13-Mar-2021

ନୟାଗଡ଼ (ପ୍ରଦୀପ କୁମାର ପଣ୍ଡା) :ଓଡିଶା କୃଷି ଓ ବୈଷୟିକ ବିଶ୍ୱ ବିଦ୍ୟାଳୟ ଅଧିନସ୍ଥ କୃଷି ଯାନ୍ତ୍ରିକ ଓ ବୈଷୟିକ ମହାବିଦ୍ୟାଳୟ ରେ କାର୍ଯ୍ୟରତ ବିଭିନ୍ନ ସର୍ବ ଭାରତୀୟ ଗବେଷଣା ପ୍ରକଳ୍ପ ତରଫରୁ ନୟାଗଡ଼ ଜିଲ୍ଲା ଗଣିଆ ବ୍ଲକର ମାଳତୀପୁଟ ଗ୍ରାମରେ କୃଷି ଯନ୍ତ୍ରପାତି ଏବଂ ପ୍ରଯୁକ୍ତି ବିଦ୍ୟା ପ୍ରଦର୍ଶନ ମେଳା ଅନୁଷ୍ଠିତ ହୋଇ ଯାଇଛି | ଏହି କାର୍ଯ୍ୟକ୍ରମ ରେ ପ୍ରଫେସର ସଞ୍ଜୟ କୁମାର ଦାଶ, କୃଷି ବିଭାଗ ର ସହକାରୀ ଯନ୍ତ୍ରୀ ଇଂ. ବିଶ୍ୱଜିତ ପାଟ୍ଟଯୋଶୀ, ସହକାରୀ କୃଷି ଅଧିକାରୀ ଆଶିଷ ମେହେର, ପ୍ରଫେସର ସଂଗ୍ରାମ କେଶରୀ ସ୍ୱାଇଁ, ପ୍ରଫେସର ପଦ୍ମଲୋଚନ ପ୍ରଧାନ, ପ୍ରଫେସର ଉମାଶଙ୍କର ପାଲ, କୃଷି ଯନ୍ତ୍ରୀ ଜୟ ନାରାୟଣ ମିଶ୍ର, ସ୍ଥାନୀୟ କୃଷି ବିଜ୍ଞାନ କେନ୍ଦ୍ର ର ବରିଷ୍ଠ ବୈଜ୍ଞାନିକ ଅନିଲ କୁମାର ସ୍ୱାଇଁ ପ୍ରମୁଖ ମଞ୍ଚାସିନ ଥିଲେ | ପଶୁସକ୍ତି ର ସଦୁପଯୋଗ, ଉନ୍ନତ କୃଷି ଯନ୍ତ୍ରପାତି, ଅମଳ ପରବର୍ତୀ କୃଷି ଯନ୍ତ୍ରପାତି ଓ ପ୍ରକ୍ରିୟାକରଣ, କୃଷି ଶ୍ରମ ବିଜ୍ଞାନ ଓ ସୁରକ୍ଷା ବିଷୟରେ ଏକ ଆଲୋଚନାଚକ୍ର ସମ୍ପାଦିତ ହୋଇଥିଲା | ବିଭିନ୍ନପ୍ରକାର ଅତ୍ୟାଧୁନିକ କୃଷି ଯନ୍ତ୍ରପାତି ତଥା ମକା ଚୋପା ଓ ମଞ୍ଜି ଛଡା ଯନ୍ତ୍ର, ଖାଇବା ତେଲ ବିଶୋଧନ ଯନ୍ତ୍ର,ଧାନ ତଳି ରୁଆ ଯନ୍ତ୍ର, ମଞ୍ଜି ଓ ସାର ବୁଣା ଯନ୍ତ୍ର, ନଡ଼ାକାଟା ଯନ୍ତ୍ର, ଘାସ ସଫା ଯନ୍ତ୍ର ଗୁଡିକ ର ସଦୁପଯୋଗ ଏବଂ ଉପକାରିତା ବିଷୟରେ ଉପସ୍ଥିତ  ଚାଷୀ ମାନଙ୍କୁ ଅବଗତ କରାଯିବା ସହିତ ଏହି ସଚେତନ ବାର୍ତ୍ତା ପ୍ରତ୍ୟେକ ଚାଷୀ ମାନଙ୍କ ପାଖରେ ପଂହଁଚାଇବା ପାଇଁ ମଞ୍ଚାସିନ ଅତିଥି ମାନେ ଉକ୍ତି ବାଢ଼ିଥିଲେ | "ବିଜ୍ଞାନୀ କୃଷକ " ଶୀର୍ଷକ ର ଏକ ପ୍ରଶ୍ନ ଉତ୍ତର କାର୍ଯ୍ୟକ୍ରମ ରେ ଉପସ୍ଥିତ ୩ ଶହ ରୁ ଉର୍ଦ୍ଧ ଚାଷୀ ମାନେ ଅତ୍ୟାଧୁନିକ କୃଷିପ୍ରଣାଳୀ ବିଷୟରେ ଅବଗତ ହୋଇଥିଲେ |