05-Jul-2026

ସୁବର୍ଣ୍ଣପୁର (ମନୋରଞ୍ଜନ ତ୍ରିପାଠୀ )
ଜିଲ୍ଲା ଶିଳ୍ପ କେନ୍ଦ୍ର (ଡି.ଆଇ.ସି), ସୁବର୍ଣ୍ଣପୁର ଦ୍ବାରା ଆୟୋଜିତ ପାଞ୍ଚଦିନିଆ “ଉଦ୍ୟମୀ ଓଡ଼ିଶା ଏମ.ଏସ.ଏମ.ଇ କାର୍ଯ୍ୟକ୍ରମ- ୨୦୨୬″ ବୁଧବାର ତା.୦୧.୦୭.୨୦୨୬ରିଖ ଦିନ ସଫଳତାର ସହ ଉଦଯାପିତ ହୋଇଛି। ଏହି କାର୍ଯ୍ୟକ୍ରମରେ ଉଦ୍ୟମୀ ହେବାକୁ ଇଚ୍ଛୁକ ଯୁବକ-ଯୁବତୀ, ଛାତ୍ରଛାତ୍ରୀ, ଶିକ୍ଷାନୁଷ୍ଠାନ, ସରକାରୀ ବିଭାଗ, ଆର୍ଥକ ଅନୁଷ୍ଠାନ ଏବଂ ଶିଳ୍ପ ପ୍ରତିନିଧି ମାନେ ଉତ୍ସାହର ସହ ଅଂଶଗ୍ରହଣ କରିଥିଲେ। ଏହି କାର୍ଯ୍ୟକ୍ରମର ଉଦ୍ଦେଶ୍ୟ ଥିଲା ଉଦ୍ୟୋଗିକତାର ପ୍ରସାର, ବିଭିନ୍ନ ସରକାରୀ ଯୋଜନା ସମ୍ପର୍କରେ ସଚେତନତା ସୃଷ୍ଟି ଏବଂ ଯୁବପିଢ଼ୀଙ୍କୁ ସ୍ବରୋଜଗାର ଓ ଉଦ୍ୟୋଗ ସ୍ଥାପନ ଦିଗରେ ପ୍ରେରିତ କରିବ l 
ଗତ ଜୁନ୍ ୨୭ ତାରିଖରେ ଏହି କାର୍ଯ୍ୟକ୍ରମର ଶୁଭାରମ୍ଭ ଏକ ଭବ୍ୟ ଉଦଘାଟନୀ ସମାରୋହ ମାଧ୍ୟମରେ ହୋଇଥିଲା। ଜିଲ୍ଲା ଯୋଜନା ସମିତିର ଅଧ୍ଯକ୍ଷ ତଥା ବୀରମହାରାଜପୁରର ମାନ୍ୟବର ବିଧାୟକ ଇଂ .ରଘୁନାଥ ଜଗଦଲା ମହୋଦୟ ମୁଖ୍ୟ ଅତିଥି ଭାବେ ଯୋଗଦେଇଥିଲେ। ଏହି ଅବସରରେ ସ୍ଥାନୀୟ ଉଦ୍ୟୋଗୀ, ସ୍ବୟଂ ସହାୟକ ଗୋଷ୍ଠୀ (ଏସ.ଏଚ.ଜି) ଓ ଅଣୁ. କ୍ଷୁଦ୍ର ଏବଂ ମଧ୍ୟମ ଉଦ୍ୟୋଗ (ଏମ.ଏସ.ଏମ.ଇ) ମାନଙ୍କ ଉତ୍ପାଦ ପ୍ରଦର୍ଶନୀର ମଧ୍ୟ ଉଦଘାଟନ କରାଯାଇଥିଲା। ବକ୍ତାମାନେ ଉଦ୍ୟୋଗୀ ସଚେତନତା ଓ ଋଣ ସହାୟତାର ସମ୍ବନ୍ଧରେ ଆଲୋକପାତ କରିଥିଲେ।
ଦ୍ବିତୀୟ ଦିନରେ ଅତିରିକ୍ତ ଜିଲ୍ଲାପାଳ,(ସାଧାରଣ ),ସୁବର୍ଣ୍ଣପୁର ଶ୍ରୀମତୀ ଅଞ୍ଜଳିନା ପ୍ରଧାନଙ୍କ ଅଧ୍ୟକ୍ଷତାରେ ଉଦ୍ୟୋଗୀ ଦକ୍ଷତା ବିକାଶ ଓ ସ୍ବୟଂ ସହାୟକ ଗୋଷ୍ଠିଙ୍କ ପାଇଁ ସହାୟତା ସମ୍ବନ୍ଧରେ ଅଧି ବେଶନ ଆୟୋଜିତ ହୋଇଥିଲା। ଅଂଶଗ୍ରହଣକାରୀମାନେ ସକ୍ରିୟ ଭାବରେ ଆଲୋଚନାରେ ଭାଗ ନେଇ ନିଜର ସନ୍ଦେହ ଦୂର କରିଥିଲେ।
ତୃତୀୟ ଦିନରେ ମୁଖ୍ୟ ଉନ୍ନୟନ ଅଧିକାରୀ - ତଥା -ନିର୍ବାହୀ ଅଧିକାରୀ, ଜିଲ୍ଲା ପରିଷଦ, ସୁବର୍ଣ୍ଣପୁର ଶ୍ରୀ ଅଶ୍ୱିନୀ କୁମାର ମେହେରଙ୍କ ଅଧ୍ୟକ୍ଷତାରେ ମାର୍କେଟିଂ, ନବସୃଜନ, ଷ୍ଟାର୍ଟଅପ୍ ସୁଯୋଗ, ବ୍ରାଣ୍ଡିଂ, ବଜାର ସଂଯୋଗ ଏବଂ ପ୍ରଭାବଶାଳୀ ଉଦ୍ୟୋଗ ପରିଚାଳନା ଉପରେ ଅଧୁବେଶନ ଅନୁଷ୍ଠିତ ହୋଇଥିଲା । ଉଦ୍ୟମୀ ହେବାକୁ ଇଚ୍ଛୁକ ଯୁବମାନଙ୍କୁ ଆଧୁନିକ ବ୍ୟବସାୟ ପଦ୍ଧତି ଅନୁସରଣ କରିବା ଓ ବିଭିନ୍ନ ଏମଏସଏମଇ ଏବଂ ଷ୍ଟାର୍ଟଅପ୍ ଯୋଜନାର ସୁବିଧାର ସର୍ବୋତ୍ତମ ବ୍ୟବହାର କରିବା ପାଇଁ ପ୍ରେରିତ କରାଯାଇଥିଲା ।
ଚତୁର୍ଥ ଦିନରେ ଅତିରିକ୍ତ ଜିଲ୍ଲାପାଳ(ରାଜସ୍ବ), ସୁବର୍ଣ୍ଣପୁର ଶ୍ରୀଯୁକ୍ତ ରାଜେନ୍ଦ୍ର ମାଝିଙ୍କ ଅଧ୍ଯକ୍ଷତାରେ ସୁବର୍ଣ୍ଣପୁର ଜିଲ୍ଲା ସ୍ଥିତ ମହାବିଦ୍ୟାଳୟ ଏବଂ ଆଇ. ଟି. ଆଇ ଗୁଡିକର ଛାତ୍ରଛାତ୍ରୀମାନଙ୍କ ମଧ୍ୟରେ ଉଦ୍ୟୋଗିକତା ସମ୍ପର୍କିତ ସଚେତନତା ବୃଦ୍ଧି ଉଦ୍ଦେଶ୍ୟରେ ପ୍ରବନ୍ଧ ଲେଖନ, ଚିତ୍ରାଙ୍କନ, ବିତର୍କ ଏବଂ କୁଇଜ୍‌ ପ୍ରତିଯୋଗିତା ଆୟୋଜିତ ହୋଇଥିଲା। ଏହି ପ୍ରତିଯୋଗିତାଗୁଡ଼ିକରେ ଛାତ୍ରଛାତ୍ରୀମାନଙ୍କ ଉତ୍ସାହଜନକ ଅଂଶଗ୍ରହଣ ନବସୃଜନ, ସୃଜନଶୀଳତା ଓ ଉଦ୍ୟୋଗିକ ଚିନ୍ତାଧାରାକୁ ପ୍ରୋତ୍ସାହିତ କରିଥିଲା।
ପଞ୍ଚମ ଏବଂ ଶେଷ ଦିନରେ ସୋନପୁର ପୌରପରିଷଦର ପୌରାଧ୍ଯକ୍ଷା ଶ୍ରୀମତୀ ତାମସୀ ତାମସ୍ମିତା ନାୟକଙ୍କ ଅଧ୍ୟକ୍ଷତାରେ ଉଦଯାପନୀ ସମାରୋହଟି ସମ୍ପର୍ଣ୍ଣ ହୋଇଥିଲା ଏଥିରେ ପଏଁରୀ ଅନୁଷ୍ଠାନ ଦ୍ବାରା  ଗୀତ ମାଧ୍ୟମରେ ଏମ. ଏସ. ଏମ. ଇ ବିଭାଗ ଅନ୍ତର୍ଗତ ବିଭିନ୍ନ ଯୋଜନା ଏବଂ ଅଭିଯୋଗ ସମ୍ପର୍କିତ ସୂଚନା ପ୍ରଦାନ କରାଯାଇଥିଲା । ଏହି ସମାରୋହରେ ବିଶିଷ୍ଟ ଅତିଥି, ବରିଷ୍ଠ ଅଧିକାରୀ, ଶିକ୍ଷାବିତ୍, ବ୍ୟାଙ୍କର, ଉଦ୍ୟୋଗୀ ଓ ଅଂଶଗ୍ରହଣକାରୀମାନେ ଉପସ୍ଥିତ ଥିଲେ। ଅତିଥିମାନେ ନିଜ ବକ୍ରବ୍ୟରେ ଆର୍ଥିକ ସ୍ବାବଲମ୍ବନ, ରୋଜଗାର ସୃଷ୍ଟି ଏବଂ ସ୍ଥାୟୀ ବିକାଶ ହାସଲ କରିବାରେ ଉଦ୍ୟୋଗିକତାର ଗୁରୁତ୍ବ ଉପରେ ଆଲୋକପାତ କରିଥିଲେ । କୁଇଜ୍, ବିତର୍କ, ପ୍ରବନ୍ଧ ଲେଖନ ଓ ଚିତ୍ରାଙ୍କନ ପ୍ରତିଯୋଗିତାର ବିଜେତାମାନଙ୍କୁ ଟ୍ରଫି, ପ୍ରମାଣପତ୍ର ଓ ପୁରସ୍କାର ପ୍ରଦାନ କରାଯାଇଥିଲା। ପାଞ୍ଚଦିନିଆ ଉଦ୍ୟୋଗିକତା କାର୍ଯ୍ୟକ୍ରମର ସମସ୍ତ ଅଂଶଗ୍ରହଣକାରୀଙ୍କୁ ମଧ୍ୟ ଅଂଶଗ୍ରହଣ ପ୍ରମାଣପତ୍ର ବଣ୍ଟନ କରାଯାଇଥିଲା।
ଜିଲ୍ଲା ଶିଳ୍ପ କେନ୍ଦ୍ର, ସୁବର୍ଣପୁରର ସାଧାରଣ ପରିଚାଳିକା ଇଂ. ସୁଷମା କରାଳି ସମସ୍ତ ବିଶେଷଜ୍ଞ, ସରକାରୀ ବିଭାଗ, ଶିକ୍ଷାନୁଷ୍ଠାନ, ଆର୍ଥିକ ଅନୁଷ୍ଠାନ, ଉଦ୍ୟୋଗୀ, ଗଣମାଧ୍ୟମ ପ୍ରତିନିଧି ଓ ଅଂଶଗ୍ରହଣକାରୀମାନଙ୍କୁ ସେମାନଙ୍କର ଆନ୍ତରିକ ସହଯୋଗ ପାଇଁ କୃତଜ୍ଞତା ଜଣାଇଥିଲେ ଏବଂ ଧନ୍ୟବାଦ ଅର୍ପଣ କରିଥିଲେ ।