23-May-2021

ଗୋଶାଲା(ସଂଜୀବ ପାଣିଗ୍ରାହୀଙ୍କ ରିପୋର୍ଟ ):  ବର୍ତ୍ତମାନ କରୋନା ମହାମାରୀ ସଂକ୍ରମଣ ଜନସାଧାରଙ୍କୁ ଭୟଭୀତ କରିପକାଇଛି। ଏ ନେଇ ସଂକ୍ରମଣର ଶିକାର ହୋଇ ଅନେକଙ୍କ ଜୀବନ ମଧ୍ୟ ଯାଉଛି । ଏ ନେଇ ସଂକ୍ରମଣକୁ ରୋକିବାକୁ ଯାଇ ସରକାର ଟୀକାକରଣ, ଲକ୍ ଡାଉନ,ସଟଡାଉନ ଭଳି ଏକାଧିକ ପଦକ୍ଷେପ ମଧ୍ୟ ନେଇଛନ୍ତି, ହେଲେ ଟୀକାକରଣରରେ ପାତରଅନ୍ତର ହେଉଥିବା ଅଭିଯୋଗ ହେଉଛି । ଟୀକାକରଣରୁ ବଞ୍ଚିତ ଜନସାଧାରଣଙ୍କୁ ଏହା ବ୍ୟଥିତ କରିଛି। ଏପରି ଏକ ଅଭିଯୋଗ ଆସିଛି ସମ୍ବଲପୁର ଜିଲା ଧନକଉଡା ବ୍ଲକ କର୍ଡୋଲା ପଞ୍ଚାୟତ ଜନସାଧାରଣଙ୍କ ପକ୍ଷରୁ। ଏହି ଅଞ୍ଚଳର ଚିପିଲିମାଠାରେ ଅନେକଙ୍କୁ ପ୍ରଥମ ଡୋଜ ଟୀକା ମାସାଧିକ କାଳ ପୂର୍ବରୁ ଦିଆ ହୋଇଥିବାବେଳେ ଅନେକ ଟୀକାକରଣରୁ ବଞ୍ଚିତ ମଧ୍ୟ ଅଛନ୍ତି।ଆଖପାଖ ପଞ୍ଚାୟତରେ ଦ୍ବିତୀୟ ଡୋଜ ଟିକା ଦିଆ ସରିଯାଇଥିବା ବେଳେ, କର୍ଡୋଲା ପଞ୍ଚାୟତବାସୀ ଦ୍ବିତୀୟ ଡୋଜରୁ ବଞ୍ଚିତ ଅଛନ୍ତି। ଚିପିଲିମାରେ କରୋନା ସଂକ୍ରମଣରେ ଦୁଇଜଣଙ୍କ ମୃତ୍ୟୁ ଘଟିଥିବା ବେଳେ ଏହି ସଂକ୍ରମଣ ବୃଦ୍ଧି ପାଇବାରୁ ମଝିରେ ଏହି ଅଞ୍ଚଳକୁ କନଟେନମେଣ୍ଟ ଜୋନ ମଧ୍ୟ ଘୋଷଣା ହୋଇଥିଲା। ତେବେ ଏପରି ଏକ ସମ୍ବେଦନଶୀଳ ପ୍ରସଙ୍ଗ ପାଇଁ ଲୋକେ ଭୟଭୀତ ହୋଇ ଜୀବନ ଅତିବାହିତ କରୁଥିବା ବେଳେ ଏ ଅଞ୍ଚଳ ପାଇଁ ଦ୍ବିତୀୟ ଡୋଜ ଟୀକାକରଣ ବ୍ୟବସ୍ଥା ନ ହେବା ନେଇ ଲୋକଙ୍କମନରେ ଅସନ୍ତୋଷ ଦେଖାଦେଇଛି । ଏଣୁ ଜିଲା ପ୍ରଶାସନ ତଥା ଜନପ୍ରତିନିଧି ଏ ଦିଗରେ ଯତ୍ନବାନ ହୋଇ ଯଥାଶିଘ୍ର ପଦକ୍ଷେପ ନେବାକୁ ଦାବି ହେଉଛି। ଏଥିସହ କରୋନା ଟୀକାକରଣରୁ ବଞ୍ଚିତ ଜନସାଧାରଣଙ୍କ ପାଇଁ ଟୀକାକରଣ କରିବାକୁ ଦାବି ହେଉଛି।