10-May-2026

ଶପଥ ମଞ୍ଚରୁ ବଡ଼ ଘୋଷଣା କରିଛନ୍ତି ବିଜୟ। ୨୦୦ ୟୁନିଟ୍ ପର୍ଯ୍ୟନ୍ତ ମାଗଣା ବିଦ୍ୟୁତ୍, ଡ୍ରଗ୍ସ ନିୟନ୍ତ୍ରଣ ଓ ମହିଳାଙ୍କ ସୁରକ୍ଷା ସୁନିଶ୍ଚିତ ପାଇଁ ପାଇଁ ବିଶେଷ ଟାସ୍କ ଫୋର୍ସ ଗଠନ ହେବ। ଅଭିନେତାରୁ ରାଜନେତା ହୋଇଥିବା ସି. ଜୋସେଫ ବିଜୟ ରବିବାର ତାମିଲନାଡୁର ମୁଖ୍ୟମନ୍ତ୍ରୀ ଭାବେ ଦାୟିତ୍ୱ ଗ୍ରହଣ କରିଛନ୍ତି। ମଞ୍ଚରେ ଶପଥ ନେବାପରେ ସେହିଠାରେ ହିଁ ତିନି ବଡ଼ ନିଷ୍ପତ୍ତି ନେଇଛନ୍ତି ତାମିଲନାଡ଼ୁର ନୂଆ ମୁଖ୍ୟମନ୍ତ୍ରୀ ବିଜୟ। ଦାୟିତ୍ୱ ନେବା ପରେ ସେ କିଛି ଗୁରୁତ୍ୱପୂର୍ଣ୍ଣ ଫାଇଲରେ ସ୍ୱାକ୍ଷର କରିଛନ୍ତି। ବିଜୟ ନେଇଥିବା ତିନି ନିଷ୍ପତ୍ତି ହେଉଛି, ୨୦୦ ୟୁନିଟ୍ ପର୍ଯ୍ୟନ୍ତ ମାଗଣା ବିଦ୍ୟୁତ୍ ଯୋଗାଣ, ଡ୍ରଗ୍ସ ନିୟନ୍ତ୍ରଣ ପାଇଁ ବିଶେଷ ଟାସ୍କ ଫୋର୍ସ ଗଠନ କରାଯିବ। ରାଜ୍ୟର ପ୍ରତ୍ୟେକ ଜିଲ୍ଲାରେ ନିଶା ନିବାରଣ ୟୁନିଟ୍ ଖୋଲାଯିବ ବୋଲି ଘୋଷଣା କରିଛନ୍ତି ବିଜୟ। ମହିଳାଙ୍କ ସୁରକ୍ଷା ସୁନିଶ୍ଚିତ କରିବା ପାଇଁ ବିଶେଷ ଟାସ୍କ ଫୋର୍ସ ଗଠନ କରାଯିବ। ସାଧାରଣ ଲୋକଙ୍କ ସୁବିଧା, ସମାଜର ସୁରକ୍ଷା ଏବଂ ଆଇନ-ଶୃଙ୍ଖଳାକୁ ଦୃଷ୍ଟିରେ ରଖି ବିଜୟ ଏହି ଗୁରୁତ୍ବପୂର୍ଣ୍ଣ ନିଷ୍ପତ୍ତି ନେଇଛନ୍ତି।

ବିଜୟ କହିଛନ୍ତି ଯେ ପୂର୍ବତନ ଡିଏମକେ ସରକାର ରାଜ୍ୟ ଉପରେ ୧୦ ଲକ୍ଷ କୋଟି ଟଙ୍କାର ଋଣ ଛାଡିଯାଇଛି। ଏନେଇ ୨୦୨୧-୨୦୨୬ ଅବଧିର ରାଜ୍ୟ ଆର୍ଥିକ ସ୍ଥିତି ଉପରେ ଏକ ଶ୍ୱେତପତ୍ର ପ୍ରକାଶ କରାଯିବ। ଶପଥ ଗ୍ରହଣ ପରେ ବିଜୟ ଲୋକଙ୍କୁ ସମ୍ବୋଧିତ କରି ସ୍ୱଚ୍ଛ ପ୍ରଶାସନ ଦେବାକୁ ପ୍ରତିଶ୍ରୁତି ଦେଇଛନ୍ତି। ସେ କହିଛନ୍ତି, ନିର୍ବାଚନ ସମୟରେ ଦିଆଯାଇଥିବା ସମସ୍ତ ପ୍ରତିଶ୍ରୁତି ପୂରଣ ପାଇଁ ସେ ଚେଷ୍ଟା କରିବେ। ଶିକ୍ଷା, ସ୍ୱାସ୍ଥ୍ୟ, ଖାଦ୍ୟ ଯୋଗାଣ ଓ ମହିଳା ସୁରକ୍ଷା ତାଙ୍କ ସରକାରର

ପ୍ରମୁଖ ଧ୍ୟାନ କ୍ଷେତ୍ର ରହିବ ବୋଲି ସେ କହିଛନ୍ତି।
ରାଜ୍ୟରେ ସ୍ବଚ୍ଛ ପ୍ରଶାସନ
ସେ ଆହୁରି କହିଛନ୍ତି ଯେ ସରକାରରେ କୌଣସି ଦ୍ୱିତୀୟ ଶକ୍ତି କେନ୍ଦ୍ର ରହିବ ନାହିଁ ଏବଂ ସମସ୍ତ କାମ ସ୍ୱଚ୍ଛ ଭାବରେ କରାଯିବ। ବିରୋଧୀଙ୍କୁ ମଧ୍ୟ ସାଙ୍ଗରେ ନେଇ ତାମିଲନାଡୁର ଉନ୍ନତି ପାଇଁ କାମ କରିବେ ବୋଲି ବିଜୟ କହିଛନ୍ତି। ଏପରିକି ଯେଉଁମାନେ ମୋତେ ସମାଲୋଚନା ଏବଂ ଅପମାନିତ କରିଥିଲେ, ସେମାନେ ମଧ୍ୟ ମୋର ଲୋକ ବୋଲି କହିଛନ୍ତି ବିଜୟ।
ବିଜୟଙ୍କ ଅଭିଭାଷଣ ବହୁ ଗୁରୁତ୍ବ ବହନ କରୁଛି। କାରଣ ୨୩୪ ସଦସ୍ୟ ବିଶିଷ୍ଟ ତାମିଲନାଡୁ ବିଧାନସଭାରେ ସରକାରଙ୍କ ପାଖରେ କେବଳ କ୍ଷୀଣ ବହୁମତ ଅଛି, ଏବଂ ଅନେକ ଛୋଟ ଦଳର ସମର୍ଥନରେ ସରକାର ଗଢା ହୋଇଛି।

ରିପୋର୍ଟ : ତପନ ମହାନ୍ତି