03-Apr-2021

ବ୍ରହ୍ମପୁର(ପ୍ରେରଣା ଖବର) : ରାଜ୍ୟରେ ପୁଣି କରୋନା ଗ୍ରାଫ୍ ଉପରମୁହାଁ । ଦିନକରେ ଆଜି ଚିହ୍ନଟ ହୋଇଛନ୍ତି ୪୫୨ ପଜିଟିଭ୍ । କ୍ୱାରେଣ୍ଟାଇନରୁ ୨୬୭ ଓ ଲୋକାଲ୍ କେସ୍ ୧୮୫ ରହିଛି । ତେବେ ରାଜ୍ୟକୁ ଘାରିଛି ପଡୋଶୀ ସଂକ୍ରମଣ ଚିନ୍ତା । ହେଲେ ଏବେ ଚିନ୍ତାର ବିଷୟ ପାଲଟିଛି ଗଞ୍ଜାମରେ ବଢୁଥିବା ମହାମାରୀର କୋପ ।

ଅର୍ଥାତ୍ ଶୂନ ସଂକ୍ରମଣ ଥିବା ଜିଲ୍ଲାରୁ ପୁଣି ୨୪ ଘଣ୍ଟାରେ ବାହାରିଛନ୍ତି ୧୩ ନୂଆ କେସ୍ । ଦୀର୍ଘଦିନର ବ୍ୟବଧାନ ପରେ  ଜିଲ୍ଲାରେ ୨ ଅଙ୍କ ଛୁଇଁଛି ସଂଖ୍ୟା । ତେବେ ଏହାକୁ ନେଇ ଏବେ ଜିଲ୍ଲାରେ ଦ୍ୱିତୀୟ ଲହରୀ ପ୍ରବାହିତ ହେଉଥିବା ଶୁଣିବାକୁ ମିଳିଛି । ଏହାକୁ ଦୃଷ୍ଟିରେ ରଖି ଜିଲ୍ଲା ପ୍ରଶାସନ ପକ୍ଷରୁ ସ୍ୱତନ୍ତ୍ର ରଣନୀତି ପ୍ରସ୍ତୁତ କରାଯାଉଛି । ଜିଲ୍ଲା ପ୍ରଶାସନ କଡା କଟକଣା ଜାରି କରିବାକୁ ସାଧାରଣରେ କୁହାଯାଉଛି । ନଚେତ୍ ଆଗକୁ ଅବସ୍ଥା ଅସମ୍ଭାଳ ହେବା ବୋଲି ଆଶଙ୍କା ସୃଷ୍ଟି ହୋଇଛି । ଗତବର୍ଷ କରୋନାର ହଟସ୍ପଟ ପାଲଟିଥିଲା ଗଞ୍ଜାମ । ପ୍ରବାସୀଙ୍କ ଘରବାହୁଡା ପରେ ଜିଲ୍ଲାରେ ସଂକ୍ରମଣ ମାତ୍ରା ବଢିଥିଲା । ତେବେ ପ୍ରଶାସନର ଉଚିତ୍ ପଦକ୍ଷେପ ଓ କଟକଣା ହେତୁ କରୋନା ଗ୍ରାଫ୍ କମିଥିଲା ।