28-May-2021

ବଲାଙ୍ଗିର(ପ୍ରେରଣା ଖବର)- ଦେଓଗାଁ ବ୍ଲକ କୁତୁର୍ଲା ପଂଚାୟତ ଅନ୍ତର୍ଗତ ପର୍ଶୁପାଲି ନିବାସୀ ତଥା ଅବସରପ୍ରାପ୍ତ ସୈନିକ ନାରାୟଣ ନାୟକଙ୍କ ଧର୍ମପତ୍ନୀ ଶ୍ରୀମତୀ ପଙ୍କଜିନୀ ନାୟକ(୫୮)ଙ୍କ ଆଜି ପୂର୍ବାହ୍ନରେ ବଲାଙ୍ଗିରସ୍ଥିତ କୋଭିଡ ହାସ୍ପିଟାଲରେ ପରଲୋକ ହୋଇଯାଇଛି । ଶ୍ରୀମତୀ ନାୟକ  ମେରୁଦଣ୍ଡ ଓ ସ୍ନାୟୁଗତ ରୋଗରେ ପୀଡିତ ଥିବା ବେଳେ କିଛି ଦିନ ତଳେ କରୋନାରେ ଆକ୍ରାନ୍ତ ହୋଇଥିଲେ । ସେ ହୋମ ଆଇସୋଲେସନରେ ରହି ଚିକିତ୍ସିତ ହେଉଥିଲେ । ଶରୀରରେ ଅମ୍ଲଜାନ କମି ଯିବାରୁ ତାଙ୍କୁ ଘରେ ଅମ୍ଲଜାନ ଦିଆଯାଇଥିଲା । ପରେ ସ୍ୱାସ୍ଥ୍ୟରେ ଅବନତି ଘଟିବାରୁ ତାଙ୍କୁ ବଲାଙ୍ଗିର କିମ୍ସ ହସ୍ପିଟାଲକୁ ସ୍ଥାନାନ୍ତରିତ କରାଯାଇଥିଲା । ସେଠାରେ ତିନିଦିନ ଚିକିତ୍ସିତ ହେବା ପରେ ଆଜି ପୂର୍ବାହ୍ନରେ ଶ୍ରୀମତୀ ପଙ୍କଜିନୀ ନାୟକଙ୍କ ମୃତ୍ୟୁ ଘଟିଥିଲା । ଶ୍ରୀମତୀ ନାୟକ ଜଣେ ପରୋପକାରୀ ତଥା ଧର୍ମପରାୟଣା ମହିଳା ଭାବରେ ଜଣାଶୁଣା ଥିଲେ । କବି ତଥା କଳାକାର ମଧୁସୂଦନ ନାୟକଙ୍କ ଭାଉଜ  ହେଉଛନ୍ତି ଶ୍ରୀମତୀ ନାୟକ । ଶ୍ରୀମତୀ ନାୟକଙ୍କ ଅକାଳ ବିୟୋଗରେ ଦେଓଗାଁ ଅଂଚଳରେ ଶୋକର ଛାୟା ଖେଳି ଯାଇଛି ।