01-May-2026

ମହିଳା ମାନଙ୍କ ଅବଦାନ ଓ ତ୍ୟାଗ ବିନା ସ୍ୱାଧୀନତା ସଂଗ୍ରାମ ସଫଳ ହୋଇନଥାନ୍ତା: ମାଧବ କୌଶିକ 

ଭୁବନେଶ୍ବର(ପ୍ରେରଣା ଖବର): ଆଜି କେନ୍ଦ୍ର ସାହିତ୍ୟ ଅକାଦେମି ଓ ରମାଦେବୀ ମହିଳା ବିଶ୍ବବିଦ୍ୟାଳୟର ମିଳିତ ଆନୁକୂଲ୍ୟରେ ‘ଓଡ଼ିଆ ନାରୀ ସ୍ବାଧୀନତା ସଂଗ୍ରାମୀ ଓ ଗାନ୍ଧୀବାଦ’ ଶୀର୍ଷକ ଏକ ଆଲୋଚନାଚକ୍ର ଅନୁଷ୍ଠିତ ହୋଇଯାଇଛି। ବିଶ୍ବବିଦ୍ୟାଳୟର ନୂତନ ପ୍ରେକ୍ଷାଳୟରେ ଆୟୋଜିତ ଏହି ଜାତୀୟ ଆଲୋଚନାଚକ୍ରକୁ ଉଦଘାଟନ କରିଥିଲେ ପ୍ରଖ୍ୟାତ ଓଡ଼ିଆ ଲେଖିକା ପଦ୍ମଭୂଷଣ ପ୍ରତିଭା ରାୟ | ସେ କହିଥିଲେ ଯେ,  ନାରୀ 

