10-Apr-2026

ବଲାଙ୍ଗୀର(ପ୍ରେରଣା ଖବର): ବଲାଙ୍ଗୀର ଜିଲ୍ଲାର ଗୁଡଭେଲା ବ୍ଲକରେ ରାଜନୈତିକ ଗଣ୍ଡଗୋଳ ଘଟି କିଛି ଲୋକ ଆହତ ହୋଇଥିବା ସୂଚନା ମିଳିଛି। ବିଜେପିଦଳର ଦୁଇଗୋଷ୍ଠୀ ମଧ୍ୟରେ ଏହି ଗଣ୍ଡଗୋଳ ହୋଇଛି। ଗତ କିଛିମାସ ହେଲା ଟିଟିଲାଗଡ ବିଧାୟକ ନବୀନ ଜୈନ ଓ ଗୁଡଭେଲା ବ୍ଲକର ପୂର୍ବତନ ବ୍ଲକ ଅଧ୍ୟକ୍ଷଙ୍କ ମଧ୍ୟରେ ବିବାଦ ଦେଖାଦେଇଛି। ନିଜ ନିଜ ପତିଆରା ଦେଖାଇବାକୁ ଯାଇ ଆଜିର ଏହି ଗଣ୍ଡଗୋଳ ହୋଇଥିବା ଆଲୋଚନାର ବିଷୟ ହୋଇଛି। ମିଳିଥିବା ସୂଚନା ରୁ ଜଣାପଡିଛି ଯେ,ବିଧାୟକ ନବୀନ ଜୈନଙ୍କ ପ୍ରତିନିଧି ଭାବରେ ଦେଉଳଗୁଡିର ଶରତ ସାହୁ ରହିଛନ୍ତି। ଗୁଡଭେଲା ବ୍ଲକରେ ନିର୍ମାଣ ହେବାକୁଥିବା ଏକ ଷ୍ଟାଡିୟମ ବିଷୟରେ ଶରତ ସାହୁ ଓ ତାଙ୍କ ସମର୍ଥକମାନେ ବ୍ଲକକୁ ଯାଇ ଅଭିଯୋଗ କରିଥିଲେ। କୁଆଡେ ଗୁଡଭେଲା ସଦରମହକୁମାରେ ହେବାକୁ ଥିବା ମିନିଷ୍ଟାଡିୟମକୁ ଅଧ୍ୟକ୍ଷାଙ୍କ ସ୍ୱାମୀ ତଥା ଜାମୁଟ ସମିତି ସଭ୍ୟ ଅଶୋକ ଦୋରା ଜାମୁଟକୁ ନେଇଯାଇଛନ୍ତି। ସେଥିପାଇଁ ବିଧାୟକ ଗୋଷ୍ଠୀ ଏହାକୁ ଗୁଡଭେଲାରେ କରିବାକୁ ବ୍ଲକରେ ଅଧ୍ୟକ୍ଷାଙ୍କୁ ଅଭିଯୋଗ କରିଥିଲେ। ବିଧାୟକଙ୍କ ପ୍ରତିନିଧି ଶରତ ସାହୁଙ୍କ ନେତୃତ୍ୱରେ ପ୍ରାୟ ୧୦ରୁ ୧୨ଜଣ ବ୍ୟକ୍ତି ବ୍ଲକକୁ ଆଜି ଯାଇ ଅଭିଯୋଗ କରିଥିଲେ। ଏହି ଘଟଣାକୁ ନେଇ ଅଶୋକ ଦୋରାଙ୍କ ସହ ପ୍ରଥମେ ବଚସା ହୋଇ ପରେ ମାରପିଟ ପର୍ଯ୍ୟନ୍ତ କଥା ଯାଇଥିଲା। ଉଭୟଙ୍କ ଗୋଷ୍ଠୀ ମଧ୍ୟରେ ବ୍ଲକ ପରିସରରେ ପ୍ରବଳ ମାରପିଟ ହୋଇଥିଲା। ଉଭୟପଟୁ କିଛି ଲୋକ ଆହତ ହୋଇଥିବା ଜଣାପଡିଛି। ଏନେଇ ଅଶୋକ ଦୋରା ଗଣମାଧ୍ୟମକୁ କହିଛନ୍ତି ଯେ,ମିନିଷ୍ଟାଡିୟମ ବିଷୟରେ ସେ କିଛି ଜାଣିନାହାଁନ୍ତି କିନ୍ତୁ ସେହି ମିନିଷ୍ଟାଡିୟମକୁ ଅନ୍ୟଆଡେ ନେଇଯାଇଥିବା ଅଯଥାରେ ଅଭିଯୋଗ କରାଯାଉଛି। ବ୍ଲକ ଅଧ୍ୟକ୍ଷା ଓ ମୁଁ ଏକ କାର୍ଯ୍ୟକ୍ରମକୁ ଯାଇ ଫେରିବା ପରେ ଶରତ ସାହୁ କିଛି ମଦ୍ୟପକୁ ଧରିଆସି ବ୍ଲକଅଧ୍ୟକ୍ଷାଙ୍କୁ ଦୁର୍ବ୍ୟବହାର କରିଥିଲେ। ଯାହାକୁ ନେଇ ଗଣ୍ଡଗୋଳ ହୋଇଥିଲା ଓ ଆମର ପ୍ରାୟ ୫ଜଣ ପିଲା ଆହତ ହୋଇଛନ୍ତି ବୋଲି ଶ୍ରୀ ଦୋରା ଗଣମାଧ୍ୟମକୁ କହିଛନ୍ତି। ସେପଟେ ଲୋକଙ୍କ ଅଭିଯୋଗକୁ ନେଇ ଆମେ ପ୍ରାୟ ୧୦ଜଣ ବ୍ଲକକୁ ଆସିଥିବା ବେଳେ ଅଶୋକ ଦୋରାଙ୍କ ଗାଡିରେ ରଖାଯାଇଥିବା ଗେଡାରେ ତାଙ୍କ ସମର୍ଥକ ଆମକୁ ଆକ୍ରମଣ କରିଛନ୍ତି ବୋଲି ବିଧାୟକଙ୍କ ପ୍ରତିନିଧି ଶରତ ସାହୁ ଗଣମାଧ୍ୟମ ଆଗରେ ପ୍ରକାଶ କରିଛନ୍ତି। ବ୍ଲକରେ ଅସାମାଜିକ ବ୍ୟକ୍ତିଙ୍କୁ ଆଣି ଅଶୋକ ଦୋରା ଗଣ୍ଡଗୋଳ କରାଉଥିବା ଶରତ ସାହୁ ଅଭିଯୋଗ କରିଛନ୍ତି। ତେବେ ଏନେଇ ସଦର ଏସଡିପିଓ  ସରୋଜ କୁମାର ଉପାଧ୍ୟାୟଙ୍କୁ ପଚାରିବାରୁ ଗୁଡଭେଲା ବ୍ଲକରେ କିଛି ଗଣ୍ଡଗୋଳ ହୋଇଥିବା ସୂଚନା ମିଳିଛି କିନ୍ତୁ ପୋଲିସରେ ଏପର୍ଯ୍ୟନ୍ତ କେହି ଏତଲା ଦେଇନଥିବା କହିଛନ୍ତି।