16-May-2026

ବଲାଙ୍ଗୀର (ପ୍ରେରଣା ଖବର):  ହିନ୍ଦୁ ଧର୍ମ ଓ ପରମ୍ପରାରେ ପତି ଙ୍କୁ  ପରମେଶ୍ୱର କୁହାଯାଇଥାଏ । ଏହି ପତି ପରମେଶ୍ୱର ଙ୍କ ଦୀର୍ଘ ଓ ନିରାମୟ ଜୀବନ  କାମନା କରି ସାବିତ୍ରୀ ବ୍ରତ ପାଳନ କରାଯାଇଥାଏ ।

 ପୂରାଣ ଉପାଖ୍ୟାନ ଅନୁସାରେ ସାବିତ୍ରୀ ଓ ସତ୍ୟବାନଙ୍କ ଅନାବିଳ ନିସର୍ତ୍ତ ପ୍ରେମ ଓ ନିଷ୍ଠାର ପ୍ରତୀକ ହେଉଛି ସାବିତ୍ରୀ ଅମାବାସ୍ୟା । ପ୍ରତିବର୍ଷ ଜୈଷ୍ଠ ମାସ ଅମାବାସ୍ୟା ତିଥିରେ ଅମ ରାଜ୍ୟର ପୁରପଲ୍ଲୀରେ ମହିଳା ମାନେ ନିଜ ସ୍ୱାମୀଙ୍କ ମଙ୍ଗଳ ମନାସୀ ଏହି ବ୍ରତକୁ ସଂପୂଣ୍ଣ ପାରମ୍ପରିକ ରୀତିନୀତିରେ ପାଳନ କରିଥାନ୍ତି । କେଉଁ ଆବହମାନ କାଳରୁ ଏହି ବ୍ରତକୁ ପାଳନ କରାଯାଉଛି।

  ଜଣେ ସାଧାରଣ ରାଜକନ୍ୟା ନିଜର ନିଷ୍କାମ ପ୍ରେମ ବଳରେ କିପରି ସ୍ୱୟଂ ମୃତ୍ୟୁର ଦେବତା ଯମ ଙ୍କୁ ପରାଜିତ କରି ତାଙ୍କର ଆଶିଷ ଲାଭ କରିପାରିଛନ୍ତି ଏବଂ ପରିିଶେଷରେ ସ୍ୱାମୀ ସତ୍ୟବାନଙ୍କ ଜୀବନ ତାଙ୍କ ଠାରୁ ଫେରାଇ ଆଣିପାରିଛନ୍ତି, ତାହାର ମାର୍ମିକ ଉପାଖ୍ୟାନ ହେଉଛି ସାବିତ୍ରୀ ସତ୍ୟବାନଙ୍କ ଉପାଖ୍ୟାନ । ଏହି ଓଷା ସେହି ଉପାଖ୍ୟାନ ଉପରେ ଆଧାରିତ । ଆଜି ବଲାଙ୍ଗୀର ସହର ଟିକ୍ରପଡା ସ୍ଥିତ ମାଁଁ ରାଜେଶ୍ୱରୀ ଭବନ ଠାରେ  ପ୍ରତିବର୍ଷ ପରି ଏହି ବ୍ରତକୁ ପଡାର ମହିଳା ମାନେ ନିଷ୍ଠାର ସହ ପାଳନ କରିଛନ୍ତି। ମହିଳା ମାନେ ଉପବାସ ରହି ଲକ୍ଷ୍ମୀ ନାରାୟଣ ତଥା ସାବିତ୍ରୀ ସତ୍ୟବାନଙ୍କ ନିକଟରେ ଚୁଡି, ସିନ୍ଦୁର, ନୂଆବସ୍ତ୍ର ଅର୍ପଣ କରିବା ସହ ୨୧ପ୍ରକାର ନୈବେଦ୍ୟ ଦେଇ ନିଜ ନିଜ ପତିଦେବଙ୍କ ଦୀର୍ଘାୟୁ କାମନା କରିଥାନ୍ତି । ଏହି ଦିନ ପ୍ରତ୍ୟେକ ପତିବ୍ରତା ମହିଳା ବଟବୃକ୍ଷକୁ ପୂଜା କରିଥାନ୍ତି । ବଟବୃକ୍ଷରେ ପ୍ରେମର ପ୍ରତୀକ ଲାଲ ରଙ୍ଗର କପଡା ଦେଇ ନିଜର ବ୍ରତ ପାଳନ କରାଥାନ୍ତି। ଏହି ବ୍ରତ ଓଡ଼ିଶା ସମେତ ବିହାର, ଉତ୍ତରପ୍ରଦେଶ ଏପରିକି ନେପାଳରେ ମଧ୍ୟ ଭିନ୍ନଭିନ୍ନ ରୀତିନୀତି ପାଳନ କରା ଯାଉଥିବା ଜଣାଯାଏ । ପତିପତ୍ନୀଙ୍କ ନୈସର୍ଗିକ ସଂପର୍କ ଓ ପ୍ରେମର ବାର୍ତ୍ତା ବହନ କରୁଥିବା ଏହି ସାବିତ୍ରୀ ବ୍ରତ ହିନ୍ଦୁ ଧର୍ମର ଅନନ୍ୟ ପର୍ବ କହିଳେ ଅତ୍ୟୁକ୍ତି ହେବ ନାହିଁ।