକ୍ତ ଭଣ୍ଡାର ଟେକନିସିଆନ ସୁନିତା ଭୋଇ, ରାଜେନ୍ଦ୍ର ସାହୁ, କୁନାଲ ଦାସ, ଶିବ ସାହୁ ସହ ଅନ୍ୟ ମାନେ ଉପସ୍ଥିତ ଥିଲେ ।