19-Mar-2021

ସୋର(ପ୍ରେରଣା ଖବର) : ସୁନା ବ୍ୟବସାୟୀଙ୍କୁ ଅପହରଣ ଅଭିଯୋଗ । ବାଲେଶ୍ବର ଜିଲ୍ଲା ସୋର ଥାନା ଅଟପୁର ଅଞ୍ଚଳରେ ଘଟିଛି ଏଭଳି ଅଭାବନୀୟ ଘଟଣା । ସୋର ପୋଲିସ ତନାଘନା ଚଳାଇଛି ।

ସୂଚନାଯୋଗ୍ୟ ଯେ, ବାଲେଶ୍ବର ଜିଲ୍ଲା ସୋର ଥାନା ଅଟପୁର ଅଞ୍ଚଳର ପ୍ରହଲ୍ଲାଦ ବେହେରା ନାମକ ଜଣେ ଯୁବକ ସୋରରୁ କୁପାରି ରାସ୍ତା ବେଲଦା ଛକରେ ଶୁଭମ୍ ଜୁଏଲାରୀ ନାମକ ଏକ ଗହଣା ଦୋକାନ କରିଥିଲେ । ଦାଣ୍ଡହରିପୁର ଅଞ୍ଚଳର ସୁମନ୍ତ ମଳିକ ନାମକ ଯୁବକ ଗହଣା କିଣିବା ବାହାନାରେ ଶୁଭମ୍ ଜୁଏଲାରୀର ମାଲିକ ପ୍ରହଲ୍ଲାଦଙ୍କୁ ଡକାଇଥିଲେ ।  ପ୍ରହଲ୍ଲାଦ ୫୦ ଗ୍ରାମ ସୁନା ନେଇ ଏକ ବାଇକ୍ ଯୋଗେ ଦାଣ୍ଡହରିପୁର ଯାଇଥିଲେ । ମାତ୍ର ତାଙ୍କ ଫେରିବାରେ ବିଳମ୍ବ ହେବାରୁ ପ୍ରହଲ୍ଲାଦଙ୍କ ପରିବାର ଲୋକ ପ୍ରହଲ୍ଲାଦଙ୍କୁ ଫୋନ୍ କରିବାରୁ ଫୋନ୍ ସୁଇଚ୍ ଅଫ୍ ଆସିଥିଲା । ପରିବାର ଲୋକେ ବହୁ ଖୋଜାଖୋଜି କରିବା ପରେ ମଧ୍ୟ ପ୍ରହଲ୍ଲାଦଙ୍କ ଖୋଜ ଖବର କିଛି ନମିଳିବାରୁ ସୋର ଥାନାରେ ଅଭିଯୋଗ କରିଥିଲେ । ସୋର ପୋଲିସ ଅଭିଯୋଗ ପାଇ  ଘଟଣାର ତନାଘନା ଚଳାଇଛନ୍ତି ।

ଗତ କିଛି ଦିନ ତଳେ ସୋର ଅଞ୍ଚଳର ଜଣେ ଯୁବକକୁ ବନ୍ଧୁକ ମୁନରେ ଅପହରଣ କରି କଲିକତାର ଚବିଶ ପ୍ରାଗଣା ଅଞ୍ଚଳରେ ପଣବନ୍ଦୀ କରି ରଖିଥିଲେ ଯାହା ରାଜ୍ୟରେ ହଇଚଇ ସୃଷ୍ଟି କରିଥିଲା । ପୁଣି ଜଣେ ଗହଣା ବ୍ୟବସାୟୀଙ୍କୁ ଅପହରଣ ସୋର ଅଞ୍ଚଳରେ ଆତଙ୍କ ସୃଷ୍ଟି କରିଛି । ଅଭିଯାୋଗ ପାଇବା ପରେ ସୋର ପୋଲିସ ତତ୍ପରତାର ସହିତ ଘଟଣାର ତନାଘନା ଆରମ୍ଭ କରିଛନ୍ତି ।