11-Mar-2021

ଜାକାର୍ତ୍ତା (ପ୍ରେରଣା ଖବର ବ୍ୟୁରୋ) :ମର୍ମନ୍ତୁଦ ସଡ଼କ ଦୁର୍ଘଟଣା । ଘାଟି ତଳକୁ ଖସିଲା ପର୍ଯ୍ୟଟକଙ୍କୁ ନେଇ ଯାଉଥିବା ବସ୍‌ । ଯାହାଫଳରେ କି ୨୭ଜଣ ପର୍ଯ୍ୟଟକଙ୍କ ମୃତ୍ୟୁ ହୋଇଥିବା ବେଳେ ୩୯ଜଣ ଗୁରୁତର ଭାବେ ଆହତ ହୋଇଛନ୍ତି । ସେମାନଙ୍କୁ ଉଦ୍ଧାର କରି ନିକଟସ୍ଥ ମେଡିକାଲରେ ଭର୍ତ୍ତି କରାଯାଇଛି । ଏବେବି ଉଦ୍ଧାର କାର୍ଯ୍ୟ ଜାରି ରହିଛି ।

ଖବର ଅନୁଯାୟୀ, ଇଣ୍ଡୋନେସିଆର ସୁବଙ୍ଗ ପ୍ରଦେଶର ଏହି ଦୁର୍ଘଟଣାଟି ଘଟିଛି । ସୁବଙ୍ଗ ପ୍ରଦେଶର ତାସିକମାଲୟା ଜିଲ୍ଲାରେ ଥିବା ଇସ୍‌ଲାମିକ ଜୁନିୟର ହାଇସ୍କୁଲର ଛାତ୍ରଛାତ୍ରୀ, ଶିକ୍ଷକ ଏବଂ ଅଭିଭାବକମାନେ ଏକ ତୀର୍ଥସ୍ଥାନକୁ ବୁଲିବାକୁ ଯାଉଥିଲେ । କିନ୍ତୁ ସୁମେଡାଙ୍ଗ ଜିଲ୍ଲା ଦେଇ ଯାଇଥିବା ଏକ ରାସ୍ତାରେ ଗଡ଼ାଣିରେ ବସ୍‌ଟି ଯାତ୍ରା କରୁଥିଲା । ରାସ୍ତାଟି ଅତ୍ୟନ୍ତ ଗଡ଼ାଣି ହୋଇଥିବାରୁ ଡ୍ରାଇଭର ବସ୍‌ରୁ ନିଜ ନିୟନ୍ତ୍ରଣ ହରାଇ ବସିଥିଲେ । ଯାହାଫଳରେ ବସ୍‌ଟି ପ୍ରାୟ ଘାଟିର ୨୦ମିଟର ତଳକୁ ଖସିପଡିଥିଲା ।

ସେପଟେ ଦୁର୍ଘଟଣା ସଂପର୍କରେ ଖବର ପାଇ ତୁରନ୍ତ ଉଦ୍ଧାର କାର୍ଯ୍ୟରେ ଆରମ୍ଭ ହୋଇଥିଲା । ତେବେ ଘାଟି ତଳକୁ ବସ୍‌ଟି ଖସିଯିବାରୁ ପ୍ରାୟ ୧୭ଜଣଙ୍କୁ ମୃତ୍ୟୁ ହୋଇଯାଇଛି । ସ୍ଥାନୀୟ ପ୍ରଶାସନ ୨୭ଟି ଶବ ଘଟଣାସ୍ଥଳରୁ ଉଦ୍ଧାର କରିଛି ।

ସେହିପରି ଦୁର୍ଘଟଣାରେ ୩୯ଜଣ ଯାତ୍ରୀ ଆହତ ହୋଇଛନ୍ତି । ସେମାନଙ୍କୁ ଉଦ୍ଧାର କରି ନିକଟସ୍ଥ ବିଭିନ୍ନ ମେଡିକାଲରେ ଭର୍ତ୍ତି କରାଯାଇଛି । ଦୁର୍ଘଟଣାରେ ବସ୍‌ ଡ୍ରାଇଭର ସମେତ ଅନେକ ଶିଶୁଙ୍କ ମୃତ୍ୟୁ ହୋଇଥିବା ସୂଚନା ମିଳିଛି ।

ଦୁର୍ଘଟଣା ସଂପର୍କରେ ଛାନ୍‌ଭିନ୍‌ ଆରମ୍ଭ କରିଛି ପୋଲିସ । ତେବେ ପୋଲିସର ପ୍ରାଥମିକ ତଦନ୍ତରୁ ବସ୍‌ର ବ୍ରେକ୍‌ ଠିକ୍‌ ଭାବେ କାମ୍‌ କରିନଥିବାରୁ ଏହି ଦୁର୍ଘଟଣା ଘଟିଥିବାର ସୂଚନା ମିଳିଛି । ଘଟଣାସ୍ଥଳରେ ଏବେବି ଉଦ୍ଧାରକାର୍ଯ୍ୟ ଜାରି ରହିଛି ।