24-Apr-2021

ବଲାଙ୍ଗିର,(ପ୍ରେରଣା ଖବର) ଭୋକର ଦାଉରୁ ବଂଚିବା ପାଇଁ ଚୁମକି ବାଗ ନିଜର ଦୁଇଟି ଛୋଟ ଝିଅ ଏବଂ ପେଟରେ ଏକ ପିଲା ଧରି ସ୍ୱାମୀ, ଶାଶୁ ସହ ଇଟାକାମ ପାଇଁ ସୁଦୁର ହାଇଦ୍ରାବାଦ ଯାଇଥିଲା । ପ୍ରସବ ସମୟ ହେବାରୁ ମୁରିବାହାଲ ବ୍ଲକର ନିଜ ଗାଁ ବାରବନ୍ଧକୁ ଫେରୁଥିଲା । ବାଟରେ ପ୍ରସବ ଜନିତ ଯନ୍ତ୍ରଣା ହେବାରୁ ବିଶାଖାପାଟଣାର ଏକ ନସିଂହୋମରେ ଭର୍ତ୍ତି ହୋଇଥିଲା । ସେଠାରେ ଚୁମକିର ମୃତ୍ୟୁ ଘଟିଥିଲା । ନସିଂହୋମର ପ୍ରାପ୍ୟ ଘରକୁ ଚୁମକିର ଶବକୁ ଆଣିବା ପାଇଁ ସ୍ୱାମୀ ପାଖରେ ଅର୍ଥ ନ ଥିଲା । ସାମାଜିକ କର୍ମୀ ସୁଷମା ବଏଙ୍କ ଠାରୁ ଖବର ପାଇ ଗଣ୍ଡାବଜା ଚୁମକିର ଶବ ଗାଁକୁ ଆଣିବା ପାଇଁ ସୋସିଆଲ ମିଡିଆ ମାଧ୍ୟମରେ ପ୍ରଶାସନ, ବିଭାଗୀୟ ମନ୍ତ୍ରୀଙ୍କ ଜଣାଇଥିଲା । କିଛି ସୁଫଳ ମିଳିନଥିଲା । ଗଣ୍ଡାବଜାର ଅନୁରୋଧ କ୍ରମେ ସାମାଜିକ କର୍ମୀ ଯୁଗଲାଲ ନନ୍ଦ, ଭାରତୀୟ ରାଷ୍ଟ୍ରୀୟ ଦଳିତ ସଭାର ସଭାପତି ମିଳନ ଦାସଙ୍କୁ ଘଟଣାଟି ଅବଗତ କରାଇଥିଲେ । ମିଳନ ଦାସ ସାମାଜିକ କର୍ମୀ ଷ୍ଟାଲିନଙ୍କ ସହ ଯୋଗାଯୋଗ କରିଥିଲେ । ସାମାଜିକ କର୍ମୀ ଷ୍ଟାଲିନ୍ ଆମ୍ବୁଲାନ୍ସ ଭଡା ବାବଦକୁ ୨୪ହଜାର ଏବଂ ବାଟଖର୍ଚ୍ଚ ବାବଦକୁ ୫ହଜାର ଟଙ୍କା ସହାୟତା ରାଶି ପ୍ରଦାନ କରିଥିଲେ । ଫଳରେ ଚୁମକିର ଶବ ଗାଁକୁ ଆସିପାରିଥିଲା । ବାପା, ମାଆଙ୍କ ଏକମାତ୍ର ଝିଅ ଚୁମକି ଦୁଇଟି ଛୋଟ ଛୁଆକୁ ଛାଡି ଯାଇଛି । ଶୋକାକୂଳ ପରିବେଶରେ ଚୁମକିର ଶବ ସତ୍କାର କରାଯାଇଛି । ବିନା ପଞ୍ଜିକରଣରେ ଦାଦନ ଯାଇଥିବାରୁ ଅନେକ ସରକାରୀ ସୁବିଧାରୁ ବଂଚିତ ହେବେ ଚୁମକି ର ପରିବାର । ଅସେଚନ ଦାଦନକୁ ସଚେତନ କରି ପଞ୍ଜିକରଣ ମାଧ୍ୟମରେ ଦାଦନ ଚାଲାନ ନିୟମ ଥିଲେ ମଧ୍ୟ ଜିଲ୍ଲା ଶ୍ରମ ବିଭାଗ ଅଧିକାରୀ ଦଲାଲ ସାଜି ଥିବାରୁ ସମ୍ଭବ ହେଉନାହିଁ । ଚୁମକି ପରି ଅତିତରେ ଅନେକ ଲୋକର ଜିବନ ଯାଇଥିଲେ ମଧ୍ୟ ଶ୍ରମ ବିଭାଗର ଚେତା ପଶୁ ନାହିଁ । ଚୁମକିର ମୃତ୍ୟୁ ପାଇଁ ପରୋକ୍ଷରେ ଜିଲ୍ଲା ଶ୍ରମ ଅଧିକାରୀ ମଧ୍ୟ ଦାୟୀ । ଏଣୁ ଜିଲ୍ଲା ଶ୍ରମ ଅଧିକାରୀଙ୍କୁ ତୁରନ୍ତ ଚାକିରିରୁ ନିଳମ୍ବନ କରିବାକୁ ‘ଗଣ୍ଡାବଜା’ ପତ୍ରିକାର ସଂପାଦକ ତ୍ରିଲୋଚନ ନନ୍ଦ ଦାବି କରିଛନ୍ତି । ‘ଗଣ୍ଡାବଜା’ ବିକଳାଙ୍ଗ ହିମାଦ୍ରୀ ସୁନା ର ଦୁଷ୍କର୍ମ ଗର୍ଭବତୀ ଘଟଣା, ସ୍ନେହଲତା ଦୁଷ୍କର୍ମ ହତ୍ୟା ଘଟଣା, ଚୁମକିର ମୃତ୍ୟୁ ଘଟଣା ଓ ଜିଲ୍ଲାରେ ନିସ୍ପେଷିତଙ୍କ ସ୍ୱର ଭାବରେ ଠିଆ ହେବାକୁ ପ୍ରୟାସ ଜାରି ରଖିବ ।