30-Mar-2021

ବଲାଙ୍ଗୀର-(ପ୍ରେରଣା ଖବର) - ଆଜି ବଲାଙ୍ଗୀର ସହରର ବିଭିନ୍ନ ପ୍ରମୁଖ ଅନୁଷ୍ଠାନ ମାନଙ୍କୁ ନେଇ ସ୍ଥାନୀୟ ଘରୋଇ ବସ ମାଲିକ ସଂଘ କାର୍ଯ୍ୟାଳୟ ଠାରେ ବଲାଙ୍ଗୀର- ସୋନପୁର ରାସ୍ତାର ପ୍ରସ୍ତାବିତ ଟୋଲ ଗେଟ ଫି କୁ ମିଳିତ ଭାବେ ବିରୋଧ କରିବା ପାଇଁ ସର୍ବସମ୍ମତି କ୍ରମେ ନିଷ୍ପତ୍ତି ଗ୍ରହଣ କରାଯାଇଛି । ବଲାଙ୍ଗୀର ସୁବର୍ଣ୍ଣପୁର ରାସ୍ତାରେ ବଲାଙ୍ଗୀର ଜିଲ୍ଲାର ଜନ ସାଧାରଣ ବାରମ୍ଵାର ଯିବା ଆସିବା କରିଥାନ୍ତି କାରଣ ରାଜ୍ୟ ରାଜଧାନୀକୁ ଯିବା ପାଇଁ ଏହି ରାସ୍ତା ଏକ ମୁଖ୍ୟ ସଂଯୋଗ ପଥ । ଉଚ୍ଚ ଶିକ୍ଷା ପ୍ରାପ୍ତି, କୋର୍ଟ କଚେରୀ କାମ ଓ ସ୍ୱାସ୍ଥ୍ୟଗତ ସମସ୍ୟା  ସହ ଅନେକ କାମ ନେଇ ବଲାଙ୍ଗୀର ଜନ  ସାଧାରଣ ବାରମ୍ଵାର ରାଜଧାନୀ ଭୁବନେଶ୍ଵର ଓ କଟକ  ଯିବାକୁ ବାଧ୍ଯ ହୋଇଥାନ୍ତି । ଅର୍ଥନୈତିକ ଦୃଷ୍ଟି କୋଣରୁ ପଛୁଆ ବଲାଙ୍ଗୀରର ଜନ ସାଧାରଣଙ୍କୁ ଏହି ଟୋଲ ଗେଟ ବୋଝ ଉପରେ ନଳିତା ବିଡା ସଦୃଶ ହେବ ବୋଲି ବୈଠକରେ ମତ ପ୍ରକାଶ ପାଇଥିଲା । ଏହି ରାସ୍ତା ନିର୍ମାଣ ମଧ୍ୟ ଠିକ୍ ଭାବରେ କରାଯାଇ ନଥିବାରୁ  ଏକ ଦୁର୍ଘଟଣା ପ୍ରବଣ ରାସ୍ତାର ପରିଚୟ ସୃଷ୍ଟି କରିଛି । ବରଗଡ଼ ଠାରେ ସ୍ଥାପନ କରାଯାଇଥିବା ଟୋଲ ଗେଟ ରେ ବରଗଡ଼ ର ସ୍ଥାନୀୟ ବାସିନ୍ଦାଙ୍କ ଯାନ ବାହାନ କୁ ଟୋଲ ଗେଟ ଫି ମୁକ୍ତ କରାଯାଇଥିବା ବେଳେ ବଲାଙ୍ଗୀରରେ ମଧ୍ୟ ଏହି ଟୋଲ ଗେଟରେ ସ୍ଥାନୀୟ ଜନ ସାଧାରଣଙ୍କ ପାଇଁ ଫି ମୁକ୍ତ କରିବାକୁ ଦୃଢ ଦାବୀ ଉପସ୍ଥାପିତ କରାଯିବା ପାଇଁ ବୈଠକରେ ନିଷ୍ପତ୍ତି ଗ୍ରହଣ କରାଯାଇଛି । ଏହି ବୈଠକରେ ବଲାଙ୍ଗୀର ଟୋଲ ଗେଟ ୟୁଜର୍ସ କମିଟୀ ଗଠନ କରାଯାଇଛି ଏବଂ ଉକ୍ତ କମିଟୀର ଆବାହକ ଭାବେ ଜିଲ୍ଲା ଓକିଲ ସଂଘର ସଭାପତି ପ୍ରବୀଣ ମିଶ୍ରଙ୍କୁ ଆବାହକ କରାଯାଇଥିବା ପ୍ରସ୍ତାବ ଗ୍ରହଣ କରାଯାଇଛି । ଯୁଗ୍ମ ଆବାହକ ଭାବେ ବସ୍ ମାଲିକ ସଂଘ ସଭାପତି ହେମନ୍ତ ପଣ୍ଡା , ଟ୍ରକ ମାଲିକ ସଂଘ ସଭାପତି ବୀରେନ୍ଦ୍ର ମିଶ୍ର , ବ୍ୟବସାୟୀ ସଂଘ ସଭାପତି ତ୍ରିପୁରାରୀ ପାଣିଗ୍ରାହୀ, ଟ୍ୟାକ୍ସି ଚାଳକ ସଂଘ ସଭାପତି ସତ୍ୟାନନ୍ଦ ପଧାନ ଓ ଟ୍ରାକ୍ଟର ମାଲିକ ସଂଘ ସଭାପତି ପ୍ରଭାସ ପାଣିଗ୍ରାହୀ ରହିଥିବା ବେଳେ କାର୍ଯ୍ୟନିର୍ବାହୀ କମିଟୀ ସଭ୍ୟ ଭାବେ ନାଗରିକ କମିଟୀ ସଭାପତି ବିକ୍ରମାନନ୍ଦ ବହିଦାର, ସିଭିଲ ସୋସାଇଟି ସଭାପତି ନିଳମଣି ମିଶ୍ର, ବିଙ୍ଗ ହ୍ୟୁମାନ ସଭାପତି ସୋମନାଥ ମିଶ୍ର ଓ ବିବେକା ପଟେଲ, ବଲାଙ୍ଗୀର ଯୁବ ଆକ୍ସନ କମିଟୀ ସଭାପତି ବିନୋଦ କାଲସାଏ, ମାହେଶ୍ଵରୀ ସଂଗଠନର ଅଙ୍କୁଶ ପାଣ୍ଡିଆ, ସମଲେଶ୍ଵରୀ ଟ୍ୟାକ୍ସି ଷ୍ଟାଣ୍ଡ   ସଭାପତି ଅବନୀ ପ୍ରକାଶ ମିଶ୍ର ଏବଂ ପୂର୍ବ ସୈନିକ ସଂଘ ସଭାପତି ପ୍ରତାପ ରଥ ରହିଛନ୍ତି । ଏହି ବୈଠକରେ ଓକିଲ ସଂଘ ସମ୍ପାଦକ ଅମନ ନାଗ, ବସ୍ ମାଲିକ ସଂଘ ସମ୍ପାଦକ ପ୍ରଦ୍ୟୁତ ମିଶ୍ର, ଟ୍ରକ ମାଲିକ ସଂଘ ସମ୍ପାଦକ ଆଶ୍ଵିନୀ ପଟ୍ଟନାୟକ, ଟ୍ରାକ୍ଟର ମାଲିକ ସଂଘ ସମ୍ପାଦକ ବୁଲୁ ଘଡେଇଙ୍କ ସମେତ ବହୁ ସଂଗଠନର  ବରିଷ୍ଠ କର୍ମବର୍ତ୍ତ। ଯୋଗ ଦେଇଥିଲେ । ବଲାଙ୍ଗୀର ଜିଲ୍ଲାପାଳଙ୍କୁ ସାକ୍ଷାତ କରି ଆଲୋଚନା ପୂର୍ବକ ଦାବୀ ପତ୍ର ପ୍ରଦାନ କରିବା ପାଇଁ ନିଷ୍ପତ୍ତି ନିଆଯାଇଛି ଏବଂ ଆବଶ୍ୟକ ସ୍ଥଳେ  ଏହି ସଂଗଠନ ମାନେ  ଆନ୍ଦୋଳନକୁ ଓହ୍ଲାଇବେ ବୋଲି ନିଷ୍ପତ୍ତି ନିଆଯାଇଥିବା ଜଣାଯାଇଛି ।