29-May-2021

  ବଲାଙ୍ଗିର(ପ୍ରେରଣା ଖବର)- ବଲାଙ୍ଗୀର ଜିଲ୍ଲା ଓକିଲ ସଂଘ ବିରୁଦ୍ଧରେ ଗତ ୨୫ ତାରିଖରେ କିଛି ବିବାଦୀୟ ଓ ଭୁଲ ତଥ୍ୟ ସମ୍ବଳିତ ଭିଜୁଆଲ ଖବର ପରିବେଷଣ କରିଥିବା ଗୋଟିଏ ୱେବ୍ ନ୍ୟୁଜ୍ ବିରୁଦ୍ଧରେ ଜିଲ୍ଲା ଓକିଲ ସଂଘ ବଲାଙ୍ଗିର ଟାଉନ ଥାନାରେ ଆଇପିସିର ଦଫା ୨୯୪ ଓ ୫ଠଠ ରେ ଏଫ୍‌ଆଇଆର୍ ଦାଖଲ କରିଥିଲେ । ଏହାପରେ ସଂପୃକ୍ତ ୱେବ୍ ନ୍ୟୁଜ୍ ର ମାଲିକ ଜିଲ୍ଲା ଓକିଲ ସଂଘ ସମ୍ମୁଖରେ ଆସି ନିଃସର୍ତ୍ତ କ୍ଷମା ପ୍ରାର୍ଥନା କରିବା ସହ ଭବିଷ୍ୟତରେ ଏପରି ଭୁଲ ନ ଦୋହରାଇବା ପାଇଁ ପ୍ରତିଶୃତି ଦେଇଥିଲେ । ଏଥିସହ ନିଜ ୱେବ୍ ନ୍ୟୁଜ୍ ରୁ ଉକ୍ତ ବିବାଦୀୟ ଖବରକୁ ଡିଲିଟ କରିବା ପାଇଁ ରାଜି ହୋଇଥିଲେ । ଏଥିସହ ନିଜ ୱେବ୍ ନ୍ୟୁଜ୍ ରେ ନିଃସର୍ତ୍ତ କ୍ଷମା ପ୍ରାର୍ଥନାର ଖବର ମଧ୍ୟ ପରିବେଷଣ କରିବାର ପ୍ରତିଶୃତି ଦେଇଥିଲେ । ଆଜି ଲିଖିତ  କ୍ଷମା ପ୍ରାର୍ଥନାର ଏକ କପି ବଲାଙ୍ଗିର ଏସ୍‌ପିଙ୍କୁ ପ୍ରଦାନ କରାଯିବ ବୋଲି ଜଣାପଡିଛି ।   ଗତକାଲି ସିଭିଲ କୋର୍ଟ ବାରହଲ୍ ଠାରେ ଜିଲ୍ଲା ଓକିଲ ସଂଘର କାର୍ଯ୍ୟକାରିଣୀ ବୈଠକ ଅନୁଷ୍ଠିତ ହୋଇଥିଲା । ପ୍ରଥମେ ସଂଘ ର  ସଭ୍ୟ ତଥା ବରିଷ୍ଠ ଆଇନଜୀବୀ ଶ୍ରୀକାନ୍ତ ପଟ୍ଟନାୟକ ଙ୍କ ବିୟୋଗରେ ଏହି ଆମର ଆତ୍ମାର ସଦଗତି ପାଇଁ ଦୁଇ ମିନିଟ ନୀରବ ପ୍ରାର୍ଥନା କରାଯଇଥିଲା l

  ସଂଘର ସଭାପତି ପ୍ରବୀଣ କୁମାର ମିଶ୍ରଙ୍କ ଆବାହକତ୍ବରେ ଅନୁଷ୍ଠିତ ବୈଠକରେ  ସମସ୍ତ କାର୍ଯ୍ୟକାରିଣୀ ସଭ୍ୟ ଯୋଗ ଦେଇ ଓକିଲ ସଂଘ ବିରୁଦ୍ଧରେ ସମ୍ପୃକ୍ତ ୱେବ୍ ନ୍ୟୁଜରେ ପରିବେଷିତ ଖବରକୁ ନେଇ ଅସନ୍ତୋଷ ପ୍ରକାଶ କରିବା ସହିତ  ଜନମତକୁ ବିଭ୍ରାନ୍ତ କରୁଥିବା ଏପରି ଶକ୍ତି ବିରୁଦ୍ଧରେ ଆଗକୁ ଆଇନଗତ ପଦକ୍ଷେପ ନିଆଯିବ ବୋଲି ନିଷ୍ପତ୍ତି ଗ୍ରହଣ କରିଥିଲେ । ଜିଲ୍ଲା ଓକିଲ ସଂଘ ସବୁବେଳେ ଜିଲ୍ଲାବାସୀଙ୍କ ସ୍ୱାର୍ଥ ଓ ସଂଘର ନ୍ୟାର୍ଯ୍ୟ ଦାବି ପାଇଁ ସ୍ୱର ଉତ୍ତଳନ କରି ଆସିଛି । ଏପରି ପରିସ୍ଥିତିରେ କେବଳ ଚର୍ଚ୍ଚା କୁ ଆସିବା ପାଇଁ କିଛି ମନଗଢ଼ା ଓ କପୋଳକଳ୍ପିତ ତଥ୍ୟକୁ ଆଧର କରି ଖବର ପରିବେଷଣ କରିଥିବା ଘଟଣାକୁ ବୈଠକରେ ଦୃଢ଼ ନିନ୍ଦା କରାଯାଇଛି । ତେବେ ଆଜି ବୈଠକରେ ସଂପୃକ୍ତ ୱେବ୍ ନ୍ୟୁଜ୍ ର ମାଲିକ ଆସି ଲିଖିତ କ୍ଷମା ପ୍ରାର୍ଥନା କରିଥିଲେ । ଶେଷରେ ସଂଘ ର ସମ୍ପାଦକ ଅମନ ନାଗ ଧନ୍ୟବାଦ ଅର୍ପଣ କରିଥିଲେ l