06-Feb-2021

ଦେଓଗାଁ,(ପ୍ରେରଣା ଖବର): ବଲାଙ୍ଗୀର ଜିଲ୍ଲାରେ ଅନେକ ଅଞ୍ଚଳ ବଣପାହାଡ ଘେରରେ ରହି ସୌନ୍ଦର୍ଯ୍ୟପୂର୍ଣ୍ଣ ରହିଛି । ଜିଲ୍ଲାର ଅନେକ ପାହଡ ତଥା ଜଙ୍ଗଲ ଲୋକଙ୍କୁ ଜୀବନଜୀବିକା ଦେଉଥିବା ବେଳେ ପର୍ଯ୍ୟଟକଙ୍କ ମନ ମୋହୁଛି । ବଲାଙ୍ଗୀର ଜିଲ୍ଲାର ଗନ୍ଧମାର୍ଦ୍ଦନ,ମହଖଣ୍ଡ,କୁମୁଡା,ଭୀମଡୁଙ୍ଗୁରି ଇତ୍ୟାଦି ପାହାଡ ଓ ଜଙ୍ଗଲକୁ ପର୍ଯ୍ୟଟନସ୍ଥଳିର ମାନ୍ୟତା ମିଳିସାରିଛି । ଏବେ ଜିଲ୍ଲାର ଦେଓଗାଁ ବ୍ଲକର ଦେଷଣ୍ଢ ପଞ୍ଚାୟତର ଚାନ୍ଦଲି ପାହାଡକୁ ଏକ ପର୍ଯ୍ୟଟନସ୍ଥଳିର ମାନ୍ୟତା ଦେବାକୁ ସ୍ଥାନୀୟଲୋକେ ଦାବି କରୁଛନ୍ତି । ୫ଟି ପଞ୍ଚାୟତର ପ୍ରାୟ ୩୦ଖଣ୍ଡ ଗ୍ରାମର ଲୋକଙ୍କ ଭାବଗତ,ଆଧ୍ୟାତ୍ମିକ,ସାମାଜିକ ଓ ଅର୍ଥନୈତିକ ସଂପର୍କ ଏହି ଚାନ୍ଦଲି ପାହାଡ ଉପରେ ରହିଛି । ଦେଷଣ୍ଢ ଗାଁଠାରୁ ମାତ୍ର ୨କିମି ଦୂରରେ ରହିଥିବା ଏହି ପାହାଡର ଅନେକ କିମ୍ବଦନ୍ତି ରହିଛି । ସ୍ଥାନୀୟଲୋକଙ୍କ କହିବା ହେଲା ଚାନ୍ଦଲି ପାହାଡରେ ବହୁବର୍ଷ ପୂର୍ବରୁ ଜଣେ ସିଦ୍ଧସାଧୁ ରହୁଥିଲେ । ଏଠାରେ ସେ ତପସ୍ୟା କରିବା ସହିତ ସିଦ୍ଧିଲାଭ ମଧ୍ୟ କରିଥିଲେ । ତାଙ୍କ ସାଙ୍ଗରେ ଅନେକ ସାଧୁ ଏଠାରେ ଥିବା ଗୁମ୍ଫାରେ ରହୁଥିଲେ । ଆଜି ମଧ୍ୟ ସେହି ଗୁମ୍ଫାଗୁଡିକ ଉକ୍ତ ପାହଡରେ ରହିଛି । ପାହାଡର ଚାରିଦିଗରେ ଘଞ୍ଚଜଙ୍ଗଲ ଭରିରହିଥିଲା । ଆଜି ମଧ୍ୟ ଏହି ଲଣ୍ଡା ପାହାଡର ଚାରିପଟରେ ପ୍ରାୟ ୫୦୦ଏକର ପରିମିତ ଘଞ୍ଚଜଙ୍ଗଲ ରହିଛି । ବଲାଙ୍ଗୀର ଫରେଷ୍ଟ ଡିଭିଜନ ଅନ୍ତର୍ଗତ ପାଟଣାଗଡ ରେଞ୍ଜର କିରିବାଞ୍ଜି ରିଜର୍ଭ ଜଙ୍ଗଲକୁ ଏହା ଲାଗିରହିଛି । ଜଙ୍ଗଲରେ ଅନେକ ଜୀବଜନ୍ତୁ ରହିଥିବା ସହିତ ଔଷଧିୟ ଗୁଲ୍ମଲତା ଭରି ରହିଛି । ସାହାଡା,ବାହାଡା,ଅଁଅଳା ସହିତ ଅନେକ କିସମର ଜଙ୍ଗଲଜାତ ଦ୍ରବ୍ୟ ସଂଗ୍ରହ କରି ସ୍ଥାନୀୟ ଆଦିବାସୀମାନେ ଜୀବିକା ନିର୍ବାହ କରିଆସୁଛନ୍ତି । ପାହାଡ ନିକଟରେ ଦେଷଣ୍ଢ,ଭାଲୁକୁନ୍ଦ,କେଓମାଲ,ଜୁରାବନ୍ଧ ପ୍ରଭୃତି ଗ୍ରାମ ରହିଛି । ଚାନ୍ଦଲି ପାହାଡ ନିକଟରେ ରହିଛି ଖପ୍ରାଡୁଙ୍ଗୁରି । ଚାନ୍ଦଲି ପାହାଡ ଉପରେ ରହିଛି ଏକ ଐତିହାସିକ ଜଳଉତ୍ସ । ଲଣ୍ଡା ପାହାଡର ଶୀଖରରେ ବର୍ଷସାରା ପ୍ରାୟ ୧୦ଫୁଟ ଉପରେ ପାଣି ଉକ୍ତ ପାଣିଟାଙ୍କିରେ ରହୁଛି । ଯାହାକୁ ସେଠାରେ ରହୁଥିବା ସାଧୁସନ୍ଥ ବ୍ୟବହାର କରିଆସୁଛନ୍ତି । ଏହା ସହିତ ଏକ ସତ୍ୟବଟବୃକ୍ଷ ମଧ୍ୟ ରହିଛି । କୁହାଯାଏ ଯେ,ଏହି ସତ୍ୟବଟବୃକ୍ଷ ଶହଶହ ବର୍ଷ ହେଲା ଏଠାରେ ରହିଆସିଛି । ଏହି ବଟବୃକ୍ଷ ମାତ୍ର ୧ଫୁଟ ଉଚ୍ଚର ହୋଇ ରହିଯାଇଛି । ଏହା କେବେ ମଧ୍ୟ ବଢେ ନାହିଁ କି କମେ ନାହିଁ । କେବଳ ଏକ ବିଶାଳ ପଥରଖଣ୍ଡ ଉପରେ ଚେରଲାଖିରହି ଏକ ଆଶ୍ଚର୍ଯ୍ୟଜନକ ଭାବରେ ରହିଛି । ଏହାର ପତ୍ର ବର୍ଷସାରା ସବୁଜ ଦେଖାଯାଇଥାଏ ଓ କେବେ ମଧ୍ୟ ତାହା ଶୁଖେ ନାହିଁ । ତେଣୁ ଏକ ଆଶ୍ଚର୍ଯ୍ୟର ବଟବୃକ୍ଷ ହୋଇଥିବାରୁ ତାକୁ ସ୍ଥାନୀୟଲୋକେ ସତ୍ୟବଟବୃକ୍ଷ ବୋଲି କହୁଛନ୍ତି । ବିଶ୍ୱାସ ରହିଛି ଏହି ବଟବୃକ୍ଷ ନିକଟରେ ଯିଏ ଯାହା ମନାସିଥାଏ ତାହା ପୂରଣ ହୋଇଥାଏ । ତେଣୁ ବହୁଲୋକ ଆସି ନିଜର ମନସ୍କାମନା କରିଥାନ୍ତି ।  ସେହିପରି ପାହାଡରେ ଅନେକ ସ୍ଥାନରେ ବିଭିନ୍ନ ରେଖାଚିତ୍ର ରହିଛି । ପଥରମାନେ କେଉଁଠି ଶଙ୍ଖ ଆକୃତିର ହୋଇଥିବା ବେଳେ କେଉଁଠି ସପ୍ତଫେଣି ନାଗ ଭଳି ରହିଛି । ଯାହାକି ଲୋକଙ୍କ ଭକ୍ତିର ଭାବନାକୁ ବଢାଉଛି । ଏହା ଏକ ଆଧ୍ୟାତ୍ମିକ କ୍ଷେତ୍ର ହୋଇରହିଛି । ଗତ କିଛିବର୍ଷ ହେଲା ଦେଷଣ୍ଢ ଓ ସ୍ଥାନୀୟ ଅଞ୍ଚଳର ଲୋକେ ଏକ କମିଟି ଗଠନ କରି ଏହି ସ୍ଥାନର ବିକାଶ ପାଇଁ ଉଦ୍ୟମ କରୁଛନ୍ତି । ଦେଷଣ୍ଢର ଘାସିରାମ ରଣା, ଅବସରପ୍ରାପ୍ତ ସୈନିକ ନିଳାମ୍ବର ପାଣିଗ୍ରାହୀ,ବିଦ୍ୟାଧର ନାଏକ,ଦିନବନ୍ଧୁ ମେହେର,ସ୍ୱୟମ୍ବର ମେହେର, ସତ୍ୟନାରାୟଣ ଷଢଙ୍ଗୀ,ଉଗ୍ରସେନ ରଣା,ସସ୍ମିତା ନାଏକ ପ୍ରମୁଖଙ୍କ ଉଦ୍ୟମକ୍ରମେ ଏହି ସ୍ଥାନର ବିକାଶ କାମ ଆରମ୍ଭ ହୋଇଛି । ସ୍ଥାନୀୟ ଲୋକଙ୍କ ଦାବି ପରେ ଦେଓଗାଁ ବ୍ଲକର ଅଧ୍ୟକ୍ଷା ରୀନା ମେହେର ଏହି ସ୍ଥାନକୁ ମୁଖ୍ୟ ସଡକ ଠାରୁ ଏକ ମାଟି ରାସ୍ତାର ନିର୍ମାଣକାମ ଆରମ୍ଭ କରାଇଛନ୍ତି । ମନରେଗା ଯୋଜନାରେ ୫ଲକ୍ଷ ଟଙ୍କାର ଅନୁଦାନରେ ଉକ୍ତ ରାସ୍ତାଟି ନିର୍ମାଣ ଚାଲିଛି । ଠିକ ସେହିପରି ସେଠାରେ ଏକ ସଭାମଣ୍ଡପ,ନଳକୂପ ଖନନ,ମେଳା ପଡିଆକୁ ସମତୁଳ କରାଯିବା ଇତ୍ୟାଦି କାମ କରାଯାଇଛି । ସ୍ଥାନୀୟ ଲୋକଙ୍କ ଉଦ୍ୟମକ୍ରମେ ଚନ୍ଦଲି ପାହାଡ ଉପରକୁ ପାହାଚ ମଧ୍ୟ ନିର୍ମିତ ହୋଇଛି । ଫଳରେ ପର୍ଯ୍ୟଟକମାନେ ସହଜରେ ପାହାଡକୁ ଚଢିପାରୁଛନ୍ତି । ପ୍ରତ୍ୟେକବର୍ଷ ଲୋକଙ୍କ ଉଦ୍ୟମରେ ଏକ ଯଜ୍ଞର ମଧ୍ୟ ଆୟୋଜନ ହେଉଛି । ସାଧୁସନ୍ଥମାନେ ଆସି ହୋମଯଜ୍ଞ କରୁଛନ୍ତି । ଯଜ୍ଞ ସମୟରେ ତଥା ନୂଆବର୍ଷରେ ଏଠାରେ ହଜାର ହଜାର ଲୋକଙ୍କ ସମାଗମ ହେଉଛି ।

କିଛି ଲୋକଙ୍କ ଦାନରେ ପାହାଡର ପଦଦେଶରେ ଏକ ଗଣେଶ ମୂର୍ତ୍ତି ଓ ଏକ ସରସ୍ୱତୀ ମୂର୍ତ୍ତି ସ୍ଥାପନ କରାଯାଇ ପାହାଡକୁ ସୌନ୍ଦର୍ଯ୍ୟକରଣ କରାଯାଇଛି । ଚଳିତବର୍ଷ ପାହାଡର ତଳେ ଓ ଉପରେ ଆମ୍ବବୃକ୍ଷ,ଅଅଁଳା,ଜାମୁ ଇତ୍ୟାଦି ବୃକ୍ଷ ରୋପଣ କରାଯାଇଛି । ଫଲରେ ଅଞ୍ଚଳଟି ସୌନ୍ଦର୍ଯ୍ୟଭରା ହୋଇଛି । ଲୋକଙ୍କର ଦାବିକୁ ନେଇ ବ୍ଲକର ପୂର୍ବତନ ଅଧ୍ୟକ୍ଷ ଲକ୍ଷ୍ମଣ କୁମାର ମେହେର ରାଜ୍ୟ ପର୍ଯ୍ୟଟନମନ୍ତ୍ରୀଙ୍କୁ ମଧ୍ୟ ଭେଟି ଏହି ସ୍ଥାନକୁ ପର୍ଯ୍ୟଟନସ୍ଥଳିର ମାନ୍ୟତା ଦେବାକୁ ଅନୁରୋଧ କରିଛନ୍ତି । ଦେଓଗାଁ ବ୍ଲକରେ ଓ ବଲାଙ୍ଗୀର ଜିଲ୍ଲାପରିଷଦ ବୈଠକରେ ଏନେଇ ବିଧିବଦ୍ଧ ପ୍ରସ୍ତାବ ମଧ୍ୟ ପାରିତ କରାଯାଇ ସରକାରଙ୍କୁ ପ୍ରସ୍ତାବ ପଠାଯାଇଛି । କେବଳ ରାଜ୍ୟସରକାରଙ୍କ ପର୍ଯ୍ୟଟନସ୍ଥଳି ଘୋଷଣା ଆପେକ୍ଷାରେ ଏବେ ଅଞ୍ଚଳବାସୀ ରହିଛନ୍ତି ।