06-Jun-2026

ବଲାଙ୍ଗୀର(ପ୍ରେରଣା ଖବର): ବଲାଙ୍ଗୀର ସହରରେ ଚଳିତବର୍ଷ ୧୧ଟି ବନ୍ଧକଟାର ପୁନଃରୁଦ୍ଧାର କାମ ଚାଲୁରହିଛି । ନିର୍ବାଚନ ସମୟରେ ବିଧାୟକ କଳିକେଶ ନାରାୟଣ ସିଂଦେଓ ସହରର ବନ୍ଧକଟାର ପୁନଃରୁଦ୍ଧାର ପାଇଁ ପ୍ରତିଶୃତି ଦେଇଥିଲେ ଯାହାକି ଆଜି ପୂରଣ ହେବାକୁ ଯାଉଛି । ପ୍ରାୟ ୧୪କୋଟି ଟଙ୍କାର ଅନୁଦାନରେ ମାଟିଉନ୍ନତିକରଣ କାମ ଚାଲୁଛି । ଯୁଦ୍ଧକାଳିନ ଭିତ୍ତିରେ ଏହି କାମଗୁଡିକ ଚାଲିଛି । ମାଟିକାମ ପରେ ପାରିପାଶ୍ୱିର୍କ ସୌନ୍ଦର୍ଯ୍ୟକରଣ ହେବ । ସହରକୁ ଭିନ୍ନରୂପ ଦେବାକୁ ପ୍ରଚେଷ୍ଟା ଚାଲିଛି । ପୌରପାଳିକାର ଅଧିକାରୀ,କର୍ମଚାରୀଗଣ ଓ କାଉନସିଲର ଗଣ ପୂର୍ଣ୍ଣପ୍ରାଣରେ ଏହାକୁ ସଫଳ କରିବାକୁ ପରିଶ୍ରମ କରୁଛନ୍ତି ।  ତେବେ ବଲାଙ୍ଗୀର ସହରର ବିକାଶ ଦେଖି ବିରୋଧି ବିଚଳିତ ହୋଇପଡିଛନ୍ତି । ବିକାଶରେ ବିରୋଧି ବିଚଳିତ ନହୋଇ ସହଯୋଗ କରନ୍ତୁ ବୋଲି ବଲାଙ୍ଗୀର ପୌରାଧ୍ୟକ୍ଷା ଲିକା ସାହୁ କହିଛନ୍ତି । ସହରବାସୀଙ୍କୁ ବିଭ୍ରାନ୍ତ ନକରି ବିରୋଧି ସତ୍ୟକୁ ସ୍ୱୀକାର କରନ୍ତୁ । ରାଜୁଡା ଅମଳରୁ ଥିବା ବନ୍ଧକଟାଗୁଡିକର ପୁନଃରୁଦ୍ଧାର ପାଇଁ ପୌରପାଳିକା ଏକ ଐତିହାସିକ ପଦକ୍ଷେପ ନେଇଛି । ଜୁନ ୧୫ ପର୍ଯ୍ୟନ୍ତ ମାଟିଉନ୍ନତିକରଣ କରାଯିବ । ମାଟିକାମକୁ ସ୍ୱଚ୍ଛତା ପୂର୍ବକ କରି ପୂର୍ଣ୍ଣଭାବରେ ସାରିବାକୁ ଚେଷ୍ଟା କରାଯାଉଛି । ଅନେକବନ୍ଧର କାମ ବହୁତ ଆଗକୁ ଯାଇସାରିଛି । ତେଣୁ ପୌରପାଳିକାର ସଫଳତାକୁ ବିରୋଧି ସହିପାରୁ ନାହାଁନ୍ତି । ବିରୋଧି କଂଗ୍ରେସର ଦଶବର୍ଷ ଶାସନରେ ବଲାଙ୍ଗୀରର ଗୋଟିଏ ମଧ୍ୟ ବନ୍ଧର ଉନ୍ନତିକରଣ କରାଇପାରିଲେ ନାହିଁ । ମହାରାଣୀସାଗର ଉନ୍ନତିକରଣ ବେଳେ ମଧ୍ୟ ବିରୋଧି ବିରୋଧ କରିଥିଲେ । ଯଦି ମହାରାଣୀସାଗରରେ ଦୁର୍ନୀତି ହୋଇଛି ବୋଲି ଅଭିଯୋଗ କରୁଛନ୍ତି ତାହେଲେ ଭିଜିଲାନ୍ସକୁ ଲେଖି ତଦନ୍ତ କରାନ୍ତୁ ବୋଲି ପୌରାଧ୍ୟକ୍ଷା କହିଛନ୍ତି । କଂଗ୍ରେସର ନରସିଂହ ମିଶ୍ର ବିଧାୟକ ଥିବା ବେଳେ ଲକ୍ଷ୍ମୀଯୋର କାମ କରାଇଥିଲେ । ୨୦ କୋଟି ଟଙ୍କାର ଖର୍ଚ୍ଚରେ ନିର୍ମାଣ ହୋଇ ଥିବା ଲକ୍ଷ୍ମୀ ଯୋର ପ୍ରକଲ୍ପ ବଲାଙ୍ଗୀରବାସୀଙ୍କର କେଉଁ କାମରେ  ଆସୁଛି ତାହା ଲୋକଙ୍କୁ କଂଗ୍ରେସଦଳ ଉତ୍ତର ଦେବାର ଆବଶ୍ୟକତା ରହିଛି । ଲକ୍ଷ୍ମୀ ଯୋର ମହାଦୁର୍ନିତୀର ତଦନ୍ତ ପାଇଁ କଂଗ୍ରେସଦଳ ଦାବି କରିବ କି ବୋଲି ଓଲଟା ପ୍ରଶ୍ନ କରିଛନ୍ତି । କରୋନା ସମୟରେ ନରସିଂହ ମିଶ୍ର ବ୍ରାହ୍ମଣପଡା ଓ ସୂର୍ଯ୍ୟନଗର ଅଞ୍ଚଳରେ

ଗରୀବଙ୍କ ଘର ଭଙ୍ଗାଇଥିଲେ । ସେହି ଜମିରେ କଣସବୁ ଉନ୍ନତିକରଣ କରାଇଲେ କଂଗ୍ରେସଦଳ ଦଳ ବଲାଙ୍ଗୀରବାସୀ ଙ୍କୁ ଉତ୍ତର ରଖୁ ବୋଲି କୁହାଯାଇଛି । ଆଜି କଂଗ୍ରେସଦଳ ଦୁର୍ନିତୀ ଅଭିଯୋଗ ଆଣି ଲୋକଙ୍କୁ ବିଭ୍ରାନ୍ତ କରିବାକୁ ଚେଷ୍ଟା କରିଛି । ସେଥିପାଇଁ ବଲାଙ୍ଗୀରର ଶହଶହ ମହିଳା ଆସି ସେମାନଙ୍କୁ ଉଚିତ ଜବାବ ଦେଇଛନ୍ତି । ବଲାଙ୍ଗୀର ପୌରପାଳିକାର ଉପାଧ୍ୟକ୍ଷା ଗାୟତ୍ରୀ ଭୋଇ, କାଉନସିଲର ଶମ୍ଭୁ ନାଗ, ଇରସାଦ ଆରାଖାନ, ଶତୃଘ୍ନ ନାଗ, ନନ୍ଦନୀ ପୋଢ, ଲଲାଟେନ୍ଦୁ ପଟ୍ଟନାୟକ,ଗଙ୍ଗାଧର ଚାନ୍ଦ, ପିଂକି କବାଟ, ମୁନା ଖାଁ, ସନ୍ତୋଷ ଦନ୍ତା, ସତ୍ୟ ନାୟକ,ସଚିନ ନନ୍ଦ, ବିଭୂତି ଭୂଷଣ ମିଶ୍ର ପ୍ରମୁଖଙ୍କ ସହିତ ବହୁସଂଖ୍ୟାରେ ବିଜେଡି କର୍ମୀ ଆଜି ସାମିଲ ହୋଇଥିଲେ ।