28-Apr-2021

ବଲାଙ୍ଗିର, କରୋନା ଦ୍ୱିତୀୟ ଲହରରେ ଆକ୍ରାନ୍ତ ହୋଇ ଜିଲ୍ଲା ବିଶ୍ୱାବସୁ ଶବର ସଂଘ ସଭାପତି କଲାକାହ୍ନୁ ତୁମନିଆଙ୍କର ୭୪ ବର୍ଷ ବୟସରେ ବଲାଙ୍ଗିର ସ୍ଥିତ କୋଭିଡ ଡାକ୍ତରଖାନାରେ ଦେହାନ୍ତ ହୋଇଯାଇଛି । ଗତ ସପ୍ତାହରେ କରୋନା ସଂକ୍ରମିତ ଚିହ୍ନଟ ହେବା ପରେ ବଲାଙ୍ଗିର କୋଭିଡ ଡାକ୍ତରଖାନାରେ ଭର୍ତ୍ତି ହୋଇଥିଲେ । ତାଙ୍କ ବିୟୋଗରେ ସମସ୍ତ ଶବର ସମାଜ ତଥା ଆଦିବାସୀ ସମାଜ ମର୍ମାହତ ଓ ଦୁଃଖିତ । ଏହା ସମଗ୍ର ଆଦିବାସୀ ସମାଜର ଏକ ଅପୁରଣୀୟ କ୍ଷତି । ସେ ଜଣେ ମିଷ୍ଟ ଭାଷୀ, ପରୋପକାରୀ, ସଚ୍ଚୋଟ ଓ ନିରପେକ୍ଷ ଭାବେ ୧୯୮୮ ମସିହାରୁ ୧୯୯୬ ପର୍ଯ୍ୟନ୍ତ ପାଟଣାଗଡ ଉପଖଣ୍ଡ ସଭାପତି ଓ ୨୦୦୩ ମସିହାରୁ ମୃତ୍ୟୁ ପର୍ଯ୍ୟନ୍ତ ଜିଲ୍ଲା ସଭାପତି ଦାୟିତ୍ୱ ସୁଚାରୁ ରୂପେ ତୁଳାଇଥିଲେ । ଏପରିକି ସେ ଜଣେ ଦକ୍ଷ  ଶିକ୍ଷକ ରୂପେ ଘସିଏନ ହାଇସ୍କୁଲରେ ଶିକ୍ଷକତା କରି ୨୦୦୫ ମସିହାରେ ଅବସର ନେଇଥିଲେ ଓ ୨୦୧୨ ମସିହାରୁ ୨୦୧୭ ମସିହା ପର୍ଯ୍ୟନ୍ତ ଘସିଏନ ଗ୍ରାମ ପଂଚାୟତର ସରପଂଚ ରହିଥିବା ବେଳେ ବିଭିନ୍ନ ଉନ୍ନୟନ କାମ କରି ବେଶ ପ୍ରଶଂସନୀୟ ହୋଇଥିଲେ । ତାଙ୍କ ସହଧର୍ମିଣୀଙ୍କର ପୂର୍ବରୁ ଦେହାନ୍ତ ହୋଇଯାଇଛି । ତାଙ୍କର ଦୁଇଟି ପୁତ୍ର ଓ ଏକମାତ୍ର କନ୍ୟା ସହିତ ନାତି, ନାତୁଣୀ ରହିଛନ୍ତି । ତାଙ୍କ ମୃତ୍ୟୁରେ ବିଶ୍ୱାବସୁ ଶବର ସଂଘର ସମସ୍ତ କର୍ମକର୍ତ୍ତାଙ୍କ ସହିତ ସମଗ୍ର ପଶ୍ଚିମ ଓଡିଶାର ଶବର ସମାଜରେ ଗଭୀର ଶୋକ ପ୍ରକାଶ ପାଇଛି ।