30-Mar-2021

ବଲାଙ୍ଗିର,(ପ୍ରେରଣା ଖବର) :ବଲାଙ୍ଗୀର ଜିଲ୍ଲା ତଥା ପଶ୍ଚିମ ଓଡିଶାର କଫସିରଫ ସିଣ୍ଡିକେଟକୁ ପରିଚାଳିତ କରୁଥିବା ନିଶାମାଫିଆ ସାନ ନେଗୀ ଓ ପ୍ରଶାନ୍ତ କ୍ଷେତୀ ପୁଣି ଉତ୍ପାତ ଆରମ୍ଭ କରିଛନ୍ତି । ଗତ କିଛିମାସ ପୂର୍ବରୁ ଜେଲରୁ ଫେରି ସାନ ନେଗୀ ତାର କଳାକାରନାମା ଆରମ୍ଭ କରିଛି । ଏଥର ଖୋଲମଖୁଲ୍ଲା ଦିନବେଳା ଜଣେ ଯୁବକକୁ କଲେଜଛକରୁ ଅପହରଣ କରି ଫାସଡକୁ ନେଇ ସେଠାରେ ପ୍ରବଳମାଡ ମାରି ହତ୍ୟା ଉଦ୍ୟମ କରିଥିବା ଅଭିଯୋଗ ହୋଇଛି । ଯୁବକଜଣକ ବଲାଙ୍ଗୀର ସହରର ରୁଗୁଡିପଡାର ପ୍ରଫୁଲ୍ଲ ନନ୍ଦଙ୍କ ପୁଅ ଅମିତ ନନ୍ଦ ବୋଲି ଜଣାଯାଇଛି । ଘଟଣା ପରେ ପ୍ରଫୁଲ୍ଲଙ୍କ ଅଭିଯୋଗ ପରେ କୌଣସି ପ୍ରକାରେ ପୋଲିସ ଅମିତକୁ ଉଦ୍ଧାର କରିଛି । ସେହି ଅଭିଯୋଗକୁ ଆଧାର କରି ଟାଉନଥାନାରେ କେସ ନଂ-୨୧୨/୨୦୨୧ ତା.୨୯.୩.୨୦୨୧ଦଫା-୩୯୫,୨୯୪,୩୨୪,୩୪୧,୩୬୫,୫୦୬ ଆଇପିସିରେ ମାମଲା ରୁଜୁ କରିଛି । ପୋଲିସ ଗତକାଲି ରାତିରେ ସାନ ନେଗୀ,ପ୍ରଶାନ୍ତ କ୍ଷେତୀ ସମେତ ୫ଜଣ ଅପହରଣକାରୀଙ୍କୁ ଗିରଫ କରିଛି । ଏନେଇ ଆଦର୍ଶଥାନାରେ ଏକ ମାମଲା ରୁଜୁ ହୋଇ ପୋଲିସ ଅଭିଯୁକ୍ତଙ୍କୁ ଗିରଫ କରି ଆଜି କୋର୍ଟ ଚାଲାଣ କରିଛି । ପ୍ରଫୁଲ୍ଲ ନନ୍ଦ ଥାନାରେ କରିଥିବା ଅଭିଯୋଗରୁ ଜଣାଯାଇଛି ଯେ,ଗତକାଲି ତାଙ୍କ ପୁଅ ଅମିତ ନନ୍ଦ କଲେଜଛକରେ  ଅନ୍ୟ ସାଙ୍ଗମାନଙ୍କ ସହିତ ରଙ୍ଗ ଖେଳି ଲିବୁ ଘରେ ଥିଲା । ସେଠାକୁ ନିଶା ମାଫିଆ ସାନ ନେଗୀ,ପ୍ରଶାନ୍ତ କ୍ଷେତୀ ସମେତ ୫ଜଣ ପହଞ୍ଚି ପୋଲିସକୁ ତାଙ୍କ ବିଷୟରେ ସୂଚନା ଦେଉଛୁ ବୋଲି କହି ଗାଳିଗୁଲଜ କରିବା ସହିତ ଜବରଦସ୍ତ ଗାଡିରେ ବସାଇ ଫାସଡକୁ ନେଇଯାଇଥିଲେ । ସେଠାରେ ମଧ୍ୟ ଅମିତକୁ ପ୍ରବଳମାଡ ମାରିବା ସହିତ ଅମିତ ନିଜେ ନିଶାକାରବାର କରୁଛି ବୋଲି ସ୍ୱୀକାର କରୁଥିବାର ଏକ ଭିଡିଓ ସୁଟିଂ କରିଥିବା ଅଭିଯୋଗ ହୋଇଛି । ପୋଲିସରେ କିମ୍ବା କାହାପାଖରେ ଏବିଷୟରେ କହିଲେ ଆଗକୁ ଜୀବନରେ ମାରିଦେବେ ବୋଲି ଧମକ ଦିଆଯାଇଥିବା ଅଭିଯୋଗ କରାଯାଇଛି । ପୋଲିସ ଏହି ଘଟଣାର ଅଭିଯୋଗ ପାଇଲାପରେ ରାତିରେ ସାନ ନେଗୀ,ପ୍ରଶାନ୍ତ କ୍ଷେତୀ,କାହ୍ନା ମିଶ୍ର,ସୁଧିର ପଟେଲ ଓ ଶିବ ବାଗକୁ ଗିରଫ କରିଛି ।ଏହି ଅପହରଣରେ ବ୍ୟବହୃତ ଏକ ସ୍କର୍ପିଓ(ଓଆର-୦୨-ବିଡବ୍ଲୁ-୦୨୩୪) ଓ ଦୁଇଟି ସକବରଡକୁ ଜବତ କରାଯାଇଛି ବୋଲି ଆଇଆଇସି ସଂଗ୍ରାମକେସରୀ ପଟ୍ଟନାୟକ କହିଛନ୍ତି । ଆହତ ଅମିତକୁ ଭୀମଭୋଇ ମେଡିକାଲକଲେଜ ହସପିଟାଲରେ ଚିକିତ୍ସିତ କରାଯାଉଛି । ପ୍ରକାଶ୍ୟ ଯେ,ଗତ ୫ବର୍ଷ ହେଲା ସାନ ନେଗୀ ଓ ପ୍ରଶାନ୍ତ କଫସିରଫ ବେପାରରେ ରହି ବଲାଙ୍ଗୀରରୁ ଭୁବନେଶ୍ୱର ପର୍ଯ୍ୟନ୍ତ ସିଣ୍ଡିକେଟକୁ ପରିଚାଳିତ କରୁଛନ୍ତି । ଏହା ପୂର୍ବରୁ ସାନ ନେଗୀ ନାମରେ ଅନେକଗୁଡିଏ ମାମଲା ହୋଇ ୩ଥର ଜେଲ ଗଲାଣି । ସେହିପରି ଖବର ପ୍ରକାଶନ ପରେ କେତେକ ଗଣମାଧ୍ୟମ ପ୍ରତିନିଧିଙ୍କୁ ଦୁର୍ବ୍ୟବହାର କରିବା ତଥା ତାଙ୍କ କାର୍ଯ୍ୟାଳୟକୁ ଯାଇ ଧମକ ଦେବା ଭଳି ସଂଗୀନ ଅଭିଯୋଗ ମଧ୍ୟ ରହିଛି । ଏବେ ଗତକାଲିର ଘଟଣାକୁ ଦେଖିଲେ ଅପରାଧି ଗୋଷ୍ଠୀର ପୋଲିସ ପ୍ରତୀ ଭୟ ନଥିବା ଜଣାପଡୁଛି । ସହରରେ ଆଇନଶୃଙ୍ଖଳା ଭୁଷୁଡି ପଡୁଥିବା ଅଭିଯୋଗ ହେଉଛି । ଏସପି ତୁରନ୍ତ ଏହି ଘଟଣାକୁ ଧ୍ୟାନ ଦେବାକୁ ଜନସାଧାରଣରେ ଦାବି ହେଉଛି ।