12-Feb-2021

ପାରାଦୀପ(ପ୍ରେରଣା ଖବର ବ୍ୟୁରୋ) : ଅଗ୍ନି ଦେବତାଙ୍କୁ ସାକ୍ଷୀ ରଖି ଯାହା ହାତ ଧରିଥିଲେ ସେ କରିଦେଲା ସାତ ପର । ସୁଖ ଦୁଃଖର ସାଥୀ ହେବେ ବୋଲି କଥା ଦେଇଥିଲେ ସ୍ବାମୀ । ସେବେଠାରୁ ଅନେକ ସ୍ବପ୍ନ ଦେଖିଥିଲେ ସେ । ଦେଲେ ତାଙ୍କ ଭାଗ୍ୟରେ କିଛି ଅଲଗା ଲେଖାଥିଲା । ସ୍ତ୍ରୀ ଥାଉ ଥାଉ ଆଉ ଜଣେ ଝିଅକୁ ବିବାହ କରି ଘରକୁ ଆଣିଲେ ସ୍ବାମୀ । ଏବେ ନ୍ୟାୟ ପାଇଁ ଥାନାର ଦ୍ବାରସ୍ଥ ହୋଇଛନ୍ତି ମହିଳା ।

ଜଗତସିଂହପୁର କୁଜଙ୍ଗ ବ୍ଲକ ପୋତାନଇ ପଞ୍ଚାୟତର ଚନ୍ଦାପାଟ ଗ୍ରାମର ଜଗବନ୍ଧୁ ସାହୁଙ୍କ ଝିଅ ବିଜୟିନୀ ସାହୁ ପଙ୍ଗପାଳ ପଥୁରିଆ ଗ୍ରାମର ବନମାଳୀ ସାହୁଙ୍କ ପୁଅ ବାପୁଜୀ ସାହୁଙ୍କୁ ଗତ ୨୦୧୬ ମସିହା ଅପ୍ରେଲ ୨୯ ତାରିଖରେ ରୀତିନୀତି ଅନୁସାରେ ବିବାହ କରିଥିଲେ।  ଝିଅର ବିବାହ ସମୟରେ ଜଗବନ୍ଧୁ ନିଜ ସକ୍ଷମ ମୁତାବକ ଯୌତୁକ ଦେଇଥିଲେ। ନୂଆ ଘର ସ୍ବାମୀ ବାପୁଜୀଙ୍କୁ ପାଇ ବିଜୟନୀ ମଧ୍ୟ ବେଶ୍ ଖୁସି ଥିଲେ । ହେଲେ ସେ କଣ ଜାଣିଥିଲେ ଯାହା ହାତଧରି ଆଗକୁ ବାଟ ଚାଲିବାର ସ୍ବପ୍ନ ଦେଖୁଛନ୍ତି ଦିନେ ସେ ତାଙ୍କୁ ହତାଦର କରିବ ବୋଲି ।

ଧିରେ ଧିରେ ବିଜୟନୀଙ୍କ ଉପରେ ଆରମ୍ଭ ହେଲା ଅକଥନୀୟ ଅତ୍ୟାଚାର । ଶାରୀରିକ ଓ ମାନସିକ ଯନ୍ତ୍ରଣା ମଧ୍ୟ ଦିଆଗଲା । ସବୁ ଠିକ୍ ହେବାର ଆଶା ନେଇ ସବୁ ସହି ଯାଉଥିଲେ ସେ। ହେଲେ ସ୍ବାମୀ ବାପୁଜୀ ଯେତେବେଳେ ଆଉ ଜଣଙ୍କୁ ବିବାହ କରି ବିଜୟନୀଙ୍କୁ ଘରୁ ତଡିଦେଲେ ତାଙ୍କ ପାଦ ତଳୁ ମାଟି ଖସିଗଲା ।  ଶେଷରେ କିଛି ଉପାୟ ନ ପାଇ ଥାନାର ଦ୍ବାରସ୍ଥ ହେଲେ ବିଜୟିନୀ । ବାହାଘର ପୂର୍ବରୁ ବାପୁଜୀଙ୍କର ଅନ୍ୟ ଝିଅ ସହ ସମ୍ପର୍କ ଥିଲା । ଫଳରେ  ବିଜୟନୀକୁ ବାହା ଘର ପରେ 

 ନିର୍ଯାତନା ଦିଆଯାଉଥିବା ଅଭିଯୋଗ ହୋଇଛି।  କିଛି ଦିନ ତଳେ ବିଜୟିନୀକୁ ଛାଡପତ୍ର ଦେଇଥିବା ଦର୍ଶାଇ ଅନ୍ୟ ଜଣେ ଝିଅକୁ ବିବାହ କରିଥିଲେ ବାପୁଜୀ । ହେଲେ ବିଜୟନୀ ଛାଡପତ୍ର କଥା କିଛି ଜାଣି ନଥିବା କହିଛନ୍ତି । ତେବେ ସେ ଚତୁରତାର ସହ ବିଜୟନୀକୁ ଛାଡପତ୍ର ଦେଇ ଅନ୍ୟ ଜଣେ ଝିଅକୁ ବିବାହ କରିଥିବା ନେଇ କୁଜଙ୍ଗ ଥାନାରେ ଏତଲା ଦେଇଛନ୍ତି ପରିବାର ଲୋକ ।