Prerana News : ଆଜି ଜନ୍ମ ଦିନ- ପଦ୍ମଶ୍ରୀ ଡ଼ଃ ନୀଳମାଧବ ପଣ୍ଡାଙ୍କ

ସୁବର୍ଣପୁର, ଓଡ଼ିଶାର ସୁବର୍ଣ୍ଣପୁର ଜିଲ୍ଲା ଭାରତ ମାନଚିତ୍ରରେ ଏକ ପଛୁଆ ଜିଲ୍ଲା ଭାବରେ ପରିଚିତ । ଭାରତ ପ୍ରସିଦ୍ଧ କେ.ବି.କେ ର ପ୍ରମୁଖ ଅଂଶୀଦାର । ଏହି ଜିଲ୍ଲାର ଇତିହାସ ଯେମିତି ପୁରୁଣା, ତାର ଐତିହ୍ୟ ମଧ୍ୟ ଉଚ୍ଚକୋଟୀର । ଏହାର ପରମ୍ପରା, ଐତିହ୍ୟ ଆଜି ମଧ୍ୟ ବଞ୍ଚି ରହିଛି ଲୋକଙ୍କ ଭିତରେ । ଏହାର ପ୍ରଚାର ପ୍ରସାର ପାଇଁ ଅଣ୍ଟା ଭିଡିଛନ୍ତି ଏହି ସୁବର୍ଣ୍ଣପୁର ଜିଲ୍ଲାର ସୁଯୋଗ୍ୟ ସନ୍ତାନ ମାନେ । ଏହି ସୁବର୍ଣ୍ଣପୁର ଜିଲ୍ଲାରୁ ବାହାରି ଏହି ଜିଲ୍ଲା ପାଇଁ ଗୋୖରବ ଆଣିଥିବା ଏପରି ଜଣେ ବ୍ୟକ୍ତିତ୍ୱ ହେଉଛନ୍ତି ପଦ୍ମଶ୍ରୀ ଡ଼ଃ ନୀଳମାଧବ ପଣ୍ଡା ।

*ସୁବର୍ଣ୍ଣପୁର ଜିଲ୍ଲାର ଉଲୁଣ୍ଡା ବ୍ଲକ ମାଁ ମେଟାକାନୀ ଏବଂ ପାତାଳୀ ଶ୍ରୀକ୍ଷେତ୍ର ପାଇଁ ପ୍ରସିଦ୍ଧ । ଏହି ଉଲୁଣ୍ଡା ବ୍ଲକରେ ମହାନଦୀ କୂଳରେ ରହିଛି ଏକ ଛୋଟ ଗ୍ରାମ ଦଶରାଜପୁର, ଏକ ଗରୀବ ତଥା ଅବହେଳିତ ଗ୍ରାମ ଭାବରେ ଜଣା ଥିଲା । ପାଞ୍ଚ ଭାଇ ଭଉଣୀ ମଧ୍ୟରେ ସବା ସାନ । ଗରିବ ପରିବାରରେ ଜନ୍ମ ଗ୍ରହଣ କରି ଛୋଟ ଦିନରୁ ଆରମ୍ଭ କରିଥିଲେ ସଂଗ୍ରାମ । ନିଜର ବାଲ୍ୟକାଳ ତଥା କିଶୋର ଅବସ୍ଥା କଟିଯାଇଥିଲା ଗୋଟିଏ ବେଳାର ଖାଇବା ତଥା ଅନ୍ୟାନ୍ୟ ଅତ୍ୟାବଶ୍ୟକ ସାମଗ୍ରୀ ପାଇଁ ସଂଘର୍ଷ କରିବାରେ* ।

*ବିନା କୋଠାବାଡିର ଗାଁ ବିଦ୍ୟାଳୟରେ ପଞ୍ଚମ ଶ୍ରେଣୀ ପାସ କରିବା ପରେ ଦୈନିକ ଚାରି କିଲୋମିଟର ଦୂର ବାଟ ଚାଲି ବିଦ୍ୟାଳୟ ଯାଉଥିଲେ । ଉଚ୍ଚ ବିଦ୍ୟାଳୟରେ ପାଠ ପଢ଼ିବା ପାଇଁ ତାଙ୍କୁ ଚାଲିବାକୁ ପଡ଼ୁଥିଲା ଦଶ କିଲୋମିଟର ବାଟ । ୧୯୯୫ ମସିହାର ସମୟ, ସ୍ନାତକରେ ହୋଇଥିଲେ ଅକୃତକାର୍ଯ୍ୟ । ପକେଟ ଥିଲା ଖାଲି କିନ୍ତୁ ମନରେ ଥିଲା କୋଟିଏ ଟଙ୍କାର ଦୃଢ଼ ମନୋବଳ ଏବଂ ଇଛାଶକ୍ତି । ସେଠାରେ ବିଭିନ୍ନ ସମୟରେ ଛୋଟମୋଟ କାମ କରି ପେଟ ପୋଷୁଥିଲେ । ଏପରି ଏକ ଘଡ଼ିସନ୍ଧି ମୁହୁର୍ତ୍ତ ରେ ତାଙ୍କ ଭାଗ୍ୟ ନେଇ ପହଞ୍ଚାଇଥିଲା ଏବଂ ସେ ପାଇଥିଲେ କାମ କ୍ୟାମେରା ସହାୟକର* ।

