28-Apr-2021

ଭୁବନେଶ୍ୱର : (ଶୁଭାଶିଷ ନାୟକ)କରୋନା  ଟିକା ନେବା ପରେ ବି ସଂକ୍ରମିତ ହେବାର ଆଶଙ୍କା ରହିଛି । କିନ୍ତୁ ଏହି ସଂକ୍ରମଣ ଏତେଟା କ୍ଷତିକାରକ ହେବ ନାହିଁ   । ଟିକା ନେଇଥିବା ବ୍ୟକ୍ତିମାନେ  ସଂକ୍ରମିତ ହେଲେ ଗୁରୁତର ହେବାର ସମ୍ଭାବନା କମ ବୋଲି କହିଛନ୍ତି ରାଜ୍ୟ ସରକାରଙ୍କ କୋଭିଡ୍ ସଂପର୍କିତ ବୈଷୟିକ ପରାମର୍ଶଦାତା ଡ.ଜୟନ୍ତ ପଣ୍ଡା  ।
ଦେଶରେ କରୋନା ସଂକ୍ରମଣ ବଢି ଚାଲିଥିବା ବେଳେ ସଂକ୍ରମଣ ରୋକିବା ପାଇଁ ରାଜ୍ୟ ସରକାରଙ୍କ ପକ୍ଷରୁ ବିଭିନ୍ନ ପଦକ୍ଷେପ ଗ୍ରହଣ କରାଯାଉଛି । ରାଜ୍ୟ ସରକାରଙ୍କ ପକ୍ଷରୁ ଆୟୋଜିତ ଏକ କାର୍ଯ୍ୟକ୍ରମରେ ଯୋଗଦେଇ ଡ.ଜୟନ୍ତ ପଣ୍ଡା କହିଛନ୍ତି, ଗତ ବର୍ଷ ତୁଳନାରେ ଦ୍ୱିତୀୟ ଲହରୀ ଅଧିକ ସଂକ୍ରାମକ ରହିଛି  । ପ୍ରଥମ ଲହର ତୁଳନାରେ ୨ୟ ଲହରରେ ସଂକ୍ରମଣ ସଂଖ୍ୟା ଅତ୍ୟଧିକ ରହିଛି  । ସବୁ ବର୍ଗର ଲୋକଙ୍କୁ ଏହି ଷ୍ଟ୍ରେନ ସଂକ୍ରମିତ କରୁଛି  । ଯୁବବର୍ଗ ଓ ଶିଶୁମାନଙ୍କୁ ମଧ୍ୟ ଏହା ସଂକ୍ରମିତ କରୁଛି  । ତେବେ ଆଶ୍ୱସ୍ତିର କଥା ହେଉଛି ମୃତ୍ୟୁ ହାର ଏପର୍ଯ୍ୟନ୍ତ ସୁଦ୍ଧା କମ ରହିଛି  ।
ସେ କହିଛନ୍ତି ଯେ ଏହି ମ୍ୟୁଟାଣ୍ଟ ଷ୍ଟ୍ରେନ ବାୟୁମଣ୍ଡଳରେ ଅଧିକ ସମୟ ରହୁଛି  । ଏଣୁ କାର ଭିତରେ, ଥିଲେ ବା ଘରେ ଥିଲେ ମଧ୍ୟ ସଂକ୍ରମିତ ହେବାର ସମ୍ଭାବନା ରହିଛି । ତେଣୁ ଘରେ ଅବା କାରରେ ଥିବା ବେଳେ  ବି ମାସ୍କ ପିନ୍ଧିବାକୁ ସେ ପରାମର୍ଶ ଦେଇଛନ୍ତି ।  ଯେଉଁମାନେ କପଡ଼ା ମାସ୍କ ପିନ୍ଧୁଛନ୍ତି ସେମାନେ ଡବଲ ମାସ୍କ ପିନ୍ଧିବା ଆବଶ୍ୟକ ବୋଲି ସେ କହିଛନ୍ତି  ।