ମାନେ ହେଉଛନ୍ତି ଦେଶର ନୈତିକ ଶକ୍ତି। କୁନ୍ତଳା କୁମାରୀ ସାବତ, ସରଳା ଦେବୀ, ରମାଦେବୀ, ଅନ୍ନପୂର୍ଣ୍ଣା ମହାରଣା, ପାର୍ବତୀ ଗିରି ଆଦି ଓଡ଼ିଆ ନାରୀ ସ୍ବାଧୀନତା ସଂଗ୍ରାମୀମାନଙ୍କ ସମ୍ପର୍କରେ ସେ ଆଲୋକପାତ କରିଥିଲେ। କାର୍ଯ୍ୟକ୍ରମର ଉଦଘାଟନୀ ଅଧିବେଶନରେ ଅଧ୍ୟକ୍ଷତା କରିଥିଲେ ସାହିତ୍ୟ ଅକାଦେମିର ସଭାପତି ଡ. ମାଧବ କୌଶିକ। ସେ କହିଥିଲେ ଯେ ମହିଳାମାନଙ୍କ ଅବଦାନ ଓ ତ୍ୟାଗ ବିନା ସ୍ବାଧୀନତା ସଂଗ୍ରାମ ସଫଳ ହୋଇପାରି ନଥାନ୍ତା। ସାହିତ୍ୟ ଅକାଦେମି ତରଫରୁ ପ୍ରଥମ ଥର ପାଇଁ ମହାନ ସ୍ବାଧୀନତା ସଂଗ୍ରାମୀ ରମାଦେବୀଙ୍କ ନାମରେ ନାମିତ ବିଶ୍ବବିଦ୍ୟାଳୟରେ ଏଭଳି ଏକ ଗୁରୁତ୍ବପୂର୍ଣ୍ଣ ବିଷୟରେ ଆଲୋଚନା ହେଉଛି। ଅକାଦେମି ସ୍ଵୀକୃତ ଅନ୍ୟାନ୍ୟ ଭାଷାରେ ମଧ୍ୟ ଭାରତୀୟ ମହିଳା ସ୍ବାଧୀନତା ସଂଗ୍ରାମୀମାନଙ୍କ ପ୍ରସଙ୍ଗରେ ଆଲୋଚନା କରିବା ପାଇଁ ଏହା ବାଟ ଦେଖାଇବ। ଗାନ୍ଧୀବାଦ ସମ୍ପର୍କରେ ସେ ଯୋଡ଼ିଥିଲେ ଯେ ଏହି ବିଚାର ଓ ଜୀବନ ଶୈଳୀ ନର୍କକୁ ନାରାୟଣରେ ରୂପାନ୍ତରିତ କରିଦିଏ। ଏହି ଅଧିବେଶନରେ ପ୍ରାରମ୍ଭିକ ସୂଚନା ପ୍ରଦାନ ପୂର୍ବକ ଓଡ଼ିଆ ନାରୀ ସ୍ବାଧୀନତା ସଂଗ୍ରାମୀମାନଙ୍କ ବିଷୟରେ ବକ୍ତବ୍ୟ ପ୍ରଦାନ କରିଥିଲେ ସାହିତ୍ୟ ଅକାଦେମିର ଓଡ଼ିଆ ଉପଦେଷ୍ଟା ମଣ୍ଡଳୀର ଆବାହକ ଡ. ଗୌରହରି ଦାସ। ମୁଖ୍ୟ ଅତିଥି ଭାବରେ ଯୋଗ ଦେଇଥିଲେ ରମାଦେବୀ ମହିଳା ବିଶ୍ବବିଦ୍ୟାଳୟର କୁଳପତି ପ୍ର. ଜ୍ୟୋତ୍ସ୍ନା କୁମାରୀ ବିଶ୍ବାଳ ରାଉତ। ମୂଳ ଭାଷଣ ପ୍ରଦାନ କରିଥିଲେ ବିଶିଷ୍ଟ ଓଡ଼ିଆ ଲେଖକ ଓ ସ୍ତମ୍ଭକାର ଦାଶ ବେନହୁର। ଆଲୋଚ୍ୟ ବିଷୟରେ ବିସ୍ତୃତ ବିବରଣୀ ଉପସ୍ଥାପନ ପୂର୍ବକ ଗଡ଼ଜାତ ଅଞ୍ଚଳର ସଂଗ୍ରାମୀ ନାରୀମାନଙ୍କ ସମ୍ପର୍କରେ ଅଧିକ ଗବେଷଣା ଜରୁରୀ ବୋଲି ସେ ମତ ଦେଇଥିଲେ। ସ୍ବାଗତ ଭାଷଣ ଦେଇଥିଲେ ସାହିତ୍ୟ ଅକାଦେମି କୋଲକାତା କାର୍ଯ୍ଯାଳୟର ସହକାରୀ ସମ୍ପାଦକ କ୍ଷେତ୍ରବାସୀ ନାଏକ | ସମ୍ମାନିତ ଅତିଥି ଭାବରେ ରମାଦେବୀ ମହିଳା ବିଶ୍ବବିଦ୍ୟାଳୟର ସ୍ନାତକୋତ୍ତର ପରିଷଦର ଅଧ୍ୟକ୍ଷ ପ୍ର. ଚଣ୍ଡୀ ଚରଣ ରଥ ଯୋଗ ଦେଇଥିବା ବେଳେ ଉଦଘାଟନୀ ଅଧିବେଶନରେ ଧନ୍ୟବାଦ ଅର୍ପଣ କରିଥିଲେ ବିଶ୍ବବିଦ୍ୟାଳୟର କୁଳସଚିବ ଶ୍ରୀମତୀ ମନସ୍ଵିନୀ ସାହୁ | କାର୍ଯ୍ୟକ୍ରମର ପ୍ରଥମ ଅଧିବେଶନରେ ଅଧ୍ୟକ୍ଷତା କରିଥିଲେ ପ୍ର. ଯତୀନ୍ଦ୍ର କୁମାର ନାୟକ ଏବଂ ପ୍ରବନ୍ଧ ଉପସ୍ଥାପନ କରିଥିଲେ ଡ. ବୈଷ୍ଣବ ଚରଣ ମହାନ୍ତି, ପ୍ର. ବିଜୟ କୁମାର ଶତପଥୀ 

ଏବଂ ପ୍ର. ସଂଘମିତ୍ରା ମିଶ୍ର | ପ୍ରଥମ ଅଧିବେଶନରେ ଡ. ସସ୍ମିତା କର ସଂଯୋଜନା କରିଥିବା ବେଳେ ଧନ୍ୟବାଦ ଅର୍ପଣ କରି ଥିଲେ ଡ. ସରୋଜିନୀ ପାଣି | ସେହିଭଳି ଦ୍ବିତୀୟ ଅଧିବେଶନ ରେ ଡ.ବାସନ୍ତୀ ମହାନ୍ତି, ଡ.ବାସୁଦେବ ସୁନାନୀ ଏବଂ ଡ. ସଂଘମିତ୍ରା ଭଞ୍ଜ ପ୍ରବନ୍ଧ ଉପସ୍ଥାପନ କରିଥିବା ବେଳେ ସଭାପତିତ୍ଵ କରିଥିଲେ ବିଶିଷ୍ଟ ଲେଖକ ଅଧ୍ୟାପକ ବିଶ୍ଵରଞ୍ଜନ | ଏଥିରେ ଡ. ପୁଷ୍ପିତା ଶୁକ୍ଳ ସଂଯୋଜନା କରିଥିବା ବେଳେ ଧନ୍ୟବାଦ ଅର୍ପଣ କରିଥିଲେ ସୁଲତା ସାହୁ |