06-Jun-2026

କଟକ(ତପନ ମହାନ୍ତି ) ଅଭିଯୋଗକାରୀ ନିଜ ଘରେ ନଥିବା ସମୟରେ ଅଜଣା ଦୁର୍ବୃତ୍ତମାନେ ତାଙ୍କ ଘରେ ପଶି ଚୋରି କରିଥିଲେ। ଚୋରି ହୋଇଥିବା ସାମଗ୍ରୀ ମଧ୍ୟରେ ଦୁଇଟି ନିକନ କ୍ୟାମେରା, ୧୨ଟି କ୍ୟାମେରା ଲେନ୍ସ, ଦୁଇଟି ଟମି ହିଲଫିଗର ହାତଘଡ଼ି, ଏକ ସୋନି ସାଇବରସଟ୍ କ୍ୟାମେରା, ଗାଡ଼ି ଚାବି, ୧୨,୦୦୦/- ଟଙ୍କା ନଗଦ ଏବଂ ଅନ୍ୟାନ୍ୟ ମୂଲ୍ୟବାନ ସାମଗ୍ରୀ ରହିଥିଲା। ତଦନ୍ତ ସମୟରେ ତା. ୦୬.୦୬.୨୦୨୬ ରେ ସୂଚନା ମିଳିଥିଲା ଯେ, ତିନିଜଣ ବ୍ୟକ୍ତି ଶିଖରଚଣ୍ଡୀ ନଗର ଅଞ୍ଚଳରେ ସନ୍ଦେହଜନକ ଭାବେ ବୁଲୁଥିବା ସହ ଅତି କମ୍ ଦରରେ ଏକ ଲାପଟପ୍ ବିକ୍ରି କରିବାକୁ ଉଦ୍ୟମ କରୁଛନ୍ତି। ଏହି ସୂଚନା ଆଧାରରେ ପୋଲିସ ଚଢ଼ାଉ କରି ଅଭିଯୁକ୍ତ ବିକି ସ୍ୱାଇଁ, ଶିବ ସାହୁ ଏବଂ ଏସ୍‌.କେ. ସଲିମଙ୍କୁ କାବୁ କରିଥିଲା। ସେମାନଙ୍କ ନିକଟରୁ ଏକ କଳା ରଙ୍ଗର ମାଇକ୍ରୋମାକ୍ସ ଲାପଟପ୍ ଏବଂ ଭଙ୍ଗା ପାଣି ଟ୍ୟାପ୍ ଭର୍ତ୍ତି ଏକ ବ୍ୟାଗ ଜବତ କରାଯାଇଥିଲା।ପଚରାଉଚରା ସମୟରେ ଅଭିଯୁକ୍ତମାନେ ବର୍ତ୍ତମାନ ମାମଲାରେ ସେମାନଙ୍କର ସମ୍ପୃକ୍ତି ସ୍ୱୀକାର କରିଥିଲେ ଏବଂ ତା. ୦୨.୦୬.୨୦୨୬ ରାତିରେ ଅଭିଯୋଗକାରୀଙ୍କ ଘରେ ଚୋରି କରିଥିବା ସ୍ଵୀକାର କରିଥିଲେ। ସେମାନେ ଚୋରି ହୋଇଥିବା କ୍ୟାମେରାଗୁଡ଼ିକୁ ବାପୁଜୀ ନଗର ଅଞ୍ଚଳର ଜଣେ ଅଜଣା ଦୋକାନୀଙ୍କୁ ବିକ୍ରି କରିଦେଇଥିବା କଥା ମଧ୍ୟ ସ୍ୱୀକାର କରିଥିଲେ। ତେବେ ଚୋରି ସାମଗ୍ରୀ ଗ୍ରହଣକାରୀ ସମ୍ପର୍କରେ ସେମାନେ ଅଧିକ ସୂଚନା ଦେଇପାରିନଥିଲେ।ତଦନ୍ତରୁ ଆହୁରି ଜଣାପଡ଼ିଥିଲା ଯେ, ଅଭିଯୁକ୍ତମାନେ ତା. ୧୯.୦୫.୨୦୨୬ ରେ ନନ୍ଦନ ବିହାର ଅଞ୍ଚଳରେ ଘଟିଥିବା ଅନ୍ୟ ଏକ ସିନ୍ଧିଚୋରି ଘଟଣାରେ ମଧ୍ୟ ସମ୍ପୃକ୍ତ ଥିଲେ, ଯେଉଁଥିରେ ଘରୁ ପାଣି ଟ୍ୟାପ୍ ଏବଂ ବିଦ୍ୟୁତ ତାର ଚୋରି ହୋଇଥିଲା। ଏହି ଘଟଣା ଇନଫୋସିଟି ଥାନା କେସ୍ ନଂ-୪୩୨, ତା. ୨୪.୦୫.୨୦୨୬ ସହ ସମ୍ପୃକ୍ତ ବୋଲି ଜଣାପଡ଼ିଥିଲା। ଚୋରି ହୋଇଥିବା କେତେକ ଟ୍ୟାପ୍ ଅଭିଯୁକ୍ତମାନେ ନିଜ ପାଖରେ ରଖିଥିବା ବେଳେ ଅନ୍ୟଗୁଡ଼ିକୁ କବାଡ଼ିଆଙ୍କ ନିକଟରେ ବିକ୍ରି କରିଦେଇଥିବା ଜଣାପଡ଼ିଥିଲା। ଜବତ ଲାପଟପ୍ ଏବଂ ଭଙ୍ଗା ଟ୍ୟାପ୍ ଗୁଡ଼ିକୁ ମାମଲାର ପ୍ରମାଣ ସ୍ୱରୂପ ଜବତ କରାଯାଇଥିଲା।ଅଭିଯୁକ୍ତ ବିକି ସ୍ୱାଇଁ, ଶିବ ସାହୁ ଏବଂ ଏସ୍‌.କେ. ସଲିମଙ୍କ ବିରୋଧରେ ଅପରାଧ ସ୍ପଷ୍ଟ ହେବାରୁ ସେମାନଙ୍କୁ ଗିରଫ କରାଯାଇ କୋର୍ଟ ଚାଲାଣ କରା ଜାଇଥିବା ଥାନା ସୁତରୁ ପ୍ରକାଶ।,