13-Jun-2026

ବରପାଲି : (ସୁଦାମ ଦୀପ) ବରଗଡ଼ ଜିଲ୍ଲା ଅତାବିରା ବ୍ଲକ ଅନ୍ତର୍ଗତ ଲହଣ୍ଡା ଗ୍ରାମରେ ପୁନର୍ବାର ସାପ୍ତାହିକ ବଜାର ବସାଇବାକୁ ନେଇ ଗ୍ରାମବାସୀ ଓ ପଞ୍ଚାୟତ ପକ୍ଷରୁ ସକ୍ରିୟ ପଦକ୍ଷେପ ଗ୍ରହଣ କରାଯାଇଛି। ଏହାକୁ ନେଇ ଲହଣ୍ଡା ବଜାର ପ୍ରାଙ୍ଗଣରେ ପୂର୍ବତନ ସରପଞ୍ଚ ଦୟାସାଗର ମେଣ୍ଡଳୀଙ୍କ ସଭାପତିତ୍ୱରେ ଏକ ସାଧାରଣ ବୈଠକ ଅନୁଷ୍ଠିତ ହୋଇଥିଲା। ବୈଠକରେ ଗ୍ରାମର ବହୁ ବୁଦ୍ଧିଜୀବୀ, ଜନପ୍ରତିନିଧି ଓ ସାଧାରଣ ଲୋକ ଯୋଗଦେଇ ବଜାର ପୁନରୁଦ୍ଧାର ସମ୍ପର୍କରେ ବିସ୍ତୃତ ଆଲୋଚନା କରିଥିଲେ।ସୂଚନାଯୋଗ୍ୟ ଯେ, କିଛି ବର୍ଷ ପୂର୍ବରୁ ଲହଣ୍ଡା ଗ୍ରାମରେ ପ୍ରତି ମଙ୍ଗଳବାର ସାପ୍ତାହିକ ବଜାର ବସୁଥିଲା। ଏହି ବଜାର ଅଞ୍ଚଳର ଚାଷୀ, କ୍ଷୁଦ୍ର ବ୍ୟବସାୟୀ ଏବଂ ସାଧାରଣ ଲୋକଙ୍କ ପାଇଁ ଜୀବିକା ଓ କିଣାବିକାର ଏକ ପ୍ରମୁଖ କେନ୍ଦ୍ର ଥିଲା। ସ୍ଥାନୀୟ ଉତ୍ପାଦିତ ପନିପରିବା, ଶସ୍ୟ ଓ ଅନ୍ୟାନ୍ୟ ସାମଗ୍ରୀର ବିକ୍ରିବଟା ଏଠାରେ ହେଉଥିବାରୁ ଚାଷୀମାନେ ସିଧାସଳଖ ଭାବେ ଉପକୃତ ହେଉଥିଲେ। ତେବେ କୌଣସି କାରଣବଶତଃ ଏହି ବଜାର ବନ୍ଦ ହୋଇଯାଇଥିଲା। ଫଳସ୍ୱରୂପ ଗ୍ରାମବାସୀଙ୍କୁ ଦୈନନ୍ଦିନ ଆବଶ୍ୟକ ସାମଗ୍ରୀ କିଣିବା ପାଇଁ ଅତାବିରା ଗୋଡ଼ଭଗା ବଜାର ଉପରେ ନିର୍ଭର କରିବାକୁ ପଡୁଥିଲା।ବୈଠକରେ ଉପସ୍ଥିତ ସଦସ୍ୟମାନେ ମତ ପ୍ରକାଶ କରିଥିଲେ ଯେ, ସାପ୍ତାହିକ ବଜାର ପୁନର୍ବାର ଆରମ୍ଭ ହେଲେ ସ୍ଥାନୀୟ ବ୍ୟବସାୟ ବୃଦ୍ଧି ପାଇବା ସହ ଅଞ୍ଚଳର ଆର୍ଥିକ କାର୍ଯ୍ୟକଳାପ ମଧ୍ୟ ତ୍ୱରାନ୍ୱିତ ହେବ। ଏହା ସହିତ ଚାଷୀମାନେ ନିଜ ଉତ୍ପାଦକୁ ସ୍ଥାନୀୟ ସ୍ତରରେ ବିକ୍ରି କରିପାରିବେ ଏବଂ ଗ୍ରାମବାସୀମାନେ ସହଜରେ ଆବଶ୍ୟକ ସାମଗ୍ରୀ ପାଇପାରିବେ।ଗ୍ରାମର ସାମଗ୍ରିକ ବିକାଶ, ସ୍ଥାନୀୟ ବ୍ୟବସାୟକୁ ପ୍ରୋତ୍ସାହନ ଓ ଜନସାଧାରଣଙ୍କ ସୁବିଧାକୁ ଦୃଷ୍ଟିରେ ରଖି ବଜାର ପୁନର୍ବାର ଆରମ୍ଭ କରିବାକୁ ସର୍ବସମ୍ମତିକ୍ରମେ ନିଷ୍ପତ୍ତି ଗ୍ରହଣ କରାଯାଇଥିଲା। ବଜାରକୁ ଶୃଙ୍ଖଳିତ ଓ ସୁପରିଚାଳିତ ଭାବେ ପରିଚାଳନା କରିବା ପାଇଁ ଏକ ୧୫ ଜଣିଆ ପରିଚାଳନା କମିଟି ଗଠନ କରାଯିବ ବୋଲି ମଧ୍ୟ ବୈଠକରେ ସ୍ଥିର କରାଯାଇଥିଲା।ଏହି ବୈଠକରେ ସରପଞ୍ଚ ଅର୍ଜୁନ ନାୟକ, କ୍ଷୀରେଶ୍ୱର ବେହେରା, ଯୋଗେନ୍ଦ୍ର ଥପା, ଟଙ୍କଧର ମାଝୀ, ହରିହର ପ୍ରଧାନ, ମୂଳଜୀ ପ୍ରଧାନ, ସୁଶାନ୍ତ ଶତପଥୀ, ଗୋପାଳ ପ୍ରଧାନ, ସଦାଶିବ ସାହୁ, ନାରାୟଣ ବର୍ଗ ପ୍ରମୁଖଙ୍କ ସମେତ ବହୁ ପଞ୍ଚାୟତବାସୀ ଉପସ୍ଥିତ ରହି ବଜାର ପୁନଃ ଆରମ୍ଭ ନିଷ୍ପତ୍ତିକୁ ସ୍ୱାଗତ କରିଥିଲେ। ଗ୍ରାମବାସୀଙ୍କ ଆଶା, ବହୁ ବର୍ଷ ପରେ ଲହଣ୍ଡାରେ ପୁଣିଥରେ ସାପ୍ତାହିକ ବଜାର ବସିବା ଦ୍ୱାରା ଅଞ୍ଚଳର ଆର୍ଥିକ ଓ ସାମାଜିକ ବିକାଶରେ ଏକ ନୂଆ ଅଧ୍ୟାୟର ସୂଚନା ମିଳିବ। ବଜାର ପୁନରୁଦ୍ଧାର ପାଇଁ ଗ୍ରାମବାସୀଙ୍କ ଏକତା ଓ ଉଦ୍ୟମ ଏବେ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି।