16-May-2021

ସମ୍ବଲପୁର,(ସଂଜୀବପାଣିଗ୍ରାହୀଙ୍କରିପୋର୍ଟ): କୋଭିଡ-୧୯ ମହାମାରୀର କରାଳ ଗର୍ତ୍ତରେ ସମଗ୍ର ମାନବ ସମାଜ ଆଜି ଆର୍ତ୍ତନାଦ କରୁଛି I ଆଗାମୀ ଦଶନ୍ଧି ମଧ୍ୟରେ ପ୍ରାୟ ଦଶ ଲକ୍ଷ ପ୍ରଜାତି ର ଉଦ୍ଭିଦ ଓ ପ୍ରାଣୀଙ୍କ ପ୍ରତି ଘୋର ବିପଦ ରହିଥିବା ଦର୍ଶାଇ ମଣିଷ ତାର ଆଚରଣ ରେ ପରିବର୍ତ୍ତନ ନ ଘଟିଲେ ଆଗାମୀ ଦିନରେ ପୃଥିବୀ ପୃଷ୍ଠରୁ ସମଗ୍ର ମଣିଷ ସମାଜ ଲୋପ ପାଇପାରେ ବୋଲି ବୈଜ୍ଞାନିକ ମାନେ ଭବିଷ୍ୟବାଣୀ କଲେଣି I କରୋନାର ଏହି କରାଳ ଛାୟା ପରିସ୍ଥିତିକୁ  ବିଷମ କରିଥିବାବେଳେ ସାଧାରଣ ରୋଗୀ କିମ୍ବା ତାର ପରିଜନ ଏହି ପରିସ୍ଥିତିକୁ ସାମ୍ନା କରିବା ପାଇଁ ଅସହାୟ  ହୋଇପଡୁଛନ୍ତି I ସଠିକ୍ ସୂଚନାପ୍ରଦାନ  ଓ ଯୋଗାଯୋଗ କ୍ଷେତ୍ରରେ ସମନ୍ଵୟର ଅଭାବ ରହୁଛି I ଏଭଳି ଅଭାବନୀୟ ପରିସ୍ଥିତି ସଂକ୍ରାନ୍ତରେ ବୁଝାପଡ଼ିବା ପୂର୍ବରୁ ବହୁ ମୂଲ୍ୟବାନ ଜୀବନ ଅକାଳରେ ଚାଲିଯାଉଛି I
                 ମହାମାରୀର ଏହି ଉତ୍କଟ ପରିସ୍ଥିତିକୁ କିନ୍ତ ସରକାରୀ ବାବୁ, ଡାକ୍ତର, ନର୍ସ, ବେସରକାରୀ ସଙ୍ଗଠନ ଗୁଡିକ ନିୟୋଜିତ ହୋଇ ଦୃଢ ମୁକାବିଲା କରୁଛନ୍ତି I ପରିସ୍ଥିତିର ଗମ୍ଭୀର ଅବ୍ୟବସ୍ଥା ମଧ୍ୟରେ କିନ୍ତ, ରୋଗୀ ଛଟପଟ ହେଉଥିବାର ବିକଳ ଚିତ୍ର ସାମ୍ନାକୁ ଆସୁଛି I
               ସମ୍ପ୍ରତି କୋଭିଡ ପରିଚାଳନାରେ ଦେଖାଯାଉଥିବା ସାଙ୍ଘାତିକ ବ୍ୟତିକ୍ରମ ରେ କିନ୍ତ, ଗଣତନ୍ତ୍ର ବିଧିବ୍ୟବସ୍ଥା ମଧ୍ୟରେ ସମ୍ବଲପୁର ଜ଼ିଲ୍ଲାର ନିର୍ବାଚିତ ଜନପ୍ରତନିଧି ମାନେ ଆଜି ନିଖୋଜ  ହୋଇପଡିଛନ୍ତି I ଏଭଳି କ୍ଷେତ୍ରରେ ଜ଼ିଲ୍ଲାର ନିର୍ବାଚିତ ଜନ ପ୍ରତିନିଧି ମାନେ ତାଙ୍କର ଉତ୍ତରଦାୟୀତ୍ୱ ନିର୍ବାହ ପୂର୍ବକ କୋଭିଡ ପରିଚାଳନାର ସମୀକ୍ଷା ବା ତଦାରଖ କରିବା ପରିବର୍ତ୍ତେ  ଆଜି ଗାତୁଆ ମୂଷା ପାଲଟିଥିବା ଦେଖାଯାଇଛି I ସରକାରୀ କାର୍ଯ୍ୟକୁ ପୁଙ୍ଖାନୁପୁଙ୍ଖ ତଦନ୍ତ ତଦାରଖ କରୁଥିବା ଏହି  ଜନପ୍ରତିନିଧି ମାନଙ୍କ ସକାଶେ କୋଭିଡ ପରିଚାଳନା ର ସମୀକ୍ଷା ପ୍ରଣୀଧାନଯୋଗ୍ୟ ନୁହେଁ କି ? ନା ଏଥିରେ ପ୍ରଶାସନିକ ବାଧା ରହିଛି ? ଏହି କ୍ଷେତ୍ରରେ କିନ୍ତୁ, ଉଦାହରଣ ପାଲଟିଛନ୍ତି ପୂର୍ବତନ କେନ୍ଦ୍ରମନ୍ତ୍ରୀ ତଥା ସୁନ୍ଦରଗଡ଼ ଲୋକସଭା ସାଂସଦ ଜୁଏଲ ଓରାମ I କୋଭିଡ ହସ୍ପିଟାଲ ଭିତରକୁ ପିପିଇ କିଟ୍ ପରିଧାନ କରି ରୋଗୀଙ୍କ ଭଲ ମନ୍ଦ ବୁଝିବା ସହିତ କୋଭିଡ ପରିଚାଳନାର ସମୀକ୍ଷା କରୁଛନ୍ତି I 
       ତେବେ, ଏଭଳି ସଙ୍କଟ ବେଳେ ଲୋକଙ୍କ ପ୍ରିୟ ଭାଜନ ହେବା ପରିବର୍ତ୍ତେ କରୋନାର ହଟସ୍ପଟ ପାଲଟିଥିବା ସମ୍ବଲପୁର ଜ଼ିଲ୍ଲାରେ କିନ୍ତୁ ନିର୍ବାଚିତ ଜନପ୍ରତିନିଧି ମାନେ ଆଜି ନିଖୋଜ ଥିବା ଆଲୋଚନା ହେଉଛି I