28-May-2021

ସୋନପୁର, ( ମନୋରଞ୍ଜନ ତ୍ରିପାଠୀ):  ରାଜ୍ୟ ସରକାର ଦୀର୍ଘ ମାସରୁ ଡିଣ୍ଡିମି ପିଟିଲେ ଓ ଗଣମାଧ୍ୟମରେରେ ପ୍ରକାଶ କଲେ ଯେ,  ରାଜ୍ୟରେ ୧୮ ବର୍ଷରୁ ଉର୍ଦ୍ଧ୍ୱ ଯୁବସମାଜ ପାଇଁ ଯୁଦ୍ଧ କାଳୀନ ଭିତ୍ତିରେ କୋଭିଡ  ଟୀକାକରଣ ଆରମ୍ଭ କରାଯିବ।  । କିନ୍ତୁ ଏହି ଟୀକାକରଣ କେନ୍ଦ୍ର ବଲାଙ୍ଗୀର ଓ ସୁବର୍ଣ୍ଣପୁର ଜିଲ୍ଲାର କୌଣସି ଗୋଟିଏ ବି ଜାଗାରେ ନହୋଇ ଥିବାରୁ ଉଭୟ ଜିଲ୍ଲାର ଜନସାଧାରଣଙ୍କ ମନରେ ଘୋର ଅସନ୍ତୋଷ ସୃଷ୍ଟି ହୋଇଛି। ଏଠାକାର ଯୁବକ ଓ ଜନସାଧାରଣ ୯୬ କିମି ଦୂର  ସମ୍ବଲପୁରକୁ ଟୀକା ନେବାପାଇଁ ଯାଉଥିବା ପରିଲକ୍ଷିତ ହୋଇଛି। ଏହାଦ୍ୱାରା ସେମାନେ କେବଳ ହଇରାଣ ଓ  ଖର୍ଚାନ୍ତ  ହେଉଛନ୍ତି ତା ନୁହେଁ  ଅନେକ ଦୂର ଓ ବଡ଼ ସହରକୁ ଯୁବକ ମାନେ ଯିବା ଆସିବା କରି କୋଭିଡ  ଟୀକା ପ୍ରୋଟେକ୍ସନ ଆଶା ବଦଳରେ କୋଭିଡ ଇନଫେକ୍ସନର ଖୁବ ଆଶଙ୍କା  ଦେଖା ଦେଇଛି  ବୋଲି ବରିଷ୍ଠ ବିଜେପି ନେତା ତଥା ବରିଷ୍ଠ ଆଇନଜ୍ଞ  ବଳଦେବ ବେଦବାକ ଅଭିଯୋଗ କରିଛନ୍ତି। ତେବେ ବଲାଙ୍ଗୀର ଓ ସୁବର୍ଣ୍ଣପୁର ଜିଲ୍ଲାରେ ତିନୋଟି କ୍ୟାବିନେଟ ମନ୍ତ୍ରୀ ତଥା ଅର୍ଥମନ୍ତ୍ରୀ,  ବାଣିଜ୍ୟ ପରିବହନ, ଯୋଜନା ଓ ସମନ୍ୱୟ ମନ୍ତ୍ରୀ, ମହିଳା ଓ ଶିଶୁକଲ୍ୟାଣ ମନ୍ତ୍ରୀ ପୁଣି ପଶ୍ଚିମ ଓଡିଶା ବିକାଶ ପରିଷଦ ଅଧ୍ୟକ୍ଷ ଥିବା ବେଳେ ଏଠାରେ ଟୀକାକରଣ କେନ୍ଦ୍ର ହୋଇ ନପାରିବା ଦୁଃଖର ବିଷୟ ଅଟେ l ଯେଉଁ ଛାତ୍ର ଓ ଯୁବକଙ୍କୁ ଆମ ଦେଶର ଉଜ୍ବଳ  ଭବିଷ୍ୟତ ବୋଲି  ଅଭିଭାଷଣରେ ଏଇ ନେତା ମନ୍ତ୍ରୀ କହୁଛନ୍ତି ଏଠି କିନ୍ତୁ ପରୋକ୍ଷ ଭାବେ ପୁଣି ସେଇ  ଯୁବ ସମାଜକୁ ମୃତ୍ୟୁ ଆଗକୁ ଠେଲି ଦିଆଯାଇଛି ବୋଲି ବିଜେପି ନେତା ଶ୍ରୀ ବେଦବାକ୍ କ୍ଷୋଭ ପ୍ରକାଶ କରିଛନ୍ତି l ଆଗାମୀ ଦିନରେ ସୋନପୁର ଓ ବଲାଙ୍ଗୀର ଜିଲ୍ଲାରେ ଟୀକାକରଣ କେନ୍ଦ୍ର ନହେଲେ ତୀବ୍ର ଆନ୍ଦୋଳନ କରିବାକୁ ବିଜେପି ନେତା ଶ୍ରୀ ବେଦବାକ୍ ଧମକ  ଦେଇଛନ୍ତି।