*ଏହିଠୁ ପରିବର୍ତ୍ତନ ହୁଏ ଭାଗ୍ୟର , ପାଲଟି ଯାଆନ୍ତି ନୀଳମାଧବ ପଣ୍ଡା ରୁ ପଦ୍ମଶ୍ରୀ ଡ଼ଃ ନୀଳମାଧବ ପଣ୍ଡା । ଧିରେ ଧିରେ ଶିଖିଥିଲେ ସିନେମା ନିର୍ଦ୍ଦେଶନା ତଥା କ୍ୟାମେରା ପରିଚାଳନା । ଇତିମଧ୍ୟରେ ଭାରତୀୟ ପରିଚାଳନା ପ୍ରତିଷ୍ଠାନ ବାଙ୍ଗାଲୋରରୁ ପଢ଼ିଥିଲେ ଉଦ୍ୟୋଗ । ପାଦ ଥାପିଥିଲେ ନିର୍ଦ୍ଦେଶନା ଏବଂ ପ୍ରଯୋଜନା କ୍ଷେତ୍ରରେ । ୭୦ରୁ ଅଧିକ ଚଳଚ୍ଚିତ୍ର ତଥା କ୍ଷୁଦ୍ର ଚଳଚ୍ଚିତ୍ର ରେ ସେ ହେଉଛନ୍ତି ପ୍ରଯୋଜକ ତଥା ନିର୍ଦ୍ଦେଶକ । ଜଳପରୀ,କ୍ଲାଇମେଟ୍ସ ଫାଷ୍ଟ ଅର୍ଫାନ୍,ଆଇ ଏମ୍ କାଲାମ୍,ଜଲପରୀ,କଡ଼ବି ହଓ୍ବା ଇତ୍ୟାଦି ତାଙ୍କର ଗୋଟିଏ ଗୋଟିଏ ବିଶେଷ କୃତି ।*

*ଆଇ ଏମ୍ କାଲାମ୍ ସିନେମା ପାଇଥିଲା ୩୪ ଗୋଟି ଆନ୍ତର୍ଜାତୀୟ ସମ୍ମାନ,ଜଳପରୀ ମଧ୍ୟ ଅନେକ ସ୍ଥାନରେ ସମ୍ମାନିତ ହୋଇଛି । ତାଙ୍କର ଅନେକ ଚଳଚ୍ଚିତ୍ର ତଥା ପ୍ରାମାଣିକ ଚଳଚ୍ଚିତ୍ର ଆନ୍ତର୍ଜାତିକ ସ୍ତରରେ ଉଚ୍ଚ ପ୍ରଶଂସିତ ହୋଇଛି । ଅନେକ ସ୍ଥାନରୁ ସେ ହୋଇଛନ୍ତି ସମ୍ମାନିତ । ଭାରତର ଚତୁର୍ଥ ସର୍ବୋଚ୍ଚ ନାଗରିକ ପୁରସ୍କାର "ପଦ୍ମଶ୍ରୀ" ରେ ହୋଇଛନ୍ତି ସମ୍ମାନିତ ୨୦୧୬ ମସିହାରେ । ସମ୍ମାନଜନକ "ଡ଼କ୍ଟରେଟ୍" ଉପାଧି ପାଇଛନ୍ତି ଉତ୍କଳ ସଂସ୍କୃତି ବିଶ୍ୱବିଦ୍ୟାଳୟ ତରଫରୁ । ଜାତିସଙ୍ଘରୁ ପାଇଛନ୍ତି ଭିଜୁଆଲ ମିଡ଼ିଆ ଫେଲୋସିପ ୨୦୦୨ ମସିହାରେ । ଓଡ଼ିଶା ଆଇକନ୍ ଏବଂ ସନ୍ ଅଫ୍ ଓଡ଼ିଶା ପୁରସ୍କାର ଲାଭ କରିଛନ୍ତି ଯଥାକ୍ରମେ ୨୦୧୧ ଓ ୨୦୧୨ ମସିହାରେ । ଏହାଛଡ଼ା ଭାରତ ଗୈାରବ ଏବଂ କର୍ମବୀର ପୁରସ୍କାରପ୍ରାପ୍ତ କରିଛନ୍ତି ଏହି ଓଡ଼ିଆ ତାରକା* ।

*ଦଶରାଜପୁର ରୁ ଦିଲ୍ଲୀ ଏବଂ ସ୍ନାତକ ଫେଲରୁ ପଦ୍ମଶ୍ରୀ ଯେ କେବଳ ଭାଗ୍ୟ ଆଣିନଥାଏ ଆଣିଥାଏ ନିଜର ଦୃଢ଼ ଇଚ୍ଛାଶକ୍ତି,ମନୋବଳ, କର୍ମଠ ତଥା ସାହସିକତା ସେ ହେଉଛନ୍ତି ଏହାର ଏକ ଜ୍ୱଳନ୍ତ ଉଦାହରଣ । ଆଜି ତାଙ୍କର ଜନ୍ମ ଦିବସ ଉପଲକ୍ଷେ ହାର୍ଦ୍ଧିକ ଅଭିନନ୍ଦନ,ଶୁଭେଚ୍ଛା ଏବଂ ଶୁଭକାମନା । ମାଁ ସୁରେଶ୍ଵରୀ ଙ୍କ ପାଦରେ ପ୍ରାର୍ଥନା ଏହି ପଦ୍ମଶ୍ରୀ ଙ୍କୁ ପଦ୍ମ ବିଭୂଷଣ କରି ରଖିଥାନ୍ତୁ* ।