28-Apr-2021

ଭୁବନେଶ୍ୱର: (ଶୁଭାଶିଷ ନାୟକ)ରାଜ୍ୟରେ ୧୮ରୁ ୪୪ ବର୍ଷ ବୟସ ଶ୍ରେଣୀର ୨ କୋଟି ଲୋକଙ୍କୁ ରାଜ୍ୟ ସରକାର ମାଗଣାରେ କୋଭିଡ୍ ଟିକା ପ୍ରଦାନ କରିବେ । ଆଜି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହି ଘୋଷଣା କରିଛନ୍ତି । ରାଜ୍ୟ ସରକାର ଏଥିପାଇଁ ୨ ହଜାର କୋଟି ଟଙ୍କା ଖର୍ଚ୍ଚ କରିବାକୁ ଲକ୍ଷ୍ୟ ରଖିଛନ୍ତି । ମୁଖ୍ୟମନ୍ତ୍ରୀଙ୍କ ଏହି ନିଷ୍ପତ୍ତିକୁ ସମର୍ଥନ ଜଣାଇ ମାଗଣା ଟିକାକରଣ ପ୍ରକ୍ରିୟା ସହଯୋଗର ହାତ ବଢ଼ାଇଛନ୍ତି ବିଜେଡି ରାଜ୍ୟସଭା ସାଂସଦ ଅମର ପଟ୍ଟନାୟକ ଏବଂ ଓଟିଡିସି ଅଧ୍ୟକ୍ଷା ଶ୍ରୀମୟୀ ମିଶ୍ର । ଉଭୟେ ମୁଖ୍ୟମନ୍ତ୍ରୀଙ୍କ ରିଲିଫ୍ ପାଣ୍ଠିକୁ ଲକ୍ଷେ ଟଙ୍କା ଲେଖାଏଁ ଦାନ କରିଛନ୍ତି ।
ଏନେଇ ଶ୍ରୀ ପଟ୍ଟନାୟକ ଟ୍ୱିଟ୍ କରି କହିଛନ୍ତି ଯେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପୁଣିଥରେ ସାଢେ଼ ଚାରିକୋଟି ଓଡ଼ିଆଙ୍କ ପରିବାରର ପ୍ରକୃତ ମୁରବୀ ଭାବେ ନିଜକୁ ପ୍ରମାଣିତ କରିଛନ୍ତି । ନିଜ ପରିବାରର ସୁରକ୍ଷା ପାଇଁ ପଦକ୍ଷେପ ନେଇ ସେ ଆମ ସମସ୍ତଙ୍କ ପାଇଁ ମାଗଣା ଟିକା ଘୋଷଣା କରିଛନ୍ତି । ତେବେ ଏଥିପାଇଁ ରାଜ୍ୟ ଅତିରିକ୍ତ ୨୦୦୦କୋଟିର ବୋଝ ସହିବ । ଏଣୁ ଜଣେ ଜଣେ ଗର୍ବିତ ଓଡ଼ିଆ ଭାବରେ ଆମେ ସହଯୋଗର ହାତ ବଢେଇବା ଦରକାର । ମୁଁ ସମସ୍ତଙ୍କୁ ଅନୁରୋଧ କରୁଛି ଆଗକୁ ଆସନ୍ତୁ, ବିଶେଷକରି ଯେଉଁମାନେ ଆର୍ଥôକ ଦୃଷ୍ଟିରୁ ବହୁତ ଭାଗ୍ୟଶାଳୀ ସେମାନେ ମୁଖ୍ୟମନ୍ତ୍ରୀଙ୍କ ରିଲିଫ୍ ପାଣ୍ଠିରେ ସହଯୋଗ କରନ୍ତୁ ଏବଂ ଆମର ଗର୍ବିତ ରାଜ୍ୟ ଓଡିଶା ଏବଂ ସମସ୍ତ ଓଡ଼ିଆଙ୍କୁ ସାହାଯ୍ୟ କରନ୍ତୁ । ସେହିଭଳି ଓଟିଡିସି ଅଧ୍ୟକ୍ଷା ଶ୍ରୀମତୀ ମିଶ୍ର ନିଜ ପ୍ରତିକ୍ରିୟାରେ ମୁଖ୍ୟମନ୍ତ୍ରୀଙ୍କ ଏହି ନିଷ୍ପତ୍ତିକୁ ଐତିହାସିକ ବୋଲି କହିଛନ୍ତି ।