07-Apr-2021

ବଲାଙ୍ଗୀର(ପ୍ରେରଣା ଖବର): ଗତକାଲି ପୂର୍ବାହ୍ନରେ କଲେଜ ଛକ ସ୍ଥିତ କଲ୍ୟାଣ ମଣ୍ଡପ ଠାରେ ରାଜ୍ୟ ମହିଳା କମିଶନ ପକ୍ଷରୁ ଜିଲ୍ଲ ସମାଜ ମଙ୍ଗଳ ବିଭାଗର ମିଳିତ ସହଯୋଗରେ ଏକ ଆଇନ ସଚେତନତା କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି । ଏହି କାର୍ଯ୍ୟକ୍ରମରେ ରାଜ୍ୟ ମହିଳା କମିଶନ ଅଧ୍ୟକ୍ଷା ଡ. ମିନତୀ ବେହେରା ଯୋଗ ଦେଇ ମହିଳା ମାନଙ୍କର ଅଧିକାର ଓ ସେ ସଂପର୍କିତ ଆଇନଗତ ବ୍ୟବସ୍ଥା ଉପରେ ମହିଳା ମାନଙ୍କୁ ସଚେତନ କରିବା ପାଇଁ ପ୍ରତ୍ୟେକ ଜିଲ୍ଲାରେ ଏପରି କାର୍ଯ୍ୟକ୍ରମ ମାନ ଆୟୋଜନ କରିବା ଉପରେ ଜୋର୍ ଦେଇଥିଲେ ।   ଅନ୍ୟତମ ଅତିଥି ଭାବରେ ବଲାଙ୍ଗୀର ଆରକ୍ଷୀ ଅଧୀକ୍ଷକ

ନିତୀନ କୁଶଲକର ଯୋଗ ଦେଇ ପୋଲିସ ତରଫରୁ ମହିାଳା ମାନଙ୍କ ପାଇଁ ଥିବା ସୁରକ୍ଷା ନିର୍ଦ୍ଦେଶାବଳୀ ଓ ସଚେତନତା କାର୍ଯ୍ୟକ୍ରମ ସଂପର୍କରେ ସୂଚନା ଦେଇ ନାରୀ ନିର୍ଯ୍ୟାତନା, ବାଲ୍ୟ ବିବାହ, କାର୍ଯ୍ୟସ୍ତଳୀରେ ମହିଳା ମାନଙ୍କୁ ହେଉଥିବା ନିର୍ଯ୍ୟାତନାକୁ ରୋକିବା ଦିଗରେ ପୋଲିସ ଗ୍ରହଣ କରୁଥିବା କାର୍ଯ୍ୟାନୁଷ୍ଠାନ ସଂପର୍କରେ ଆଲୋକପାତ କରିଥିଲେ । ଅନ୍ୟ ମାନଙ୍କ ମଧ୍ୟରେ ଅତିରିକ୍ତ ଜିଲ୍ଲାପାଳ ଅନନ୍ତ ନାରାୟଣ ସିଂ ଲାଗୁରୀ, ମହିଳା କମିଶନ ସଦସ୍ୟ ଜେଲିନା ପ୍ରିୟଦର୍ଶିନୀ, କମିଶନର ଅତିରିକ୍ତ ଆରକ୍ଷୀ ଅଧୀକ୍ଷକ ବିଜୟା ବାରୱା, କମିଶନ ସଦସ୍ୟ ସ୍ନେହାଞ୍ଜଳି ମହାନ୍ତି, ଭାରପ୍ରାପ୍ତ ଜିଲ୍ଲା ସମାଜ ମଙ୍ଗଳ ଅଧିକାରୀ ପ୍ରମୁଖ ଯୋଗ ଦେଇ ପ୍ରଦୀପ ପ୍ରଜ୍ୱଳନ କରି କାର୍ଯ୍ୟକ୍ରମର ଶୁଭାରମ୍ଭ କରିଥିଲେ । କରୋନା ସମୟରେ ଉଲ୍ଲେଖନୀୟ କାର୍ଯ୍ୟ କରିଥିବା ହେତୁ ଭୀମ ଭୋଇ ମେଡିକାଲ କଲେଜ ଓ ହସ୍ପିଟାଲର ଏସୋସିଏଟ ପ୍ରଫେସର ଦେଶବନ୍ଧୁ ବେହେରା, ଜିଲ୍ଲା ମଙ୍ଗଳ ଅଧିକାରୀଙ୍କ କାର୍ଯ୍ୟାଳୟର ପ୍ରୋଗ୍ରାମ ଅଫିସର ଶ୍ରୀମତୀ ଭବବତୀ ଗୁରୁ, ସାକ୍ଷୀ ୱାନ୍ ଷ୍ଟପ୍ ସେଣ୍ଟରର କାଉନସିଲର ଲୀନା ବାବୁ, ମହିଳା ଓକିଲ ଏସ୍‌. ଲତାଶ୍ରୀ, ପଲ୍ଲୀ ଏନ୍‌ଜିଓ ସଂପାଦକ ଟଙ୍କଧର ମହାକୁର, ଭୁତିଆରବାହାଲ ସରପଂଚ ପୁଷ୍ପିତା ସାହୁ, ବଲାଙ୍ଗୀର ସହର ଠିକାଦାରପଡା ସ୍ଥିତ ଗାୟତ୍ରୀ ସ୍ୱୟଂ ସହାୟକ ଗୋଷ୍ଠୀ, ବଲାଙ୍ଗୀରର ସବ୍‌ଇନିସପେକ୍ଟର ପୂର୍ଣ୍ଣିମା ଓରାମ, ସାନଗୁର୍ଜିଭଟା ଅଙ୍ଗନୱାଡି କେନ୍ଦ୍ରର ଅଙ୍ଗନୱାଡି କର୍ମୀ ସଂଧ୍ୟାରାଣୀ ଗିରି , ବେଲପଡା ସିଏଚ୍‌ସିର ଆଶା କର୍ମୀ ଉମା ପ୍ରଧାନଙ୍କୁ ଅତିଥି ମାନେ ମାନପତ୍ର ଓ ଉପଢୌ଼କନ ଦେଇ ସମ୍ବର୍ଦ୍ଧିତ କରିଥିଲେ । କାର୍ଯ୍ୟକ୍ରମରେ ଡିଏସ୍‌ଡବ୍ଲ୍ୟୁ କାର୍ଯ୍ୟାଳୟର ପ୍ରୋଗ୍ରାମ ଅଫିସର ଶ୍ରୀମତୀ ଗୁରୁ କାର୍ଯ୍ୟକ୍ରମ ପରିଚାଳନା କରିଥିବା ବେଳେ

ଭାରପ୍ରାପ୍ତ ଡିଏସ୍‌ଡବ୍ଲ୍ୟୁଓ ନାନ୍‌କୁ ସା ଧନ୍ୟବାଦ ଅର୍ପଣ କରିଥିଲେ । ଏହି କାର୍ଯ୍ୟକ୍ରମରେ ବିଭିନ୍ନ ବ୍ଲକର ସିଡିପିଓ,     ୱାନ ଷ୍ଟପ୍ ସେଣ୍ଟରର କର୍ମକର୍ତ୍ତା,ଏନ୍‌ଜିଓ ସଦସ୍ୟ, ପୋଲିସ କର୍ମଚାରୀ, ଅଙ୍ଗନୱାଡି କର୍ମୀଙ୍କ ସମେତ ଏନ୍‌ଜିଓ ମହିଳା ମାନେ ଉପସ୍ଥିତ ଥିଲେ ।