12-Jun-2021

ବିନିକା (ହିମାଂଶୁ ଶେଖର ପୁଟେଲ) : ଆଜି ଶନିବାର ସଟଡ଼ାଉନର ସୁଯୋଗ ନେଇ ମଦ ବେପାରୀ ମାନେ ଖୁଲମଖୁଲା ବେଆଇନ ମଦ ଚାଲାଣ ପାଇଁ ସକ୍ରିୟ ହୋଇପଡିଛନ୍ତି ସୁବର୍ଣ୍ଣପୁର ଜିଲ୍ଲା ବିନିକା ଓ ଉଲୁଣ୍ଡା ବ୍ଲକ ଅଞ୍ଚଳରେ l ପୋଲିସ ଓ ଅବକାରୀ ବିଭାଗ ଏମାନଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରୁଥିଲେ ମଧ୍ୟ ଏମାନେ କିଛି ଦିନପରେ କୋର୍ଟ ରୁ ଜାମିନରେ ଚାଲିଆସି ପୁନଃ ତାଙ୍କ ବେପାର ଆରମ୍ଭ କରିଦେଉଛନ୍ତି l ଧରପକଡ ଚାଲୁ ରହିଥିଲେ ମଧ୍ୟ ମଦ ବେପାରୀଙ୍କ ପ୍ରଶାସନ ପ୍ରତି ଖାତିର ନାହିଁ କହିଲେ ଚଲେ l ଯାହାର ଆଜି ଜ୍ୱଳନ୍ତ  ପ୍ରମାଣ ଦେଖିବାକୁ ମିଳିଛି ଉଲୁଣ୍ଡା-ବିନିକା ରାସ୍ତାରେ l
ସକାଳ ପ୍ରାୟ ୮ଘଣ୍ଟା ସମୟରେ ଉଲୁଣ୍ଡା ବ୍ଲକ ଝାରବାହାଳି ଗ୍ରାମରୁ ଇଣ୍ଡିକା କାରରେ ରନ୍ଧା ମଦ 235 ଲିଟର ନେଇ ଦୁଇ ଜଣ ବ୍ୟକ୍ତି ଚଢ଼େଇପଙ୍କ ଦେଇ ଭେଡେନ ଅଭିମୁଖେ ଯାଉଥିଲେ। କୌଣସି ସୂତ୍ରରୁ ଖବର ପାଇ ବିନିକା ଭାଟି କର୍ମଚାରୀ ମାନେ ତାହାଙ୍କୁ ମାନପୁର ଛକରେ ଅଟକାଇ ଥିଲେ। ଡ୍ରାଇଭର ଗାଡିର ଷ୍ଟାର୍ଟ  ବନ୍ଦ କରିଦେଇ ସେଠାରୁ  ଫେରାର ହୋଇଯାଇଥିଲା।କାରର ପଛପଟେ ବସିଥିବା  ମଦବେପାରି କୁ କାବୁକରି ଭାଟି କର୍ମଚାରୀ ମାନେ ଉତ୍ତମ ମଧ୍ୟମ ଦେଇଥିଲେ। ଏହି ଘଟଣା ପରେ ସେଠାରେ ବହୁ ଲୋକଙ୍କ ଭିଡ଼ ଜମିଥିଲା l ଉପସ୍ଥିତ  ଲୋକମାନେ ମଦବେପାରୀକୁ ଅଟକ ରଖି ଉଲୁଣ୍ଡା ପୋଲିସକୁ ଖବର ଦେଇଥିଲେ।ପୋଲିସ ଘଟଣା ସ୍ଥଳକୁ ଆସି ଅନୁସନ୍ଧାନ ଜାରି ରଖିଛି।