30-May-2021

ବିନିକା (ହିମାଂଶୁ ଶେଖର ପଟେଲ) କେତେ ଦୁଃଖକଷ୍ଟ ରେ ଚାଷୀ ହାଡ଼ଭଙ୍ଗା ପରିଶ୍ରମ କରି ଉତ୍ପାଦନ କରିଥିଲା ଡାଲୁଆ ଧାନ l ମଣ୍ଡି ଖୋଲିବା ପୂର୍ବରୁ ପଞ୍ଜିକରଣ ପାଇଁ ଆବଶ୍ୟକୀୟ କାଗଜପତ୍ର ଜମା କରିଥିଲା l ହେଲେ ପଞ୍ଜିକରଣ ଦାୟିତ୍ଵରେ ଥିବା ଅନଭିଜ୍ଞ କମ୍ପ୍ୟୁଟର ଅପରେଟରଙ୍କ ଯୋଗୁଁ ୮୪ଜଣଙ୍କ ନାମ ତାଲିକାରେ ଆସି ନଥିଲା l ଯାହା ଫଳରେ ୫ଦିନ ହେଲା ଚାଷୀମାନେ ଧାନ କ୍ରୟ କେନ୍ଦ୍ରକୁ ତାଲା ପକାଇ ଦେଇ ସମସ୍ୟା ସମାଧାନ ନେଇ ଆଡି ରହିଥିବା ଦେଖିବାକୁ ମିଳିଛି ସୁବର୍ଣ୍ଣପୁର ଜିଲ୍ଲାର ବିନିକା ବ୍ଲକ ମେଘଳା ପଞ୍ଚାୟତ ଯଶପୁର ଗ୍ରାମରେ l ଗ୍ରାମର ଶିବାନୀ ସ୍ଵୟଂ ସହାୟକ ଗୋଷ୍ଠୀ ତରଫରୁ ଧାନ କିଣା ଆରମ୍ଭ ହୋଇଥିଲା l ତାଲିକାରେ ୮୪ଜଣ ଚାଷୀଙ୍କ ନାମ ନ ଆସିବାରୁ ଚାଷୀ ମାନେ ଉତେଜିତ ହୋଇ ଧାନ କ୍ରୟ କେନ୍ଦ୍ରକୁ ତାଲା ପକାଇ ରଖିଛନ୍ତି l ଦୁଇଦିନ ପରେ ଜିଲ୍ଲା ଯୋଗାଣ ବିଭାଗ ତରଫରୁ ପଦାଧିକାରୀ ମାନେ ଆସି ଚାଷୀଙ୍କ ସହ ଆଲୋଚନା କରିଥିଲେ ହେଁ ସମସ୍ୟା ଯଥା ପୂର୍ବମ୍ ତଥା ପରମ ହୋଇ ରହିଛି l ଏନେଇ ଯୋଗାଣ ଅଧିକାରୀ ରାଜ କିଶୋର ସ୍ୱାଇଁ ସ୍ଵୟଂ ସହାୟକ ଗୋଷ୍ଠୀଙ୍କ ଭୁଲ ବୋଲି କହିବା ସହ ଉପରିସ୍ଥ ଅଧିକାରୀଙ୍କୁ ଘଟଣା ବିଷୟରେ ଜଣାଇଥିବା ପ୍ରକାଶ କରିଛନ୍ତି l ତେବେ ଆକାଶରେ ମେଘମାଳା ପୁଣି ହୂର୍ ହୁର୍ ପବନ ଯୋଗୁଁ ପାଗରେ ଅଚାନକ ପରିବର୍ତ୍ତନ ଘଟୁଥିବାରୁ ବାହାରେ ପଡି ରହିଥିବା ହଜାର ହଜାର ଧାନ ବସ୍ତାକୁ ନେଇ ଚାଷୀ ଚିନ୍ତାରେ l ଜିଲ୍ଲା ପ୍ରଶାସନ ତୁରନ୍ତ ଏଥିରେ ହସ୍ତକ୍ଷେପ କରି ସମସ୍ୟା ସମାଧାନ କରିବା ପାଇଁ ଚାଷୀ ମହଲରେ ଦାବି ହେଉଛି l