28-May-2021

ଉଲୁଣ୍ଡା(ଗୌର ଚନ୍ଦ୍ର ପରିଛା) ଉଲୁଣ୍ଡା ଅଂଚଲରେ ଦିନକୁ ଦିନ  ଜନ୍ତୁଶୀକାର ବଢିବାରେ ଲାଗିଛି । ବିଭିନ୍ନ ସମୟରେ ଜନ୍ତୁ ଶିକାର ପାଇଁ ବିଛାଇ ଥିବା ତାର ଲାଗି ବହୁ ଜୀବନହାନୀ ଘଟୁଛି । ଏନେଇ ବାରମ୍ବାର ଅଭିଯୋଗ ହେଉଥିଲେ ମଧ୍ୟ  ବନବିଭାଗ ଏବଂ ବିଦ୍ୟୁତ ବିଭାଗ ପକ୍ଷରୁ କୌଣସି ପଦେକ୍ଷପ ନେଉନାହିଁ । ଫଳରେ ମଣିଷ ଏବଂ ଜୀବଜନ୍ତୁଙ୍କ ଜୀବନ ଚାଲିଯାଉଛି । ଗତକାଲି ଉଲୁଣ୍ଡା ରେଂଜ ଅଧିନସ୍ଥ ମହୁଖଣ୍ଡି କେନାଲ ନିକଟରେ ଜନ୍ତୁଶିକାର ପାଇଁ ବିଛାଇଥିବା ବିଦ୍ୟୁତତାର ଲାଗି ଦୁଇଟି ପୋଢର ମୃତ୍ୟୁ ଘଟିଛି । ଏନେଇ  ପୋଢର ମାଲିକ ବୀରମହାରାଜପୁର ଥାନାରେ ଅଭିଯୋଗ କରିଛନ୍ତି । ସୂଚନା ଅନୁସାରେ ସୁଲିଆ ଗ୍ରାମର ସୁୁରେଶ ଭୋଇଙ୍କ  ଦୁଇଟି ପୋଢ ଗତ ୨୨ ତାରିଖ ଦିନ ଚାରଣ ପାଇଁ ଜଙ୍ଗଲକୁ ଚାଲିଯାଇଥିଲେ । ମାତ୍ର ପୋଢ ଦୁଇଟି ଘରକୁ ଫେରିବାରେ ବିଲମ୍ବ ହେବାରୁ ଖୋଜା ଖୋଜି କଲାପରେ ମଧ୍ୟ ପାଇନଥିଲେ । ଗତ ୨୪ ତାରିଖ ଦିନ ଦୁଇଟି ପୋଢ ମହୁଖଣ୍ଡି ଗାଁର କେନାଲ ନିକଟରେ ମରି ପଡିଥିବା ଖବର ପ୍ରଚାରିତ ହେବାପରେ ସୁୁରେଶ ଘଟଣା ସ୍ଥଳରେ ପହଂଚି ଦେଖିଲାପରେ ଜନ୍ତୁ ଶିକାର ପାଇଁ ବିଛାଇଥିବା ତାର ଲାଗି  ପୋଢ ଦୁଇଟି ମରିଥିବା ଜାଣିପାରିଥିଲେ । ଏନେଇ ସୁରେଷ  ଅଭିଯୁକ୍ତ ମାନଙ୍କୁ ଗିରଫ ଦାବି ନେଇ ବୀରମହାରାଜପୁର ଥାନାରେ ଲିଖିତ ଭାବରେ ଅଭିଯୋଗ କରିଥିଲେ । ଅଭିଯୋଗ ପରେ ପୁଲିସ ଏକ ମାମଲା ରୂଜୁ  କରିବା ସହ ଘଟଣା ସ୍ଥଳରୁ କିଛି ବିଦ୍ୟୁତ ତାର ଜବତ କରିଥିବା ଜଣାପଡିଛି । 
 ସେହି ଘଟଣା ଦିନ  ବନବିଭାଗକୁ  ଖବର ଦିଆଯାଇଥିଲେ  ମଧ୍ୟ ଘଟଣା ସ୍ଥଳକୁ କେହି ଆସିନଥିଲେ । ଏଣୁ  ଶୁରେଷ ସୁବର୍ଣ୍ଣପୁର ଡିଏଫଓଙ୍କ  ଦ୍ୱାରସ୍ଥ ହୋଇଥିଲେ । ମାତ୍ର ଡିଏଫଓ ତାଙ୍କ କଥା ନଶୁଣି ରେଂଜରଙ୍କ ପାଖକୁ ଯାଅ ବୋଲି କହିଥିଲେ । ସେଠାରୁ ନିରାଶ ହୋଇ ପୁଣି ଉଲୁଣ୍ଡା ରେଜଂରଙ୍କ ପାଖକୁ ଆସି ଘଟଣା ବିଷୟରେ ଜଣାଇଥିଲେ । ମାତ୍ର ରେଂଜର  ଜଣେ ଗାର୍ଡକୁ ଫୋନକରି  ଘଟଣା ସ୍ଥଳକୁ ଯାଇ ରିପୋର୍ଟ ଦେବା ପାଇଁ ନିର୍ଦେଶ ଦେଇ କାମ ସାରି ଦେଇଥିଲେ । । ବନବିଭାଗର ଏଭଲି କାର୍ଯ୍ୟଧାରାକୁ ବୁଦ୍ଧିଜୀବି ତଥା ପ୍ରାଣୀପ୍ରେମୀ  ମହଲରେ ଗଭୀର ଅଘାତ ଦେଇଛି । ପ୍ରକାଶ ଯୋଗ୍ୟ ଯେ ଉଲୁଣ୍ଡା  ଆଭ୍ୟନ୍ତରୀଣ ଜଙ୍ଗଲ ଅଂଚଲରେ ବିଦ୍ୟୁତ ତାର ବିଛାଇ ଜନ୍ତୁ ଶିକାର କରିବା ଚିରାଚରିତ ପ୍ରଥା ହୋଇ ରହିଛି । ବିଦ୍ୟୁତ ତାର ଲାଗି ସାଧାରଣ ଜନ୍ତୁ ନୁହେଁ ହାତୀ ମଧ୍ୟ ମରିବା ନଜିର ରହିଛି । ଏହାର ସମାଧାନ ପାଇଁ ଜଙ୍ଗଲ ଅଂଚଲରେ କେବୁଲ ତାର ଦେବା ପାଇଁ ବାରମ୍ବାର ଦାବି ହେଉଥିଲେ ମଧ୍ୟ ବିଦ୍ୟୁତ ବିଭାଗ କର୍ଣ୍ଣପାତ କରୁନଥିବା ବେଳେ ଜଙ୍ଗଲ ବିଭାଗର ମଧ୍ୟ ପେଟ୍ରୋଲିଂ ବ୍ୟବସ୍ଥା ଢିଲା ରହୁଥିବାରୁ ବାରମ୍ବାର ଉପରୋକ୍ତ ଘଟଣା ଘଟୁଥିବା ଅଭିଯୋଗ ହେଉଛି । ଏନେଇ ରେଂଜର ଶିବ ପ୍ରଶାଦ ନାଏକଙ୍କୁ ଯୋଗାଯୋଗ କରାଜିବାରୁ ଫୋନ ଉଠାଇନଥିଲେ । ଯଥାଶିଘ୍ର ଶୁରେଷଙ୍କୁ କ୍ଷତିପୁରଣ ଦେବା ସହ ଅଭିଯୁକ୍ତ ମାନଙ୍କ ବିରୋଦ୍ଧରେ କଡା କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି ହେଉଛି ।